ຂປລ. ຈາກປະລິມານການບໍລິໂພກ ຜະລິດຕະພັນຂອງ ບໍລິສັດ ເບຍລາວຈຳກັດ ທີ່ນັບມື້ເພີ່ມຂຶ້ນທຸກປີ ໂດຍເລີ່ມແຕ່ກໍໍ່ຕັ້ງບໍລິສັດ ຈົນມາເຖິງປັດຈຸບັນ ລວມແລ້ວ 40 ກ່ວາປີ ແລະ ຍ້ອນຄວາມເຊື່ອໜັ້ນຂອງສັງຄົມ ສະເພາະທຸລະກິດ ໂດຍລວມຍັງເຕີບໂຕຢ່າງເຂັ້ມແຂງ ທັງໄດ້ກາຍເປັນບໍລິສັດຊັ້ນນຳຂອງ ສປປ ລາວ ທີ່ມີຕົວແທນຈຳໝ່າຍ 18 ປະເທດໃນທົ່ວໂລກ.
ທ່ານ ສູນທອນ ພົມມະຈັກ ຜູ້ອຳນວຍການໃຫ່ຍ ບໍລິສັດ ເບຍລາວ ຈຳກັດ ໃຫ້ຮູ້ວ່າ: ເບຍລາວ ແມ່ນຜະລິດຕະພັນຂອງ ບໍລິສັດ ເບຍລາວ ຈຳກັດ ເພື່ອຈຳໝ່າຍພາຍໃນ ແລະ ຕ່າງປະເທດ ໂດຍ ບໍລິສັດ ເບຍລາວ ຈຳກັດ ໄດ້ຮັບການສ້າງຕັ້ງຂຶ້ນ ໃນຊຸມປີ 1973 ໂດຍການຮ່ວມທືນ ລະຫວ່າງ ນັກທຸລະກິດລາວ-ຝຣັ່ງ ໃນເວລານັ້ນໄດ້ໃຊ້ຊື່ວ່າ (ໂຮງງານເຫລົ້າເບຍ ແລະ ນໍ້າກ້ອນລາວ) ປະສິດຕິພາບ ໃນການຜະລິດເບຍ ແມ່ນ 3 ລ້ານລິດ/ປີ ພາຍຫລັງປະເທດຊາດໄດ້ຮັບການປົດປ່ອຍຢ່າງສົມບູນ ໃນປີ 1975 ໂຮງງານດັ່ງກ່າວ ໄດ້ຖຶກໂອນເປັນກຳມະສິດຂອງລັດຖະບານ. ຕໍ່ມາປີ 1993 ບໍລິສັດໄດ້ເລີ່ມຮ່ວມທືນກັບບໍລິສັດຈາກຕ່າງປະເທດ ແລະ ສາມາດຜະລິດເບຍໄດ້ 20 ລ້ານລິດ/ປີ, ຕົກມາປີ 1997 ບໍລິສັດໄດ້ເລີ່ມມີການສົ່ງອອກ, ຈົນມາເຖິງ ປີ 2002 ບໍລິສັດ ກໍໄດ້ ເຊັນສັນຍາຮ່ວມທືນກັບ ບໍລິສັດ ຄາລສະເບີກ ບຣິເວີລີ ຈາກປະເທດດານມາກ ຖືຮຸ້ນ 50% ແລະ ລັດຖະບານລາວ ຖືຮຸ້ນ 50% ໂດຍມີກຳລັງການຜະລິດ 120 ລ້ານລິດ/ປີ.
