ເກີດເຫດສະເທືອນຂວັນທີ່ຮຸນແຮງອີກແລ້ວຢູ່ແຂວງຈຳປາສັກ ຫຼັງຍິງຫົວໃຈເດັດໂຫດຂ້າປາດຄໍລ່ອງນ້ຳໝໍມໍ
ເພື່ອເອົາຄຳໄປຂາຍໃຊ້ໜີ້ ແຕ່ໜີເວນກຳບໍ່ພົ້ນຖືກເຈົ້າໜ້າທີ່ຈັບໄດ້ໃສ່ໂທດຕາມກົດໝາຍອາຍາ.
ຕາມການເປີດເຜີຍຂອງທ່ານພັນໂທ ສີວອນ ວົງຫາຈັກ ຫົວໜ້າກອງບັນຊາການ ປກສ ເມືອງປາກເຊ ແຂວງຈຳ
ປາສັກໃຫ້ຮູ້ວ່າ: ໃນຕອນເຊົ້າວັນທີ 25 ກໍລະກົດຜ່ານມາ ໄດ້ມີຄົນມາແຈ້ງຄວາມວ່າມີຄົນເສຍຢູ່ບ້ານນາແຫກ
ເມືອງປາກເຊ ຫຼັງຈາກນັ້ນ ເຈົ້າໜ້າກໍ່ໄດ້ປະສານສົມທົບກັບເອົາອຳນາດການປົກຄອງບ້ານ ເພື່ອລົງຊອກຫາ
ແຕ່ເຊົ້າຈົນຄ່ຳຮອດເວລາປະມານ 16:00 ໂມງ ຈິ່ງສາມາດພົບສົບແມ່ເຖົ້າດວງໃສ ນອນຕາຍຢູ່ແຄມນ້ຳ ຫຼັງຈາກ
ນັ້ນ ເຈົ້າໜ້າທີ່ພວກເຮົາກໍໄດ້ເກັບກຳເອົາຫຼັກຖານຈຸດທີ່ເກີດເຫດ ແລະ ສືບສວນສອບສວນຜູ້ໃກ້ຄຽງ ຈິ່ງສາມາດ
ພົບຜູ້ສົງໄສຄື ນາງ ຄອນສະຫວັນ ຫຼື ຫຼ້າອາຍຸ 24 ປີ, ອາຊີບແມ່ເຮືອນຢູ່ບ້ານດັ່ງກ່າວ ແລ້ວເຈົ້າໜ້າທີ່ໄດ້ກັກຕົວ
ເພື່ອນຳໄປສືບສວນສອບສວນ.
ຜ່ານການສືບສວນສອບສວນຂອງເຈົ້າໜ້າທີ່ ປກສ ເມືອງປາກເຊ ຜູ້ກ່ຽວໄດ້ຮັບສາລະພາບວ່າ: ໃນເວລາປະມານ
16:00 ໂມງຂອງວັນທີ 24 ກໍລະກົດ 2014 ຜູ້ກ່ຽວໄດ້ໄປຂາຍເລກຢູ່ເຮືອນ ນາງ ວຽງ ແລະ ໄດ້ຊວນເອົາແມ່ເຖົ້າດວງໃສ
ອາຍຸ 75 ປີຢູ່ບ້ານເວີນທອງ ເມືອງໂຂງ ທີ່ຂຶ້ນມາຢ້ຽມຍາມ ແລະ ອາໄສຢູ່ເຮືອນນ້ອງສາວຄືນາງ ວຽງ ບ້ານນາແຫກ
ເມືອງປາກເຊ ໄປດູມໍ (ເບິ່ງໄພ້) ແຕ່ຜູ້ຖືກເຄາະຮ້າຍບໍ່ໄປ, ຫຼັງຈາກນັ້ນ ຜູ້ກ່ຽວໄດ້ຊວນຜູ້ເຄາະຮ້າຍໄປເບິ່ງເລກຢູ່ຕົ້ນ
ຄູນຢູ່ຂ້າງເຮືອນ ທ້າວ ພົງສະຫວັນ ບ້ານດຽວກັນ, ໃນເວລາເບິ່ງເລກຢູ່ນັ້ນຜູ້ກ່ຽວຜູ້ໄດ້ສັງເກດເຫັນຜູ້ເຄາະຮ້າຍ ໃສ່
ຄຳຈິ່ງມີແນວຄິດຢາກໄດ້ ເພາະເປັນໜີ້ສິນເຂົາຫຼາຍ ຫຼັງຈາກນັ້ນ ກໍໄດ້ອອກແຜນຊວນຜູ້ເຄາະຮ້າຍໄປຫາໜໍ່ໄມ້,
