ສຳນັກຂ່າວຕ່າງປະເທດ ລາຍງານໃນວັນທີ 8 ທັນວານີ້ວ່າ ກອງກຳລັງກະບົດຕໍ່ຕ້ານລັດຖະບານຊີຣີ ໄດ້ຖອນກຳລັງອອກຈາກພື້ນທີ່ ເຂດເມືອງເກົ່າ ທາງພາກຕາເວັນອອກຂອງເມືອງອະເລບໂປແລ້ວ ໃນຕອນເຊົ້າຂອງວັນພຸດທີ 7 ທັນວາຜ່ານມາ ແລະ ໄດ້ມຸ່ງໜ້າລົງໄປເຂດພື້ນທີ່ທາງພາກໃຕ້ຂອງເມືອງ ຊຶ່ງກຸ່ມກະບົດຍັງສາມາດຄວບຄຸມໄດ້ຢູ່ ຫລັງຈາກທີ່ຖືກກອງທັບຊີຣີ ດຳເນີນການໂຈມຕີທາງອາກາດຢ່າງໜັກໜ່ວງ ຕະຫລອດໄລຍະຫລາຍມື້ທີ່ຜ່ານມາ ສົ່ງຜົນເຮັດໃຫ້ຝ່າຍລັດຖະບານຊີຣີ ສາມາດເຂົ້າປົດປ່ອຍພື້ນທີ່ໄດ້ກວ່າ 75% ຂອງເມືອງອະເລບໂປແລ້ວ.
ດ້ານສະພາແກນນຳຂອງຝ່າຍກະບົດຢູ່ເມືອງອະເລບໂປ ໄດ້ອອກມາຮຽກຮ້ອງໃຫ້ມີການຢຸດຍິງ ເພື່ອມະນຸດສະທຳໃນເມືອງອະເລບໂປ ເປັນເວລາ 5 ມື້ ແລະ ຂໍໃຫ້ເປີດທາງອົບພະຍົບສຳລັບພົນລະເມືອງ ໂດຍອ້າງວ່າພົນລະເມືອງກຳລັງຕົກຢູ່ໃນອັນຕະລາຍໃຫຍ່ຫລວງ ແລະ ພວກເຂົາຈະສະໜັບສະໜູນ ຕໍ່ບັນດາມາດຕະການເພື່ອຫລຸດຜ່ອນສະພາບການລົງ, ແນວໃດກໍຕາມ ຍັງບໍ່ທັນເປັນທີ່ຊັດເຈນວ່າ ຂໍ້ຮຽກຮ້ອງດັ່ງກ່າວຈະໄດ້ຮັບການຕອບສະໜອງ ຫລື ບໍ່ ເນື່ອງຈາກກ່ອນໜ້ານີ້ ລັດຖະບານຊີຣີໄດ້ປະກາດວ່າ ຈະບໍ່ມີການຢຸດຍິງໃດໆໃນເມືອງອະເລບໂປອີກ.
ຕິດຕາມເຮົາທາງFacebook ກົດຖືກໃຈເລີຍ!