ຂປລ. ວັນທີ 7 ທັນວາ 2016 ທີ່ນະຄອນຫລວງວຽງຈັນ ທ່ານ ມິກເຮວ ບາຣານອບ (Mikhail BARANOV) ເອກອັກຄະລັດຖະທູດ ແຫ່ງ ສະຫະພັນຣັດເຊຍ ປະຈຳລາວ ໄດ້ຖະຂ່າວກ່ຽວກັບຜົນສຳເລັດຂອງການພັດທະນາ ແລະ ການຮ່ວມມືລາວ-ຣັດເຊຍ ໃນຕະຫລອດ 1 ປີຜ່ານມາ ໂດຍສະເພາະດ້ານການເມືອງ, ເສດຖະກິດ-ການຄ້າ, ມະນຸດສະທຳ , ວັດທະນະທຳ ແລະ ບັນຫາອື່ນໆທີ່ເຫັນດີຮ່ວມກັນ.
ລາວ-ສະຫະພັນຣັດເຊຍ ມີສາຍພົວພັນມິດຕະພາບ ແລະ ການຮ່ວມມື ທີ່ເປັນມູນເຊື້ອອັນດີງາມມາຕະຫລອດໄລຍະ 56 ປີ ຜ່ານມາ ເຊິ່ງພົວພັນຮ່ວມມືສອງປະເທດ ໄດ້ຮັບການເຕີບໃຫຍ່ຂະຫຍາຍຕົວ ແລະ ແຕກດອກອອກຜົນຢ່າງບໍ່ຢຸດຢັ້ງ ໄດ້ສະແດງອອກ ລະຫວ່າງການນຳຂັ້ນສູງຂອງສອງປະເທດ ໄດ້ມີການພົບປະກັນ ອັນພົ້ນເດັ່ນແມ່ນ ຂໍ້ຕົກລົງກ່ຽວກັບການຍົກເວັ້ນວີຊາ ໄປມາຫາສູ່ກັນສຳລັບໜັງສືຜ່ານແດນ (ທຳມະດາ), ຂໍ້ຕົກລົງວ່າດ້ວຍ ການຮ່ວມມືລະຫວ່າງ ພັກເອກະພາບຣັດເຊຍ ແລະ ພັກປະຊາຊົນ ປະຕິວັດລາວ, ຂໍ້ຕົກລົງວ່າດ້ວຍການປະຕິສຳພັນ ໃນຂົງເຂດການຟອກເງິນ ທີ່ມີລາຍໄດ້ຈາກການກໍອາດສະຍາກຳ ແລະ ການລະດົມທຶນຂອງພວກກໍ່ການຮ້າຍ, ການຮ່ວມມືດ້ານເສດຖະກິດ-ການຄ້າ ແລະ ໄດ້ມີການຢືນຢັນກ່ຽວກັບບູລິມະສິດ ໃນການຮ່ວມມືໃນບາງດ້ານຕື່ມອີກ ໃນນັ້ນປະກອບມີຂະແໜງໂທລະຄົມມະນາຄົມ, ພະລັງງານນ້ຳ, ການບິນພົນລະເຮືອນ, ບໍ່ແຮ່ ແລະ ການຊຸດຄົ້ນບໍ່ແຮ່ ແລະ ອື່ນໆ ນອກຈາກນັ້ນ ສະຫະພັນຣັດເຊຍ ຍັງໄດ້ສົ່ງເສີມວຽກງານການສຶກສາສຳລັບປີນີ້ ແມ່ນໄດ້ສົ່ງນັກສຶກສາລາວ ໄປສຶກສາຕໍ່ ໃນລະດັບຕ່າງໆ ຢູ່ບັນດາມະຫາວິທະຍາໄລຂອງຣັດເຊຍ ຈຳນວນ 87 ຄົນ ແລະ ມີນັກສຶກສາຈຳນວນໜຶ່ງ ໄດ້ຮຽນກຽມພາສາຣັດເຊຍ ຢູ່ສູນວິທະຍາສາດ ແລະ ວັດທະນະທຳຣັດເຊຍ ປະຈຳລາວ, ຕໍ່ກັບບັນຫາດັ່ງກ່າວ ເປັນການຢັ້ງຢືນວ່າ ລາວ-ຣັດເຊຍ ໄດ້ຮັດແໜ້ນການປະຕິສຳພັນລະຫວ່າງະຂະແໜງການຕ່າງໆ ຖືເປັນການປະກອບສ່ວນສຳຄັນ ໃນການເສີມຂະຫຍາຍສາຍພົວພັນລະຫວ່າງສອງປະເທດ ຢ່າງໜັກແໜ້ນ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!