ຈາກສະພາບຝົນຕົກໜັກຕິດຕໍ່ກັນຫຼາຍມື້ ເຮັດໃຫ້ສະພາບເສັ້ນທາງຢູ່ນະຄອນຫຼວງວຽງຈັນຂອງພວກເຮົາຫຼາຍເສັ້ນ
ບໍ່ວ່າຈະເປັນທາງດິນແດງ ແລະ ເສັ້ນທາງຢາງຢູ່ຊານເມືອງ ຫຼື ຢູ່ຕົວເມືອງຫຼາຍຈຸດ ໄດ້ເປ່ເພເສຍຫາຍຫຼາຍສົມຄວນ
ອັນສ້າງຄວາມຫຍຸ້ງຍາກ ແລະ ຄວາມບໍ່ສະດວກ ໃຫ້ແກ່ການສັນຈອນຂອງຍານພາຫະນະ ສາເຫດຫຼັກໆທີ່ເຮັດໃຫ້ບາງ
ຈຸດຂອງເສັ້ນທາງເປ່ເພນັ້ນ ກໍ່ຍ້ອນນ້ຳຖ້ວມຂັງບາງຈຸດ ເຊິ່ງສາເຫດທີ່ມີນ້ຳຖ້ວມຂັງນັ້ນ ກໍ່ຍ້ອນລະບົບຮ່ອງລະບາຍນ້ຳ
ໄຫຼບໍ່ສະດວກ ຍ້ອນການຖົມດິນຂອງຜູ້ທີ່ຢູ່ອາໄສຕາມແຄມເສັ້ນທາງດັ່ງກ່າວ ເວລາຖົມດິນນັ້ນໄດ້ໄປຕັນເອົາແລວນ້ຳ.
ຕໍ່ສະພາບດັ່ງກ່າວ ດ້ວຍຄວາມເປັນຫ່ວງເປັນໄຍ ວັນທີ 27 ກໍລະກົດ 2014 ຜ່ານມານີ້ ທ່ານ ດຣ. ສິນລະວົງ ຄຸດໄພທູນ
ເຈົ້າຄອງນະຄອນຫຼວງວຽງຈັນ ທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍພາກ
ສ່ວນກ່ຽວຂ້ອງ ກໍ່ໄດ້ລົງໄປຕິດຕາມເບິ່ງສະພາບນ້ຳຖ້ວມຂັງ ແລະ ການເປ່ເພເສຍຫາຍຂອງເສັ້ນທາງຫຼາຍຈຸດຄື: ຮ່ອງ
ລະບາຍນ້ຳຈຸດໄຟແດງທາດຫຼວງ ບາງຈຸດຂອງເສັ້ນທາງກຳແພງເມືອງ ໂດຍສະເພາະຕໍ່ໜ້າກອງບັນຊາການ ປກສ ນະ
ຄອນຫຼວງ ບາງຈຸດຖະໜົນ 450 ປີ ແລະ ຂົວຂ້າມເຂດບ້ານໂຊກ ເມືອງໄຊເຊດຖາ ຮ່ອງລະບາຍນ້ຳເຂດບໍລິເວນບ້ານ
ຫຼັກ 8 ຖະໜົນທ່າເດື່ອໄປຫາຈຸດສາມແຍກຈີ່ນາຍໂມ້ ເມືອງສີສັດຕະນາກ ຕາມເສັ້ນທາງດົງໂດກ-ໜອງບຶກ ຈຸດລະ
ບາຍນ້ຳ ແລະ ຈຸດເປ່ເພຂອງເສັ້ນທາງຢູ່ບໍລິເວນໄຟແດງດົງໂດກ ໄຟແດງຕານມີໄຊ ແລະ ຈຸດຕໍ່ໜ້າຕະຫຼາດບ້ານໜອງ
ພະຍາ ເມືອງໄຊທານີ ແລະ ຈຸດສາມແຍກຕໍ່ໜ້າຕະຫຼາດໜອງແຕ່ງ ຈຸດບ້ານນາແຮ່ (ຫຼັກ 7) ເສັ້ນທາງ 13 ເໜືອ ເມືອງ
ສີໂຄດຕະບອງ ແລະ ຈຸດອື່ນໆ ທັງນີ້ກໍ່ເພື່ອຊອກຫາຊ່ອງທາງວິທີແກ້ໄຂໂດຍດ່ວນ ກ່ອນທີ່ສະພາບດັ່ງກ່າວຈະຮ້າຍແຮງ
ໄປກວ່ານີ້.
