ເວົ້າໄດ້ວ່າກະແສຄວາມດັງທີ່ຖະຫຼົ່ມຖະລາຍທັງໃນຍີ່ປຸ່ນ ແລະຕ່າງປະເທດຂອງຮູບເງົາອະນິເມຊັ່ນເລື່ອງ “Your Name” ຫຼື “Kimi no nawa” ຫຼືໃນຊື່ພາສາລາວວ່າ: “ຫຼັບຕາຝັນ ເຖິງຊື່ເຈົ້າ” ນັ້ນຄົງຈະບໍ່ໄດ້ດັງແຕ່ໃນຈໍອີກແລ້ວ ເພາະມີນັກທ່ອງທ່ຽວຈຳນວນຫຼາຍແຫ່ກັນໄປຕາມສະຖານທີ່ຕ່າງໆທີ່ປະກົດຢູ່ໃນອະນິເມະເລື່ອງດັ່ງກ່າວ ໜຶ່ງໃນນັ້ນກໍຄື: ເມືອງອິຕາໂມຣິ ເຂດຮິດະ ແຂວງກິຟຸ. ໂດຍອະນິເມຊັ່ນເລື່ອງນີ້ໄດ້ນຳເອົາສະຖານທີ່ຕ່າງໆໃນເມືອງນີ້ໄປໃຊ້ປະກອບເປັນສາກ ເຮັດໃຫ້ໃຜທີ່ໄດ້ເບິ່ງແລ້ວຄົງຈະຕິດເອິກຕິດໃຈກັບຄວາມສວຍງາມຂອງສະຖານທີ່ ຈຶ່ງພ້ອມກັນຟ້າວອອກໄປຕາມຮອຍທ່ອງທ່ຽວເມືອງນີ້ກັນເຕັມໄປໝົດ, ໂດຍຫຼ້າສຸດນີ້ເອງກໍມີຂ່າວອອກມາແລ້ວວ່າ ເມືອງອິຕາໂມຣິ ຈາກແຂວງກິຟຸນີ້ມີເງິນໝຸນວຽນເຖິງ 18.5 ພັນລ້ານເຢນກັນເລີຍ.
ນອກຈາກນີ້ ກໍຍັງມີບໍລິສັດທ່ອງທ່ຽວຈັດທົວຕາມຮອຍສະຖານທີ່ຕ່າງໆໃນອະນິເມະອີກນຳ ແລະກໍຍັງມີອີກ 1 ສິນຄ້າທີ່ຂາຍດິບຂາຍດີເວົ້າໄດ້ວ່າໝົດແບບໄວສຸດໆກັນເລີຍນັ້ນກໍຄື: “Kuchikamizake” ຫຼື ເຫຼົ້າສາເກ ທີ່ປະກົດອອກມາໃນອະນິເມະເລື່ອງນີ້ເຊິ່ງມີການຜະລິດອອກມາວາງຈຳໜ່າຍແທ້ໆແບບ Limited Edition ພຽງ 3000 ອັນຕໍ່ປີເທົ່ານັ້ນ ເຮັດໃຫ້ແຟນໆອະນິເມະເລື່ອງນີ້ພາກັນໄປຊື້ກັນຈົນໝົດແລ້ວ ແຕ່ບໍ່ຕ້ອງກັງວົນໄປເພາະສາເກຂອງແທ້ນັ້ນບໍ່ໄດ້ຜະລິດຕາມແບບອະນິເມະທີ່ໃຫ້ຜູ້ຍິງຫຍ້ຳເຂົ້າແລ້ວຄາຍອອກມາຂາຍຢ່າງແນ່ນອນ. ເຊິ່ງເລື່ອງນີ້ກໍກາຍເປັນອີກ 1 ປະກົດການທີ່ເຮັດໃຫ້ເມືອງນ້ອຍໆແຫ່ງນີ້ມີນັກທ່ອງທ່ຽວແຫ່ກັນມາທ່ຽວກັນຢ່າງຫຼວງຫຼາຍເພາະອະນິເມຊັ່ນເລື່ອງດັງເລື່ອງນີ້ແທ້ໆ.
ວ່າກັນຕາມຄວາມຈິງແລ້ວຜູ້ຂຽນກະຍັງຢາກຈະລອງໄປຢູ່ ^^
ສຳລັບທ່ານໃດທີ່ຮັກໃນການອ່ານຂ່າວໄອທີ, ເກມ ແລະ ອະນິເມະ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!
ທີ່ມາ: online station