ການຕັດສິນໃຈປ່ອຍນໍ້າມັນຖິ້ມກ່ອນຍົນຕົກ ໃນໂກລົມບີ ບໍ່ເຮັດໃຫ້ເກີດລະເບີດ ພາຍຫລັງເຮືອບິນຕົກກະແທກພື້ນ

ວັນທີ 29 ພະຈິກ 2016 ເວັບໄຊເດລີເມວຂອງອັງກິດເປີດເຜີຍລາຍງານຈາກກໍລະນີເຫດເຮືອບິນທີມນັກເຕະບານບຣາຊິລ ຕົກທີ່ປະເທດໂກລົມບີ ສົ່ງຜົນໃຫ້ມີຜູ້ເສຍຊີວິດ 75 ຄົນ ແລະລອດຊີວິດອີກ 6 ຄົນ ໂດຍລະບຸວ່າ ທ່ານມີເກວ ກີໂຣກາ ຫລື ມິກກີ້ ນັກບິນຈາກເຮືອບິນ CP-2933 ໄດ້ຮັບການຍົກຍ່ອງໃຫ້ເປັນຮີໂຣ່ ຈາກການຕັດສິນໃຈຖິ້ມນໍ້າມັນອອກຈາກເຮືອບິນ ໃນຊ່ວງເວລາພຽງບໍ່ນານກ່ອນເຮືອບິນຕົກ

ໂດຍຕາມລາຍງານລະບຸວ່າການຕັດສິນໃຈອັນເດັດດ່ຽວວ່ອງໄວຂອງເຂົາ ເກີດຂື້ນພາຍຫລັງເຄື່ອງປະສົບເຫດລະບົບໄຟຟ້າຂັດຂ້ອງ ໂດຍເຂົາຍອມປ່ອຍນໍ້າມັນຖິ້ມໄປເພື່ອບໍ່ໃຫ້ເກີດການລະເບີດຫລັງຈາກຍົນຕົກກະທົບພື້ນ ເຊິ່ງເຊື່ອວ່າການຕັດສິນໃຈຂອງເຂົາມີສ່ວນສຳຄັນຢ່າງຍິ່ງທີ່ຊ່ວຍ ໃຫ້ຍັງມີຜູ້ລອດຊີວິດ 6 ຄົນ ເຖິງແມ່ນວ່າຕອນນັ້ນຈະເປັນຊ່ວງເວລາສຸດທ້າຍຂອງຊີວິດເຂົາກໍ່ຕາມ