ຜ່ານການລົງຕິດຕາມຂອງທ່ານເຈົ້າຄອງນະຄອນຫຼວງຄັ້ງນີ້ ກໍ່ໄດ້ຮັບຟັງການລາຍງານສະພາບການເປ່ເພຂອງເສັ້ນທາງ
ແລະ ສະພາບນ້ຳຖ້ວມຂັງຈາກທ່ານ ເດດສົງຄາມ ທຳມະວົງ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງ
ຈັນ ທ່ານ ຄຳປ່ຽນ ອິນທະລືຊາ ຮອງປະທານອົງການບໍລິຫານ ແລະ ພັດທະນາຕົວເມືອງວຽງຈັນ (ອພບ) ພ້ອມດ້ວຍອຳນາດ
ການປົກຄອງເມືອງ ບ້ານ ແລະ ພໍ່ແມ່ປະຊາຊົນເຂດໃກ້ຄຽງ ເຊິ່ງກໍ່ເຫັນວ່າການເປ່ເພໜັກຂອງເສັ້ນທາງຈຸດດັ່ງກ່າວນັ້ນ
ແມ່ນເລີ່ມມີມາສອງອາທິດຜ່ານມານີ້ ຍ້ອນຝົນຕົກຕິດຕໍ່ກັນຫຼາຍມື້ ແລະ ຖ້າພວກເຮົາຫາກບໍ່ໄດ້ຮັບການແກ້ໄຂໄວ ຍິ່ງຈະ
ເຮັດໃຫ້ເສັ້ນທາງໄດ້ຮັບການເປ່ເພເສຍຫາຍໄປຫຼາຍຂຶ້ນ ອັນທີ່ສຳຄັນກໍ່ແມ່ນສ້າງຄວາມຫຍຸ້ງຍາກໃຫ້ແກ່ການສັນຈອນ
ມີສະພາບລົດແອອັດ (ລົດຕິດ) ເກີດຂຶ້ນ ນອກຈາກນີ້ແລ້ວ ຍັງເກີດມີສະພາບນ້ຳຖ້ວມຂັງເຮືອນຊານຂອງປະຊາຊົນທີ່ ຢູ່ອາ
ໄສເຂດດັ່ງກ່າວຕື່ມອີກ ແລະ ຜ່ານມາທາງ ອພບ ແລະ ພະແນກ ຍທຂ ກໍ່ໄດ້ສະເໜີມາຍັງຂັ້ນເທິງ ເພື່ອຂໍງົບປະມານຈຳນວນ
ໜຶ່ງ ມາແກ້ໄຂໃນການລວງຮ່ອງລະບາຍນ້ຳ ແລະ ສ້ອມແປງເສັ້ນທາງຈຸດທີ່ເປ່ເພແລ້ວ ແລະ ຄາດວ່າການຈັດຕັ້ງປະຕິບັດ
ໃນການແກ້ໄຂບັນຫາດັ່ງກ່າວນີ້ ຊ້າສຸດບໍ່ໃຫ້ເກີນພາຍໃນເດືອນສິງຫາທີ່ຈະມາເຖິງນີ້.
ພາຍຫຼັງທີ່ທ່ານເຈົ້າຄອງນະຄອນຫຼວງ ໄດ້ລົງຕິດຕາມເບິ່ງຕົວຈິງ ແລະ ໄດ້ຮັບຟັງການລາຍງານຈາກພາກສ່ວນກ່ຽວຂ້ອງ
ແລ້ວ ທ່ານກໍ່ໄດ້ມີຄຳເຫັນວ່າ ບັນຫາດັ່ງກ່າວແມ່ນສຳຄັນຫຼາຍ ແລະ ມີຄວາມຈຳເປັນທີ່ຈະຕ້ອງໄດ້ຮີບຮ້ອນແກ້ໄຂໂດຍດ່ວນ
ເຊິ່ງທ່ານກໍ່ໄດ້ເນັ້ນໃຫ້ຂະແໜງການກ່ຽວຂ້ອງ ໂດຍສະເພາະກໍ່ແມ່ນຂະແໜງ ຍທຂ ແລະ ອພບ ສົມທົບກັບອຳນາດການ
ປົກຄອງເມືອງ ພ້ອມກັນແກ້ໄຂບັນຫາດັ່ງກ່າວໃຫ້ສຳເລັດໂດຍໄວ ທັງນີ້ກໍ່ເພື່ອສ້າງຄວາມສະດວກ ໃຫ້ແກ່ການສັນຈອນໄປ
ມາຂອງຍານພາຫະນະ ຕາມເສັ້ນທາງຕົວເມືອງນະຄອນຫຼວງວຽງຈັນ.
ຂອບໃຈຂ່າວຈາກ: http://vientianemai.net/teen/khao/1/12306