ເນື່ອງໃນໂອກາດງານບຸນປີໃໝ່ ຂອງປະຊາຊົນລາວບັນດາເຜົ່າ ໄດ້ວຽນມາບັນຈົບຄົບຮອບອີກວາລະໜຶ່ງ ເຊິ່ງພີ່ນ້ອງບັນດາຊົນເຜົ່າເຄີຍປະຕິບັດກັນມາເປັນເວລາດົນນານ ແລະ ກໍເປັນໄລຍະເວລາທີ່ພີ່ນ້ອງປະຊາຊົນລາວບັນດາຊົນເຜົ່າທົ່ວປະເທດ ພວມເບີກບານມ່ວນຊື່ນນຳຜົນສຳເລັດຂອງການສ້າງສາ ແລະ ພັດທະນາຄອບຄົວໃນ 1 ປີຜ່ານມາ ແລະ ການຈັດຕັ້ງຜັນຂະຫຍາຍມະຕິກອງປະຊຸມໃຫ່ຍຄັ້ງທີ X ຂອງພັກຢ່າງເປັນຂະບວນຟົດຟື້ນ ທັງແມ່ນໂອກາດທີ່ທົ່ວພັກ-ລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວເຮົາພວມສະເຫລີມສະຫລອງວັນສະຖາປະນາ ສປປ.ລາວ ຄົບຮອບ 41 ປີ, ວັນຄ້າຍວັນເກີດຂອງທ່ານປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວ ຄົບຮອບ 96 ປີ ແລະ ວັນສຳຄັນຕ່າງໆຂອງຊາດລາວເຮົາ.

ໃນວັນທີ 01 ທັນວາ 2016ຜ່ານມາ ທີ່ສູນກາງແນວລາວສ້າງຊາດ ນະຄອນຫລວງວຽງຈັນ ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານແນວລາວສ້າງຊາດ ຕາງໜ້າພັກ-ລັດຖະບານ ແລະ ສູນກາງແນວລາວສ້າງຊາດ ສະແດງຄວາມປິຕິຍິນດີ ແລະ ຝາກຄຳຢື້ຢາມຖາມຂ່າວອັນສະໜິດສະໜົມ ແລະ ອົບອຸ່ນມາຍັງພີ່ນ້ອງປະຊາຊົນລາວບັນດາຊົນເຜົ່າໃນທົ່ວປະເທດ ພີ່ນ້ອງຄົນລາວທີ່ດຳລົງຊີວິດ ແລະ ທຳມາຫາກິນຢູ່ຕ່າງປະເທດ ພ້ອມດ້ວຍຊາວຕ່າງດ້າວທີ່ດຳລົງຊີວິດຢູ່ ສປປ ລາວ.

ປະເທດລາວປະກອບດ້ວຍຫລາຍຊົນເຜົ່າທີ່ດຳລົງຊີວິດຢູ່ຮ່ວມກັນແຕ່ເໜືອຮອດໃຕ້ ມີມູນເຊື້ອສາມັກຄີປອງດອງ ຊ່ອຍເຫລືອເຊິ່ງກັນ ແລະ ກັນ ມີພື້ນຖານດ້ານເສດຖະກິດ-ສັງຄົມຮ່ວມກັນ ມີວັດທະນະທຳລາວເປັນວັດທະນະທຳຮວມຂອງບັນດາຊົນເຜົ່າ ມີພາສາລາວເປັນພາສາກາງ ແລະ ມີໂຕໜັງສືລາວເປັນໂຕໜັງສືທາງການ ຄຽງຄູ່ກັບການຮັກສາເອກະລັກຂອງບັນດາຊົນເຜົ່າ ເປັນຕົ້ນແມ່ນພາສາປາກເວົ້າ ວິຖີການດຳລົງຊີວິດ ແລະ ຂະໜົບທຳນຽມ ຮີດຄອງປະເພນີອັນດີງາມ ຄວາມເຊື່ອຖື ແລະ ອື່ນໆ ເຊິ່ງເຄີຍມີມານັບເປັນເວລາເຫິງນານ.

