ສຳນັກຂ່າວຕ່າງປະເທດ ລາຍງານໃນວັນທີ 9 ທັນວາຜ່ານມານີ້ວ່າ ເຈົ້າໜ້າທີ່ຕຳຫລວດຫວຽດນາມ ໄດ້ຍຶດປືນສັ້ນ (CZ) P-07 ຈຳນວນ 97 ກະບອກ ພ້ອມດ້ວຍອຸປະກອນຄົບຊຸດ ທີ່ຖືກເຈົ້າໜ້າທີ່ພາສີກວດພົບ ທີ່ສະໜາມບິນເຕິ່ນເຊິນເຍິ໊ດ ນະຄອນໂຮ່ຈິມິນ ແລະ ຍຶດເອົາໄວ້ ເມື່ອເດືອນກໍລະກົດປີ 2015 ໂດຍທີ່ບໍ່ມີຜູ້ໃດຕິດຕໍ່ມາຂໍຮັບເອົາ ຊຶ່ງອາວຸດປືນເຫລົ່ານີ້ ຜະລິດຂຶ້ນທີ່ປະເທດສາທາລະນະລັດເຊັກ ແລະ ມີຕົ້ນທາງສົ່ງມາຈາກປະເທດຕວກກີ ໂດຍທີ່ບໍ່ຮູ້ຈັກຜູ້ສົ່ງ ແລະ ບໍ່ຮູ້ຈັກປາຍທາງຜູ້ຮັບທີ່ຊັດເຈນ.
ພາຍຫລັງການກວດພົບເມື່ອປີກາຍນີ້, ຈາກນັ້ນບໍ່ດົນ ສຳນັກງານຕຳຫລວດແຫ່ງຊາດສິງກະໂປ ໄດ້ອອກມາຖະແຫລງວ່າ ອາວຸດປືນທັງໝົດມີປາຍທາງສົ່ງໄປສິງກະໂປ ແຕ່ລະບຸປາຍທາງສົ່ງຜິດພາດ, ແນວໃດກໍຕາມ ຕາມກົດໝາຍຫວຽດນາມ ທັງໝົດເປັນອາວຸດສົງຄາມ ຊຶ່ງເປັນອັນຕະລາຍຕໍ່ຄວາມໝັ້ນຄົງຂອງຊາດ ແລະ ຄວາມສະຫງົບສຸກຂອງສັງຄົມ ຈຶ່ງໄດ້ຍຶດອາວຸດປືນ ແລະ ອຸປະກອນທັງໝົດ ໃຫ້ເປັນຊັບສິນຂອງລັດ ແລະ ຈະດຳເນີນການຕາມຂັ້ນຕອນຂອງກົດໝາຍຕໍ່ໄປ.
ຕິດຕາມເຮົາທາງFacebook ກົດຖືກໃຈເລີຍ!