ເກີດເຫດລະເບີດລົດ ດ້ານໜ້າສະໜາມກີລາໃນນະຄອນອິດຕັນບູລ ເປັນເຫດເຮັດໃຫ້ມີຜູ້ເສຍຊີວິດ 15 ຄົນ ສ່ວນໃຫຍ່ເປັນຕໍາຫຼວດ ເຫດເກີດຫຼັງແຂ່ງຂັນເຕະບານແລ້ວບໍ່ດົນ.
ອີງຕາມສໍານັກຂ່າວຕ່າງປະເທດລາຍງານໃນວັນທີ 11 ທັນວາ 2106 ຜ່ານມາວ່າ: ເກີດເຫດລະເບີດຄາຣ໌ບອມໃຈກາງນະຄອນອິດຕັນບູລ ປະເທດຕຸຣກີ ໃກ້ກັບສະໜາມກີລາບານເຕະ ພາຍຫຼັງມີການແຂ່ງຂັນເຕະບານບອລແມດຊ໌ສໍາຄັນໄດ້ສໍາເລັດລົງເປັນເວລາບໍ່ດົນ ເປັນເຫດເຮັດໃຫ້ຜູ້ເສຍຊີວິດນັບສິບລາຍ ສ່ວນໃຫຍ່ເປັນເຈົ້າໜ້າທີ່ຕໍາຫຼວດທີ່ມາອໍານວຍຄວາມສະດວກ.
ຕາມການລາຍງານລະບຸວ່າ ເມື່ອເວລາປະມານ 23:00 ນາທີ ຂອງວັນທີ 10 ທັນວາ ເກີດເຫດລົດຍົນລະເບີດທີ່ດ້ານໜ້າສະໜາມກີລາແຫ່ງໜຶ່ງໃນນະຄອນອິດຕັນບູລ ເປັນເຫດເຮັດໃຫ້ເຈົ້າໜ້າທີ່ຕໍາຫຼວດເສຍຊີວິດຢ່າງໜ້ອຍ 15 ລາຍ ແລະມີຜູ້ໄດ້ຮັບບາດເຈັບອີກເກືອບ 70 ຄົນ.
ທາງການຕຸຣກີເປີດເຜີຍໃນເບື້ອງຕົ້ນວ່າ ເຫດດັ່ງກ່າວອາດຈະເປັນເຫດລະເບີດຂ້າໂຕຕາຍ ໂດຍຈຸດຂະນວນຈາກລົດຍົນ ທີ່ຈອດໄວ້ໃກ້ໆກັັບສະໜານກີລາ ສໍາຫຼັບເປົ້າໝາຍຄາດວ່າອາດຈະມຸ່ງໄປທີ່ຕໍາຫຼວດຈະລາຈອນ ທີ່ຖືກເກນມາອໍານວຍຄວາມສະດວກ ແລະຮັກສາຄວາມສະເຫງົາໃນການແຂ່ງຂັນເຕະບານ.
ແນວໃດກໍຕາມເຫດດັ່ງກ່າວ ເກີດຂຶ້ນຫຼັງຈາກແຂ່ງຂັນເຕະບານໄດ້ສໍາເລັດລົງແລ້ວ ເຮັດໃຫ້ແຟນບານ ແລະຜູ້ຊົມສ່ວນໃຫຍ່ຕ່າງທະຍອຍຈາກສະໜາມກີລາໄປເກືອບຈະໝົດແລ້ວ ຈຶ່ງເຊື່ອວ່າອາດຈະຕັ້ງໃຈທໍາຮ້າຍເຈົ້າໜ້າທີ່ຕໍາຫຼວດເປັນຫຼັກ ຂະນະນີ້ຍັງບໍ່ມີກຸ່ມກໍ່ການຮ້າຍໃດໆ ອອກມາສະແດງໂຕຍອມຮັບໃນກໍລະນີທີ່ເກີດຂຶ້ນ.