ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ລົງຢ້ຽມຢາມ ບໍລິສັດ ພູເບ້ຍມາຍນິງ ເມື່ອບໍ່ດົນຜ່ານມານີ້ ໂດຍໄດ້ຮັບການຕ້ອນຮັບຈາກ ທ່ານ ພອຍຄຳ ຮຸ່ງບຸນຍວງ ຮອງເຈົ້າແຂວງໄຊສົມບູນ ແລະ ທ່ານ ຈັນເພັງ ບຸນນະຜົນ ປະທານ ບໍລິສັດ ພູເບ້ຍມາຍນິງ ຈຳກັດ. ຄະນະຜູ້ແທນໄດ້ຢ້ຽມຢາມ ຫ້ອງຄວບຄຸມດ້ວຍລະບົບຄອມພິວເຕີຂອງໂຮງງານພູຄຳ, ເຂດບໍ່ເປີດ, ເຂດໂຮງງານຜະລິດ ແລະ ອ່າງເກັບຫາງແຮ່. ທ່ານຮອງນາຍົກລັດຖະມົນຕີ ໄດ້ຮັບຟັງການຄຸ້ມຄອງດ້ານສິ່ງແວດລ້ອມຂອງບໍລິສັດ ຊຶ່ງປະກອບດ້ວຍວຽກງານຟື້ນຟູປ່າ, ການໝູນວຽນນ້ຳກັບມາໃຊ້ຄືນໃໝ່ຢູ່ສະໜາມ ແລະ ໂຄງການວິສະວະກຳຍົກລະດັບທາງ ໃນບໍ່ພູຄຳ ທີ່ຫຼຸຸດຜ່ອນການປ່ອຍສານກາກໂບນິກຫຼຸຸດຕື່ມອີກ 6%. ຄະນະຜູ້ແທນ ຍັງໄດ້ຮັບຟັງວິທີການຂອງບໍລິສັດ ໃນວຽກງານພັດທະນາ ແລະ ການພົວພັນກັບຊຸມຊົນ.

ໃນປີ 2015 ປະຊາຊົນຢູ່ໃກ້ໂຮງງານພູຄຳ ແລະ ບ້ານຫ້ວຍຊາຍ ໄດ້ຮັບຜົນປະໂຫຍດຈາກໂຄງການພັດທະນາຊຸມຊົນ ຫຼາຍກວ່າ 42 ໂຄງການຕ່າງກັນ ທີ່ກ່ຽວຂ້ອງກັບການສຶກສາ, ສຸຂະພາບ, ການພັດທະນາກະສິກຳ, ການເງິນຈຸລະພາກ ແລະ ໂຄງລ່າງ, ທັງນີ້ ລັດຖະບານລາວ ຖືຮຸ້ນ 10% ໃນບໍລິສັດພູເບ້ຍມາຍນິງຈຳກັດ ແລະ ອີກ 90% ແມ່ນຖືຮຸ້ນໂດຍ ບໍລິສັດ ແພນ ອອສ ຈຳກັດ, ບໍລິສັດໃນເຄືອຂອງ ບໍລິສັດ GRAM ສປ ຈີນ.

ແຫລ່ງຂ່າວ:

ຕິດຕາມເຮົາທາງFacebook ກົດຖືກໃຈເລີຍ!