ວັນທີ 6 ທັນວາ ປີ 1992 ຫຼືມື້ນີ້ເມື່ອ 24 ປີທີ່ແລ້ວ ເປັນມື້ວາງຈຳໜ່າຍຂອງເກມ Final Fantasy V (FF5) ເທິງເຄື່ອງ Super Famicom ທີ່ປະເທດຍີ່ປຸ່ນ. ໂດຍພາກ 5 ນີ້ ທ່ານ ຮິໂຣໂນບຸ ຊາຄາກຸຈິ (Hironobu Sakaguchi) ຜູ້ໃຫ້ກຳເນີດຊີຣີກໍໄດ້ມາຮັບໜ້າທີ່ເປັນໄດເຣັກເຕີ້ເຊັ່ນເຄີຍ ແລະເຈົ້າໂຕຍັງເປັນຜູ້ຂຽນເນື້ອເລື່ອງຮ່ວມກັບ ທ່ານ ໂຢຊິໂນຣິ ຄິຕາເສະ (Yoshinori Kitase) ທີ່ເປັນໄດເຣັກເຕີ້ຂອງພາກ 6-8 ໃນພາຍຫຼັງອີກນຳ. ເຊິ່ງຄວາມນິຍົມທີ່ມີຢ່າງເຫຼືອລົ້ນໃນພາກນີ້ກໍສົ່ງຜົນໃຫ້ໂຕເກມມີການພອຣ໌ດລົງສູ່ເຄື່ອງ PS1 ແລະຣີເມກລົງເຄື່ອງ Game Boy Advance. 

ທາງດ້ານເນື້ອເລື່ອງຂອງ FF5 ຈະກ່າວເຖິງ ບາດຊ໌ (Bartz) ໜຸ່ມພະເນຈອນທີ່ບັງເອີນໄດ້ເຫັນອຸກະບາດຕົກລົງສູ່ພື້ນໂລກໃກ້ຈຸດທີ່ຕົນເອງຢູ່ ແລະເມື່ອໄປເຖິງບ່ອນເກີດເຫດລາວກໍໄດ້ພົບກັບ ເລນນ້າ (Lenna) ແລະ ກາລັບ (Galuf) ສອງໂຕລະຄອນທີ່ໄດ້ມາເປັນໝູ່ຮ່ວມປະຈົນໄພຂອງບາດຊ໌, ໃນລະຫວ່າງການເດີນທາງ ບາດຊ໌ກໍໄດ້ຮັບຮູ້ວ່າເທິງໂລກໃບນີ້ຖືກຄ້ຳຈູນດ້ວຍພະລັງຈາກຄຣິສຕັລທັງ 4 ທີ່ກະຈາຍຢູ່ຕາມສະຖານທີ່ຕ່າງໆ ແລະພະລັງຄຣິສຕັລດັ່ງກ່າວກໍຍັງຄອຍຜະນຶກຈອມມານສຸດຊົ່ວຮ້າຍທີ່ມີຊື່ວ່າ: ເອັກເດດ (Exdeath) ເອົາໄວ້ອີກນຳ. ເຊິ່ງກຸ່ມຂອງບາດຊ໌ກໍຕ້ອງຄອຍຄຸ້ມກັນບໍ່ໃຫ້ຄຣິສຕັລຖືກທຳລາຍ ໂດຍລູກນ້ອງຂອງເອັກເດດເພື່ອຄົງຄວາມສະຫງົບສຸກຂອງໂລກເອົາໄວ້.  

ໃນດ້ານລະບົບສະເພາະຂອງພາກ 5 ແມ່ນ: “ລະບົບປ່ຽນອາຊີບ (Job System)” ທີ່ເປັນການນຳເອົາລະບົບອາຊີບຂອງພາກ 3 ມາປັບປຸງແລະຕໍ່ຍອດໃຫ້ມີຄວາມຫຼາກຫຼາຍກວ່າເກົ່າ, ໂດຍແຕ່ລະອາຊີບກໍຈະມີການເກັບເລເວວອາຊີບເຂົ້າມາເຊິ່ງເມື່ອຜູ້ຫຼິ້ນອັບເລເວວອາຊີບໄດ້ແຕ່ລະຂັ້ນກໍຈະໄດ້ອະບິລິຕີ້ຂອງອາຊີບນັ້ນມາຢ່າງໜຶ່ງ. ນອກນີ້ຜູ້ຫຼິ້ນຍັງສາມາດນຳເອົາອະບິລິຕີ້ຂອງອາຊີບທີ່ໄດ້ມາຈາກອາຊີບໜຶ່ງໄປໃຊ້ຄວບຄູ່ກັບການຫຼິ້ນອາຊີບອື່ນໄດ້ນຳ. ສຳລັບການເກັບເລເວວອາຊີບນັ້ນກໍຄືການປາບສັດຕູຕາມທາງຄືກັບການເກັບ EXP ທົ່ວໄປນັ້ນເອງ. ທັງນີ້ ໃນເວີຊັ່ນ Super Famicom ຈະມີອາຊີບໃຫ້ເລືອກໃຊ້ເຖິງ 22 ອາຊີບກັນເລີຍ ໂດຍອາຊີບເລີ່ມຕົ້ນແມ່ນ Freelancer ແລະຕ້ອງດຳເນີນເນື້ອເລື່ອງໄປເລື້ອຍໆ ເພື່ອຫາເກັບຄຣິສຕັລອາຊີບໃໝ່ໆຈຶ່ງຈະສາມາດປ່ຽນເປັນອາຊີບອື່ນໄດ້. 