ພັກ ແລະ ລັດຖະບານ ແຫ່ງ ສປປ ລາວ ຍາມໃດກໍຖືສຳຄັນ ແລະ ໃຫ້ຄວາມເຄົາລົບນັບຖືພີ່ນ້ອງບັນດາຊົນເຜົ່າທີ່ໄດ້ປະກອບສ່ວນອັນສຳຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕາມແນວທາງນະໂຍບາຍຂອງພັກ-ລັດ ເຮັດໃຫ້ປະຊາຊົນເຮົາເຕີບໃຫ່ຍຂະຫຍາຍໂຕ ການພັດທະນາເສດຖະກິດ-ສັງຄົມ ມີຜົນສຳເລັດໃໝ່ໃຫ່ຍຫລວງ ແລະ ຕໍ່ເນື່ອງ ລະດັບຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງພີ່ນ້ອງປະຊາຊົນລາວບັນດາຊົນເຜົ່າສູງຂຶ້ນ ຄອບຄົວທຸກຍາກນັບມື້ນັບຫລຸດໜ້ອຍຖອຍລົງ ແລະ ເຮັດໃຫ້ຄວາມຫລຸດໂຕນກັນໃນດ້ານຕ່າງໆຂອງປະຊາຊົນລາວບັນດາຊົນເຜົ່າໄດ້ຫຍັບມໍ່ເຂົ້າຫາກັນເທື່ອລະກ້າວ ໃນນາມຕາງໜ້າໃຫ້ແນວລາວສ້າງຊາດທຸກຂັ້ນ ຈິ່ງຮຽກຮ້ອງມາຍັງປະຊາຊົນລາວບັນດາຊົນເຜົ່າຈົ່ງເຊີດຊູນ້ຳໃຈຮັກຊາດ ຮັກລະບອບປະຊາທິປະໄຕປະຊາຊົນ ເສີມຂະຫຽາຍສິດເປັນເຈົ້າຂອງປະເທດຊາດ ເພີ່ມທະວີຄວາມເປັນເຈົ້າຕົນເອງ ລຶບລ້າງແນວຄິດຄັບແຄບ ຕີໂຕຕ່ຳ ຫລື ຕີໂຕສູງ ໝິ່ນປະໝາດຊົນເຜົ່າອື່ນ ຕ້ານທຸກແນວຄິດ ແລະ ການກະທຳທີ່ເປັນການແບ່ງແຍກຄວາມສາມັກຄີ ແລະ ຄວາມສະເໝີພາບລະຫວ່າງຊົນເຜົ່າ ພ້ອມກັນຍົກສູງສະຕິລະວັງໂຕ ຕອບຕ້ານກົນອຸບາຍທີ່ຫວັງມ້າງເພທຳລາຍປະເທດເຮົາ. ຂອງພວກອິດທິກຳລັງປໍລະປັກ ແລະ ພວກຄົນທີ່ບໍ່ຫວັງດີ ຈົ່ງເປັນເຈົ້າການປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງບ້ານເມືອງ ເພີ່ມທະວີຄວາມສາມັກຄີປອງດອງໃຫ້ແໜ້ນແຟ້ນກວ່າເກົ່າ ອອກແຮງບຸກທະລຸໃນການແກ້ໄຂສິ່ງຫຍໍ້ທໍ້ທີ່ກົດໜ່ວງຕໍ່ການພັດທະນາ ປະຕິບັດ 2 ໜ້າທີ່ຍຸດທະສາດໃຫ້ສຳເລັດຜົນ ໂດຍສະເພາະແມ່ນສຸມໃສ່ຈັດຕັ້ງປະຕິບັດຂະບວນການ 3 ສ້າງຄື ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ປະຕິບັດນະໂຍບາຍເຕົ້າໂຮມບ້ານນ້ອຍໃຫ້ກາຍເປັນບ້ານໃຫ່ຍ ສ້າງບ້ານໃຫ່ຍໃຫ້ກາຍເປັນໂຕເມືອງນ້ອຍຢູ່ຊົນນະບົດ ໂດຍຕິດພັນກັບການສ້າງຂະບວນການແຂ່ງຂັນຮັກຊາດ ແລະ ພັດທະນາ ໃຫ້ມີຄວາມຟົດຟື້ນກວ້າງຂວາງ ໄດ້ຮັບຜົນດີ ມີຊີວິດຊີວາ ເອົາໃຈໃສ່ປົກປັກຮັກສາ ແລະ ເສີມຂະຫຍາຍເອກະລັກວັດທະນະທໍາ ຮີດຄອງປະເພນີອັນດີງາມຂອງຊາດ ແລະ ຂອງບັນດາຊົນເຜົ່າ ພັດທະນາເສດຖະກິດ-ສັງຄົມຕິດພັນກັບການປົກປັກຮັກສາສິ່ງແວດລ້ອມ ໃນສະເພາະໜ້າກໍຈົ່ງຕັ້ງໜ້າສ້າງແຕ່ລະຄອບຄົວໃຫ້ເປັນຄອບຄົວທີ່ມີຄວາມສາມັກຄີ ເປັນຄອບຄົວພັດທະນາ ແລະ ສ້າງບ້ານໃຫ້ເປັນບ້ານທີ່ເຕົ້າໂຮມຄວາມສາມັກຄີຢ່າງໜັກແໜ້ນເຂັ້ມແຂງ ເຊິ່ງກໍມີຫລາຍບ້ານໄດ້ເຮັດສຳເລັດແຜນການກາຍເປັນບ້ານທີ່ໄດ້ຮັບການປະກາດ ຫລື ພວມສູ້ຊົນປະຕິບັດແຜນການສ້າງບ້ານວັດທະນະທຳ ບ້ານແບບຢ່າງດ້ານສາທາລະນະສຸກ ບ້ານປອດຄະດີ ບ້ານປອດຢາເສບຕິດ ບ້ານປ້ອມໝັ້ນສູ້ຮົບທີ່ມີຄວາມເຂັ້ມແຂງ ແລະ ບ້ານພັດທະນາ ເປັນບາດລ້ຽວປະຫວັດສາດທີ່ມີຄວາມໝາຍສໍາຄັນທີ່ສຸດ ແລະ ຕັດສິນຕໍ່ກັບການສ້າງສາພັດທະນາພາປະເທດຊາດໃຫ້ຫລຸດພົ້ນຈາກຄວາມດ້ອຍພັດທະນາ ແລະ ຄອບຄົວໃຫ້ພົ້ນຈາກຄວາມທຸກຍາກ.
ເນື່ອງໃນໂອກາດອັນເປັນລືກງາມຍາມດີ ແລະ ມີຄວາມໝາຍສຳຄັນຕາມປະເພນີຂອງປະຊາຊົນລາວບັນດາຊົນເຜົ່າພວກເຮົາໃນປີນີ້ ຕາງໜ້າໃຫ້ແກ່ອົງການຈັດຕັ້ງພັກ-ລັດ ສູນກາງແນວລາວສ້າງຊາດ ແລະ ໃນນາມສ່ວນໂຕ ຂໍອວຍພອນໄຊອັນປະເສີດໃຫ້ພີ່ນ້ອງປະຊາຊົນລາວບັນດາເຜົ່າ ວິລະຊົນແຫ່ງຊາດ ນັກຮົບແຂ່ງຂັນ ຄອບຄົວພະນັກງານ ສະມາຊິກພັກ ທະຫານ ຕຳຫລວດ ຜູ້ຊົງຄຸນວຸດທິຂອງບັນດາຊົນເຜົ່າໃນທົ່ວປະເທດ ແລະ ພີ່ນ້ອງເຊື້ອຊາດລາວທີ່ດຳລົງຊີວິດຢູ່ຕ່າງປະເທດ ຈົ່ງມີສຸຂະພາບເຂັ້ມແຂງ ມີອາຍຸໝັ້ນຍືນຍາວເປັນຫລັກແຫລ່ງແຫ່ງການເຕົ້າໂຮມຄວາມສາມັກຄີປອງດອງປະຊາຊົນລາວບັນດາຊົນເຜົ່າ ໃຫ້ເປັນປຶກແຜ່ນແໜ້ນໜາ ເພື່ອພ້ອມກັນປົກປັກຮັກສາ ແລະ ສ້າງສາພັດທະນາປະເທດ ໃຫ້ມີຄວາມກ້າວໜ້າຈະເລີນຮຸ່ງເຮືອງສີລິໄລ ຕາມແນວທາງນະໂຍບາຍຂອງພັກ-ລັດ ແລະ ຄວາມມຸ່ງມາດປາຖະໜາຂອງປະຊາຊົນລາວເຮົາ.

