ຂປລ. ກະຊວງການຕ່າງປະເທດ ໄດ້ຈັດກອງປະຊຸມວິຊາການ ວຽກງານການຕ່າງປະເທດ ໃນວັນທີ 13-14 ທັນວາ ນີ້ ຢູ່ນະຄອນຫລວງວຽງຈັນ, ໂດຍມີທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ, ມີບັນດາຮອງລັດຖະມົນຕີ, ຫົວໜ້າກົມ, ຮອງກົມ, ຜູ້ຕາງໜ້າຂະແໜງ ການກ່ຽວຂ້ອງຈາກບັນດາກະຊວງ, ທະບວງກົມ, ນະຄອນຫລວງ ແລະ ແຂວງ ເຂົ້າຮ່ວມ.
ການປະຊຸມຄັ້ງນີ້, ໄດ້ພ້ອມກັນສັງເກດຕີລາຄາ ການຈັດຕັ້ງປະຕິບັດນະໂຍບາຍຕ່າງປະເທດ ຂອງພັກ-ລັດ ແລະ ການເຄື່ອນໄຫວການຕ່າງປະເທດຂອງ ສປປ ລາວ ໃນໄລຍະ 3 ປີຜ່ານມາ ນັບແຕ່ກອງປະຊຸມວຽກງານການຕ່າງປະເທດ ຄັ້ງທີ 12 ກຳນົດອອກ, ທັງກຳນົດທິດທາງແຜນການ ວຽກງານການຕ່າງປະເທດຂອງ ສປປ ລາວ ສຳລັບ 3 ປີຕໍ່ໜ້າ ສົກປີ 2017-2019. ພ້ອມນັ້ນ, ຍັງໄດ້ປຶກສາຫາລື ແລກປ່ຽນຄຳຄິດຄຳເຫັນ ກ່ຽວກັບວຽກງານການຕ່າງປະເທດຂອງ ພັກ-ລັດ ເພື່ອກະກຽມໃຫ້ແກ່ກອງປະຊຸມ ທາງການວຽກງານການຕ່າງປະເທດ ຄັ້ງທີ 13, ເຊິ່ງຈະຈັດຂຶ້ນຢ່າງເປັນທາງການ ໃນທີ 15-16 ທັນວານີ້. ພ້ອມສັງເກດຕີລາຄາ ສະພາບການພາກພື້ນ ແລະ ສາກົນ ແລະ ການປະຕິບັດແນວທາງການຕ່າງປະເທດ ໄລຍະເຄິ່ງທ້າຍສະໄໝ ການຈັດຕັ້ງຜັນຂະຫຍາຍມະຕິ 9 ຂອງສູນກາງພັກ ແລະ ຈຸດສຸມສຳລັບວຽກງານການຕ່າງປະເທດ ແຕ່ປີ 2017-2019; ເປັນເຈົ້າການໃນການເຊື່ອມໂຍງກັບພາກພື້ນ, ສາກົນ ແລະ ປະກອບສ່ວນຢ່າງຕັ້ງໜ້າ ເຂົ້າໃນການສ້າງປະຊາຄົມອາຊຽນ; ຍົກສູງຄວາມສາມາດລັກສະນະນຳໜ້າ ແລະ ຄວາມເປັນເຈົ້າການຂອງພະນັກງານ ໃນຂະແໜງການຕ່າງປະເທດ ຕໍ່ການປະຕິບັດແນວທາງການຕ່າງປະເທດຂອງພັກ.
ຕະຫລອດການດຳເນີນກອງປະຊຸມ, ທ່ານປະທານໄດ້ຕັ້ງຫລາຍຄຳຖາມເຈາະຈີ້ມ ຕໍ່ແຕ່ລະວາລະຂອງກອງປະຊຸມ ເພື່ອໃຫ້ ໄດ້ຕາມເນື້ອໃນຄຳຂວັນ ແລະ ຫົວຂໍ້ຍ່ອຍຂອງກອງປະຊຸມຄັ້ງນີ້ຄື “ການທູດປ້ອງກັນເຫດ ແລະ ບຸກທະລຸ ເພື່ອພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ເພີ່ມທະວີຄວາມເປັນເຈົ້າການໃນການເຊື່ອມໂຍງ ເສດຖະກິດພາກພື້ນ ແລະ ສາກົນ” ແລະ “ ຍົກສູງຄວາມສາມາດ, ລັກສະນະນຳໜ້າ ແລະ ຄວາມເປັນເຈົ້າຂອງພະນັກງານ ໃນຂະແໜງການຕ່າງປະເທດ”, ເຊິ່ງກໍລວມທັງບັນຫາ, ຂໍ້ຫຍຸ້ງຍາກ ແລະ ຂອດການປະສານງານ ທີ່ກອງປະຊຸມຍັງເຫັນວ່າ ຄວນຈະໄດ້ຮັບການປັບປຸງ ແກ້ໄຂໃຫ້ດີຂຶ້ນ ເພື່ອໃຫ້ສອດຄ່ອງກັບສະພາບແວດລ້ອມໃໝ່ ແລະ ທັນກັບສະພາບການປ່ຽນແປງ ຢ່າງວ່ອງໄວຂອງໂລກໃນປະຈຸບັນ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!