Fact ເລັກນ້ອຍກ່ຽວກັບເກມ Final Fantasy V

• FF5 ເວີຊັ່ນ Super Famicom ສາມາດເຮັດຍອດຂາຍໃນຍີ່ປຸ່ນໄປໄດ້ເຖິງ 2.45 ລ້ານຊຸດ ໂດຍໃນຈຳນວນນັ້ນເປັນຍອດຂາຍພາຍໃນ 2 ເດືອນທຳອິດຂອງການວາງຈຳໜ່າຍສູງເຖິງ 2 ລ້ານຊຸດ, ສ່ວນເວີຊັ່ນຣີເມກເທິງ Game Boy Advance ສາມາດຂາຍໄດ້ 260,000 ຊຸດ ແລະເວີຊັ່ນພອຣ໌ດລົງ PS1 ກໍຂາຍໃນສະຫະລັດອາເມຣິກາໄປໄດ້ປະມານ 364,000 ຊຸດ. 

• ເທິງແພລັດຟອຣ໌ມ Super Famicom ຂອງ FF5 ນັ້ນບໍ່ມີການເຮັດເປັນເວີຊັ່ນພາສາອັງກິດຢ່າງເປັນທາງການ ແຕ່ກໍຍັງມີແຟນເກມໄດ້ໄປດັດແປງໄຟລ໌ Rom ຂອງເກມເພື່ອໃຊ້ຫຼິ້ນເທິງອີມູເລເຕີ້ (…)

• 2 ວາຍຮ້າຍຂອງເກມທີ່ຊື່ວ່າ: ກິວກາເມດ (Gilgamesh) ແລະ ເອນຄິດູ (Enkidu) ເປັນການນຳຊື່ມາຈາກຕຳນານວິລະບູລຸດໃນຍຸກບູຮານຂອງອານາຈັກບາບີໂລນ (Babylon), ໂດຍບົດກະວີຂອງຊາວບາບິໂລນທີ່ມີຊື່ວ່າ: “Poem of Gilgamesh” ກໍຖືກຍົກໃຫ້ເປັນ 1 ໃນບົດປະພັນໃນຍຸກບູຮານທີ່ຊົງຄຸນຄ່າທີ່ສຸດອັນໜຶ່ງຂອງໂລກ. 

• ຕອນທີ່ສູ້ກັບອະສູນຄາຣ໌ບັງເຄິນ (Carbuncle) ໃນປະສາດເອັກເດດຈະມີບັ໊ກຢູ່ຢ່າງໜຶ່ງຄື: ຫາກຜູ້ຫຼິ້ນມີໂຕລະຄອນໃນປາຣ໌ຕີ້ທີ່ເປັນອາຊີບ Mystic Knight (ນັກດາບເວດມົນ) ກໍໃຫ້ໃຊ້ເວດ Firaga ຫຼື Fire 3 ໃສ່ໂຕເອງກ່ອນ ຈາກນັ້ນກໍໃຊ້ດາບເວດ Firaga ຫຼື Fire 3 ຟັນໃສ່ຄາຣ໌ບັງເຄິນມັນຈະຕາຍໃນດາບດຽວທັນທີ. 

• ຊ່ວງທ້າຍຂອງເກມ ກ່ອນທີ່ເຮົາຈະສູ້ກັບບອສທີ່ຊື່ຄາແທສໂທຣພີ (Catastrophe) ໃຫ້ໂຕລະຄອນຂອງເຮົາໂຕໃດໂຕໜຶ່ງໃສ່ແຫວນ Wall Ring ເອົາໄວ້ ຈາກນັ້ນກໍໃຫ້ໃຊ້ເວດ Float ໃສ່ໂຕລະຄອນໂຕນັ້ນແລ້ວຈຶ່ງເຂົ້າຕໍ່ສູ້ກັບມັນເຊິ່ງມັນຈະເປັນບັ໊ກຄື: ຖ້າມີໂຕລະຄອນຂອງເຮົາໂຕໜຶ່ງຢູ່ໃນສະຖານະ Float ມັນຈະໃຊ້ແຕ່ທ່າ Gravity 100 ໂຈມຕີໃສ່ແຕ່ໂຕລະຄອນໂຕນັ້ນ ແລະຖ້າໂຕລະຄອນໂຕນັ້ນໃສ່ແຫວນ Wall Ring ຢູ່ນຳ ກໍຈະເປັນການສະທ້ອນທ່າ Gravity 100 ກັບໄປຫາມັນ ເຊິ່ງຈະວົນລູບແບບນີ້ຈົນມັນຖືກທ່າຂອງມັນຕາຍເອງ (ແຕ່ແນະນຳໃຊ້ມວຍລຸມຕີດີກວ່າຈຶ່ງຕາຍໄວ ^^)

ສຳລັບທ່ານໃດທີ່ຮັກໃນການອ່ານຂ່າວໄອທີ, ເກມ ແລະ ອະນິເມະ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!

ທີ່ມາ: online station