ທ່ານ ຟ້າສະໜັ່ນ ທໍາມະວົງ ຫົວໜ້າພະແນກໂຍທາທິການ ແລະ ຂົນສົ່ງ ແຂວງຫຼວງພະບາງ ໄດ້ໃຫ້ສໍາພາດຕໍ່ນັກຂ່າວສໍານັກຂ່າວສານປະເທດລາວໃນວັນທີ 13 ທັນວາ 2016 ຜ່ານມານີ້ວ່າ: ໂຄງການກໍ່ສ້າງລົດໄຟລາວ-ຈີນ ນອນໃນເຂດແຂວງຫຼວງພະບາງຮັບຜິດຊອບໄດ້ມີຄວາມພ້ອມໃນທຸກດ້ານ, ເຊິ່ງໃນວັນທີ 25 ທັນວາ 2016 ທີ່ຈະເຖິງນີ້ ເປັນມື້ເລິກງາມຍາມດີ ສະນັ້ນຈະໄດ້ມີພິທີເປີດການກໍ່ສ້າງຢ່າງເປັນທາງການຢູ່ຈຸດບ້ານພອນໄຊ ເມືອງຫຼວງພະບາງ.
ສໍາລັບເສັ້ນທາງລົດໄຟຜ່ານແຂວງຫຼວງພະບາງ ມີຄວາມຍາວທັງໝົດ 80 ກິໂລແມັດ ຜ່ານໃນ 3 ເມືອງຄື: ເມືອງຈອມເພັດມີ 19 ບ້ານທີ່ໄດ້ຮັບຜົນກະທົບ,ເມືອງຫຼວງພະບາງ 11 ບ້ານ ແລະ ເມືອງຊຽງເງິນ 14 ບ້ານ, ສ້າງຂົວຂ້າມນໍ້າຂອງ 1 ແຫ່ງ, ອຸໂມງ 6 ແຫ່ງ , ມີ 1 ສະຖານີໃຫຍ່ ແລະ 4 ສະຖານີນ້ອຍ.
ພ້ອມດຽວກັນນັ້ນ ທາງຄະນະຮັບຜິດຊອບກໍໄດ້ເອົາໃຈໃສ່ວຽກງານການໂຄສະນາເຜີຍແຜ່ໃຫ້ປະຊາຊົນຜູ້ທີ່ໄດ້ຮັບຜົນກະທົບໄດ້ຮັບຮູ້ເຂົ້າໃຈ ໂດຍລົງສົມທົບກັບອໍານາດການປົກຄອງທ້ອງຖິ່ນເກັບກໍາຂໍ້ມູນຊອກຫາວິທີແກ້ໄຂ, ສ່ວນການໄກ່ເກ່ຍຄ່າຊົດເຊີຍນັ້ນ ແມ່ນຍັງລໍຖ້າເພື່ອໃຫ້ມີຄວາມເປັນເອກະພາບກັນກັບໃນແຕ່ລະແຂວງ.
ຂໍ້ມູນຈາກ: ສຳນັກຂ່າວສານປະເທດລາວ
ຮູບຈາກ: ວາລະສານ ທາເກັດ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!