ສຳນັກຂ່າວຕ່າງປະເທດ ລາຍງານໃນວັນທີ 7 ທັນວານີ້ວ່າ ສານອາຣັບບີ ຊາອຸດິດ ໄດ້ພິພາກສາປະຫານຊີວິດ ຜູ້ຖືກຫາ 15 ຄົນ ໃນຂໍ້ຫາກະບົດ ໂດຍກ່າວຫາວ່າ ພວກກ່ຽວມີຄວາມຜິດຖານເປັນນັກສືບສອດແນມ ໃຫ້ແກ່ລັດຖະບານອີຣ່ານ ໂດຍຜູ້ຖືກຫາທັງໝົດນີ້ ສ່ວນໃຫຍ່ແມ່ນເປັນຊາວອາຣັບບີ ຊາອຸດິດ ຈຳນວນ 13 ຄົນ ແລະ ທີ່ເຫລືອອີກ 2 ຄົນ ເປັນຊາວອີຣ່ານ ແລະ ຊາວອັບການິສະຖານ.
ການຕັດສິນຄະດີດັ່ງກ່າວນີ້ ໄດ້ສ້າງຄວາມເຄັ່ງຕຶງເພີ່ມຂຶ້ນໃນພາກພື້ນອາຊີຕາເວັນອອກກາງ ແລະ ເຮັດໃຫ້ຄວາມສຳພັນລະຫວ່າງ ອາຣັບບີ ຊາອຸດິດ ແລະ ອີຣ່ານ ຍິ່ງຕົກຕ່ຳລົງຕື່ມອີກ, ດ້ານລັດຖະບານອີຣ່ານ ໄດ້ອອກມາປະຕິເສດຂໍ້ກ່າວຫາດັ່ງກ່າວນີ້ ພ້ອມທັງຮຽກຮ້ອງໃຫ້ອາຣັບບີ ຊາອຸດິດ ຢ່າກ່າວຫາອີຣ່ານແບບລອຍໆ ເພື່ອຫວັງຜົນປະໂຫຍດທາງການເມືອງ ແລະ ເພີ່ມທະວີຄວາມເຄັ່ງຕຶງພາຍໃນພາກພື້ນ.
ດ້ານອົງການນິລະໂທດສະກຳສາກົນ (Amnesty International – AI) ໄດ້ອອກມາກ່າວປະນາມ ຄຳຕັດສິນປະຫານຊີວິດ ໃນມື້ວານນີ້ (6 ທັນວາ) ວ່າ ການຕັດສິນດັ່ງກ່າວ ເປັນການເຢາະເຢີ້ຍຄວາມຍຸຕິທຳ ແລະ ລະເມີດຫລັກສິດທິມະນຸດຢ່າງຮຸນແຮງ.
ຕິດຕາມເຮົາທາງFacebook ກົດຖືກໃຈເລີຍ!