ເມື່ອຕົກລົງກັນແລ້ວຜູ້ກ່ຽວຈິ່ງໄປເອົາມີດຢູ່ເຮືອນຂອງພໍ່ແມ່ຜູ້ກ່ຽວ ແລ້ວກັບມາເຫັນຜູ້ເຄາະຮ້າຍຢືນລໍຖ້າຢູ່ຂ້າງ
ກໍໄມ້ໄຜ່ທີ່ຫ່າງຈາກເຮືອນຂອງຜູ້ກ່ຽວປະມານ 67 ແມັດ, ເວລານັ້ນຜູ້ເຄາະຮ້າຍກົ້ມເບິ່ງໜໍ່ໄມ້, ຜູ້ກ່ຽວໄດ້ໃຊ້ມືເບື້ອງ
ຂວາຈັບມີດທີ່ກຽມມານັ້ນແທງບໍລິເວນຫຼັງ 1 ບາດ, ເມື່ອຜູ້ເຄາະຮ້າຍຮ້ອງຂຶ້ນ ແລະ ລົ້ມລົງ ຈິ່ງເອົາມືເບື້ອງຊ້າຍອັດ
ປາກແລ້ວເອົາມີດປາດຄໍ ແລະ ແທງຊ້ຳຂົ່ມໄວ້ອີກບາດໜຶ່ງ ເມື່ອເຫັນຜູ້ເຄາະຮ້າຍໃຈຂາດ (ຕາຍ) ກໍປົດເອົາສາຍ
ແຂນ 1 ເສັ້ນ, ສ່ວນສາຍແຂນ ແລະ ສາຍຄໍແມ່ນເອົາບໍ່ທັນຢ້ານຄົນມາພົບເຫັນ ແລະ ບໍ່ໝັ້ນໃຈຢ້ານເປັນຄຳປອມ,
ຈາກນັ້ນ ກໍກັບມາເອົາມີດປະໄວ້ຢູ່ເຮືອນແມ່ຂອງຕົນພ້ອມໄດ້ນຳເອົາຖົງລາຍແດງຂະໜາດ 70 ຊັງຕີແມັດ ຢູ່ເຮືອນ
ຜູ້ກ່ຽວອອກໄປໃສ່ສົບປະໄວ້ ຈາກນັ້ນ ກໍກັບເມືອເຮືອນເອົາຄຳໄປຂາຍຢູ່ຕະຫຼາດໃໝ່ປາກເຊໄດ້ເງິນ 7.400 ບາດ
(ເງິນໄທ) ເມື່ອໄດ້ເງິນກໍກັບເມືອເຮືອນແລ້ວ ໄປລາກເອົາສົບລົງນ້ຳຫ້ວຍປະມານ 500 ແມັດ, ແລ້ວໄຂເອົາສົບອອກ
ຈາກຖົງປ່ອຍໃຫ້ສົບໄຫຼນ້ຳໄປ, ສ່ວນຖົງກໍປະໄວ້ແຄມຫ້ວຍຂ້າງຕົ້ນໄມ້ໃຫຍ່ຈາກນັ້ນ ຈິ່ງກັບເມືອເຮືອນໄປສົ່ງຂວັນ
ເລກໃຫ້ນາງ ປິງ ບ້ານໂຊກອຳນວຍ ເມືອງປາກເຊ ແລະ ໄດ້ເອົາເງິນທີ່ໄດ້ຈາກການຂາຍຄຳໃຊ້ຄ່າເລກ 1 ພັນບາດ
ແລະ ກັບເມືອເຮືອນຈົນຮອດວັນທີ 25 ກໍລະກົດເຈົ້າໜ້າ ທີ່ໄດ້ກັກຕົວ.
ຢ່າງໃດກໍຕາມ ຕໍ່ກັບບັນຫານີ້ທ່ານ ພັນໂທ ສີວອນ ວົງຫາຈັກ ກໍໄດ້ຝາກຄວາມຮຽກຮອງເຖິງພໍ່ແມ່ປະຊາຊົນຄວນ
ມີສະຕິໃນການໄປມາ ໂດຍສະເພາະແມ່ນການຖືຊັບສິນທີ່ມີຄ່າໄປບ່ອນທີ່ອັນຕະລາຍ ແລະ ຄົນແປກໜ້າ, ເນື່ອງຈາກ
ວ່າການຖືຊັບສິນມີຄ່າດັ່ງກ່າວມັນໄດ້ກາຍເປັນແຮງຈຸງໃຈ ກໍ່ໃຫ້ເກີດການກໍ່ອາດຊະຍາກຳ ຊຶ່ງເປັນອັນຕະລາຍຢ່າງ
ໃຫຍ່ຫຼວງຕໍ່ຕົວຂອງທ່ານເອງ.
ຂອບໃຈຂ່າວຈາກ: http://www.sedthakid.la/home/khao/19730.html