ຂໍອວຍພອນໃຫ້ບຸນປີໃໝ່ທີ່ເປັນປະເພນີຂອງບັນດາຊົນເຜົ່າ ຈົ່ງເປັນບຸນແຫ່ງຄວາມເບີກບານມ່ວນຊື່ນ ແລະ ມີຄວາມສຸກສົມຫວັງ ສຳລັບທຸກໆຄົນທີ່ເປັນເດັກນ້ອຍ ຊາຍໜຸ່ມ-ຍິງໜຸ່ມ ຕະຫລອດຮອດເຖົ້າແກ່ອາວຸໂສ ຂໍໃຫ້ເປັນບຸນແຫ່ງຄວາມຄິດເຖິງ ຄວາມໃສ່ໃຈຕໍ່ອະນາຄົດ ຄວາມວັດທະນະຖາວອນ ແລະ ຄວາມຮັກໄຄ່ໄມຕີຂອງປະຊາຊົນລາວບັນດາຊົນເຜົ່າໃນທົ່ວປະເທດ ເປັນບຸນປະເພນີແຫ່ງປີທີ່ມີການສ້າງທ່ວງທ່າໃໝ່-ປັດໄຈໃໝ່ ເພື່ອຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າຕ່າງໆໃຫ້ດີຂຶ້ນເປັນກ້າວໆ ພ້ອມກັນຫລຸດພົ້ນອອກຈາກຄວາມທຸກຍາກ ແລະ ຄວາມດ້ອຍພັດທະນາ ໂດຍສະເພາະແມ່ນປະຊາຊົນລາວບັນດາຊົນເຜົ່າທີ່ຢູ່ເຂດພູດອຍ ທຸລະກັນດານ ຫ່າງໄກສອກຫລີກ ໃຫ້ກ້າວຂຶ້ນສ້າງແບບແຜນດຳລົງຊີວິດໃໝ່ທີ່ສົດໃສ ປົກປັກຮັກສາ ແລະ ສ້າງຂະບວນການຕ່າງໆ ຄໍານັບຮັບຕ້ອນວັນບຸນສຳຄັນຂອງຊາດດ້ວຍຄວາມຫ້າວຫັນ ທັງມີຄວາມເບີກບານມ່ວນຊື່ນຢ່າງແທ້ຈິງ ແລະ ອວຍພອນໃຫ້ພີ່ນ້ອງເຊື້ອຊາດລາວບັນດາຊົນເຜົ່າທີ່ດຳລົງຊີວິດ ແລະ ປະກອບອາຊີບທໍາມາຫາກິນຢູ່ຕ່າງປະເທດ ຈົ່ງມີສຸຂະພາບເຂັ້ມແຂງ ມີຄວາມສຸກກາຍສະບາຍໃຈ ແລະ ຈົ່ງນຶກສະເໝີວ່າ ປະຊາຊົນລາວບັນດາຊົນເຜົ່າ ພັກ-ລັດ ແລະ ປະເທດຊາດ ຍາມໃດກໍມີຄວາມຍິນດີຕ້ອນຮັບທຸກທ່ານທີ່ມີຄວາມຈິງໃຈ ມີຄວາມບໍລິສຸດໃຈຢາກຫັນໜ້າມາປະກອບສ່ວນຕາມຄວາມສາມາດຂອງຕົນ ເພື່ອພ້ອມກັນສ້າງສາພັດທະນາມາຕຸພູມອັນແສນຮັກ ຫວງແຫນໃຫ້ຈະເລີນກ້າວໜ້າ ແລະ ຄົງຢູ່ຊົ່ວກາລະນານ.

ຂ່າວ: ສຳນັກຂ່າວສານປະເທດລາວ