ການຜະລິດສິນຄ້າຂອງ ບໍລິສັດ ເບຍລາວ ຈຳກັດ ພາຍຫລັງອອກສູ່ຕະຫລາດ ແມ່ນໄດ້ຮັບການຕອບຮັບເປັນຢ່າງດີຈາກສັງຄົມ ດ້ວຍຄວາມເຊື່ອໜັ້ນ ແລະ ຊົມໃຊ້ຜະລິດຕະພັນທີ່ເປັນຂອງຄົນລາວຫລາຍຂຶ້ນ ຈຶ່ງເຮັດໃຫ້ການດຳເນີນທຸລະກິດຂອງບໍລິສັດ ຕ້ອງໄດ້ເພີ່ມກຳລັງການຜະລິດໃຫ້ພຽງພໍກັບການຊົມໃຊ້. ດັ່ງນັ້ນ, ມາຮອດປີ 2008 ບໍລິສັດ ຈຶ່ງໄດ້ສ້າງຕັ້ງໂຮງງານແຫ່ງທີ 2 ຂຶ້ນທີ່ ແຂວງຈຳປາສັກ ແລະ ສາມາດຜະລິດເບຍໄດ້ 180ລ້ານລິດ/ປີ ພ້ອມດຽວກັນນັ້ນ ເພື່ອເພີ່ມທາງເລືອກໃຫ້ກັບລູກຄ້າຫລາຍຂຶ້ນ ທາງບໍລິສັດ ກໍໄດ້ໂຮມໂຕກັບ ບໍລິສັດ ນໍ້າຫວານລາວ ຈຳກັດ ແລະ ດຳເນີນທຸລະກິດພາຍໃຕ້ຊື່ຂອງ ບໍລິສັດ ເບຍລາວ ຈຳກັດ ໃນປີ 2011 ໂດຍທີ່ ບໍລິສັດ ຄາລສະເບີກ ບຣິເວີລີ ຈາກປະເທດດານມາກ ຖືຮຸ້ນ 51% ແລະລັດຖະບານລາວ ຖືຮຸ້ນ 49% ດ້ວຍກຳລັງການຜະລິດເບຍ 220 ລ້ານລິດ/ປີ ຄຽງຄູ່ກັບການຜະລິດນັ້ນ ຕະຫລາດຄວາມຕ້ອງການກໍເພີ່ມຂຶ້ນເຊັ່ນດຽວກັນ. ຕົກມາຮອດປີ 2012 ບໍລິສັດ ຈຶ່ງໄດ້ເພີ່ມກຳລັງການຜະລິດຂອງເບຍໃຫ້ເປັນ 340 ລ້ານລິດ/ປີ, ນໍ້າອັດລົມ 70 ລ້ານລິດ/ປີ ແລະ ນໍ້າດື່ມ 180ລ້ານລິດ/ປີ ເພື່ອໃຫ້ພຽງພໍກັບຄວາມຕ້ອງການຂອງສັງຄົມ.
ທ່ານ ສູນທອນ ພົມມະຈັກ ໃຫ້ຮູ້ຕື່ມວ່າ: ມາຮອດປັດຈຸບັນ ບໍລິສັດຂອງພວກເຮົາ ຖືເປັນບໍລິສັດໜຶ່ງທີ່ເປັນມືອາຊີບ ຈາກໃນເມື່ອກ່ອນ ພຽງແຕ່ລາວເຮັດລາວໄດ້ລາວໃຊ້ລາວຈະເລີນ ແຕ່ດຽວນີ້ ພວກເຮົາມີທີມງານທີ່ເປັນມືອາຊີບ, ມີທີ່ປຶກສາຈາກຕ່າງປະເທດ ຫລາຍກວ່າ 9 ສັນຊາດ ນອກນັ້ນ ເບຍລາວ ຍັງໄດ້ກາຍເປັນທູດກໍຄືຜະລິດຕະພັນລາວ ທີ່ເປັນໜາກຫົວໃຈຂອງຄົນລາວໃນການ ສົ່ງອອກໄປຕ່າງປະເທດ ເຊິ່ງມີທັງໜົດ 18 ປະເທດໃນໂລກ ເປັນຕົ້ນແມ່ນປະເທດອັງກິດ, ການາດາ, ສປ ຈີນ ແລະ ອື່ນໆເປັນຕົ້ນ. ພ້ອມນີ້, ເບຍລາວຍັງໄດ້ຮັບສາຍຍານາມວ່າ: ເປັນເບຍທ້ອງຖີ່ນທີ່ມີຄົນນິຍົມຫລາຍ ແລະ ຍັງໄດ້ອອກວາລະສານຫລາຍສຳນັກ, ສ່ວນການຂະຫຍາຍຕົວຂອງທຸລະກິດ ໃນປີ 2015-2016 ຢູ່ໃນລະດັບ 4% ສ່ວນນໍ້າດື່ມຂະຫຍາຍຕົວ 14% ອັນນີ້ກໍແມ່ນອີກໜາກຜົນໜື່ງ ທີ່ເຮັດໃຫ້ບໍລິສັດປະສົບຜົນສຳເລັດທາງດ້ານທຸລະກິດ ໂດຍສະເພາະ 10 ເດືອນຂອງປີ 2016 ນີ້.
ເບຍລາວ ນອກຈາກຈະເອົາໃຈໃສ່ຜະລິດສິນຄ້າທີ່ມີຄຸນນະພາບແລ້ວ. ຍັງໄດ້ມອບພັນທະໃຫ້ກັບລັດຖະບານ ຢ່າງເຕັມເມັດເຕັມໜ່ວຍ ແລະ ຍັງໄດ້ໃຫ້ການຊ່ວຍເຫລືອສັງຄົມ ໂດຍກຳນົດວົງເງິນສະເພາະໃນແຕ່ລະປີ ສຳຄັນກວ່າໝູ່ແມ່ນສຸມໃສ່ ວຽກງານການສຶກສາ, ສາທາລະນະສຸກ ແລະ ວຽກງານຈາລາຈອນ ປູກຈິດສຳນຶກແກ່ການຂັບຂີ່ ໂດຍການຮ່ວມມືກັບເຈົ້າໜ້າທີ່ ຈາລະຈອນຢ່າງ ເປັນປົກກະຕິ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!