ໃນຕອນເຊົ້າຂອງວັນທີ 1 ທັນວາ 2016 ນີ້ກອງບັນຊາການ ປກສ ແຂວງວຽງຈັນ ໄດ້ປະກາດການເລື່ອນຊັ້ນໃຫ້ນາຍຕຳຫຼວດທີ່ ຂຶ້ນກັບກອງບັນຊາການ ປກສ ແຂວງ ວຽງຈັນທີມີຜົນງານດີເດັ່ນ, ມີຄວາມຫ້າວຫັນເຮັດສຳເລັດໜ້າທີ່ວຽກງານທີ່ການຈັດຕັ້ງຂັ້ນເທິງມອບໝາຍໃຫ້ ແລະ ຄົບມາດຖານເງື່ອນໄຂເລື່ອນຊັ້ນໂດຍພາຍໃຕ້ການເປັນປະທານຂອງທ່ານ ທອງ ເຄນ ບູນໝັ້ນເລຂາຄະນະພັກຫົວໜ້າກອງບັນຊາການ ປກສ ແຂວງວຽງຈັນ ມີຄະນະພັກ-ຄະນະກອງບັນຊາການ, ບັນດາສະຫາຍຕາງໜ້າຫ້ອງ, ກອງພັນ, ຄ້າຍຄຸມຂັງ ດັດສ້າງ, ກອງບັນຊາການ ປກສ ເມືອງ ພ້ອມດ້ວຍນາຍຕຳຫຼວດທີ່ໄດ້ຮັບການເລື່ອນຊັ້ນເຂົ້າຮ່ວມຢ່າງພ້ອມພຽງ.
ທ່ານ ສົມຄິດ ດວງພະຈັນ ຮອງຫົວໜ້າກອງບັນຊາການ ປກສ ແຂວງວຽງຈັນຂຶ້ນຜ່ານຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບວ່າດ້ວຍການເລື່ອນຊັ້ນໃຫ້ນາຍຕຳຫຼວດກອງບັນຊາການ ປກສ ແຂວງ ວຽງຈັນທີ່ມີມາດຖານເງື່ອນໄຂຄົບຖ້ວນໃນການເລື່ອນຊັ້ນນາຍຕຳຫຼວດທີ່ໄດ້ຮັບການເລື່ອນຊັ້ນໃນຄັ້ງນີ້ມີທັງໝົດ 101 ສະຫາຍຍິງ 14 ສະຫາຍໃນນີ້ເລື່ອນຊັ້ນຂັ້ນພັນຕີຂຶ້ນພັນໂທຈຳນວນ 8 ສະຫາຍ, ຮ້ອຍເອກຂຶ້ນພັນຕີຈຳນວນ 44 ສະຫາຍ, ຍິງ 6 ສະຫາຍ, ຮ້ອຍໂທຂຶ້ນຮ້ອຍເອກຈຳນວນ 49 ສະຫາຍ, ຍິງ 8 ສະຫາຍ, ຜູ້ທີ່ໄດ້ຮັບການເລື່ອນຊັ້ນຄັ້ງນີ້ລ້ວນແລ້ວແຕ່ໄດ້ຜ່ານການຝຶກຝົນຫຼໍ່ຫຼອມຕົນເອງດ້ານຄຸນສົມບັດ, ຄວາມຮູ້-ຄວາມສາມາດ, ມີຜົນງານດີ, ມີຄວາມຫ້າວຫັນເຮັດສຳເລັດໜ້າທີ່ວຽກງານຕາມການຈັດຕັ້ງຂັ້ນເທິງມອບໝາຍໃຫ້ ແລະ ຄົບມາດຖານເງື່ອນໄຂເລື່ອນຊັ້ນ.
ໃຫ້ກຽດຂຶ້ນປະດັບຊັ້ນຂັ້ນນາຍພັນໂດຍແມ່ນ ທ່ານ ທອງເຄນ ບູນໝັ້ນ ເລຂາຄະນະພັກ ຫົວໜ້າກອງບັນຊາການ ປກສ ແຂວງ ວຽງຈັນ, ຂຶ້ນປະດັບຊັ້ນຂັ້ນນາຍຮ້ອຍແມ່ນທ່ານ ບູນຊູ ພົງສະຫວັດ ມີໄຊ ຮອງຫົວໜ້າກອງບັນຊາ ການ ປກສ ແຂວງວຽງຈັນ.
ຕອນທ້າຍພິທີທ່ານ ທອງເຄນ ບູນໝັ້ນ ໄດ້ໃຫ້ກຽດຂຶ້ນໂອ້ລົມ ນາຍຕຳຫຼວດທີ່ໄດ້ຮັບການເລື່ອນຊັ້ນຄັ້ງນີ້ຢ່າງມີເນື້ອໃນຄວາມໝາຍເລິກເຊິ່ງເພື່ອນຳໄປສຶກສາຄົ້ນຄວ້າ ແລະຈັດຕັ້ງປະຕິບັດເຂົ້າໃນໜ້າທີ່ວຽກງານຕົວຈິງໃຫ້ເກີດດອກອອກຜົນ ແລະ ມີຜົນງານຍິ່ງໃຫຍ່ຂຶ້ນກວ່າເກົ່າທັງນີ້ກໍເພື່ອເຮັດໃຫ້ກຳລັງປ້ອງກັນຄວາມສະຫງົບມີການເຕີບໃຫຍ່ຂະຫຍາຍຕົວ, ມີຄວາມເຂັ້ມແຂງຂຶ້ນເລື້ອຍໆຈາກນັ້ນກໍໃດ້ຮຽກຮ້ອງໃຫ້ນາຍຕຳຫຼວດທີ່ໄດ້ຮັບການເລື່ອນຊັ້ນໃໝ່ຈົ່ງຍົກສູງຄວາມຮັບຜິດຊອບຕໍ່ໜ້າທີ່ວຽກງານຂອງຕົນໃຫ້ຫຼາຍ ຂຶ້ນກວ່າເກົ່າ, ຮັກສາມູນເຊື້ອອັນດີງາມນີ້ໄວ້ໃຫ້ໝັ້ນຄົງຕະຫຼອດໄປເພື່ອພ້ອມກັນເຮັດສຳເລັດໜ້າທີ່ຕາມ ທີ່ພັກ-ລັດ ແລະປະຊາຊົນມອບໝາຍໃຫ້.
ຂ່າວຈາກ: ໜັງສືພິມ ເສດຖະກິດ-ສັງຄົມ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!