ກອງປະຊຸມສ້າງຄວາມສາມາດຮັບມືກັບໄພຂົ່ມຂູ່ຈາກການຄ້າມະນຸດ,ການຄ້າຂາຍເຖື່ອນແລະອາຊະຍາກຳຢ່າງມີການຈັດຕັ້ງທີ່ຈັດຂຶ້ນຢູ່ນະຄອນຫຼວງວຽງຈັນເປີດເຜີຍວ່າ: ໄວໜຸ່ມລາວເປັນເປົ້າໝາຍໃນຂະບວນການຄ້າມະນຸດເຊິ່ງໂດຍສ່ວນໃຫຍ່ແລ້ວຈະຖືກຂາຍໄປປະເທດໄທ.
ໜັງສືພິມວຽງຈັນທາມລາຍງານຂ່າວໂດຍອີງໃສ່ຜົນການຄົ້ນຄວ້າຂອງສະຖາບັນຄົ້ນຄວ້າການສະໜັບສະໜູນດ້ານກົດໝາຍແລະການຊ່ວຍເຫຼືອດ້ານເຕັກນິກທີ່ໄດ້ລົງທະບຽນຢູ່ປະເທດລຸກຊຳບວກວ່າ:ບໍ່ຕ່າງຫຍັງກັບປະເທດອື່ນໃນອະນຸພາກພື້ນແມ່ນ້ຳຂອງ, ລາວມີໄວໜຸ່ມທີ່ບໍ່ມີວຽກເຮັດງານທຳເປັນຈຳນວນຫຼາຍແລະເປັນປະເທດທີ່ມີໂອກາດໜ້ອຍແລະຫາຍາກໃນການສົ່ງອອກແຮງງານທີ່ຖືກຕ້ອງຕາມກົດໝາຍ ທັງບໍ່ສອດຄ່ອງກັບຄວາມຕ້ອງການຈິ່ງເຮັດໃຫ້ຄົນລາວຈຳນວນໜຶ່ງຕ້ອງຊອກຫາຊ່ອງທາງອື່ນແລະກາຍເປັນຊາວອົບພະຍົບທີ່ບໍ່ມີໃບຢັ້ງຢືນ. ຈາກນີ້ ຊາວອົບພະຍົບທີ່ຜິດກົດໝາຍຈິ່ງມີສ່ວນພົວພັນຢ່າງຈະແຈ້ງກັບການຄ້າມະນຸດ ໂດຍສະເພາະແຮງງານທີ່ບໍ່ມີໃບຢັ້ງຢືນມັກຈະຖືກທຳຮ້າຍງ່າຍ.
ສະຖາບັນດັ່ງກ່າວເຫັນວ່າ: ປະເທດອະນຸພາກພື້ນແມ່ນ້ຳຂອງມີສິ່ງແວດລ້ອມພູມສັນຖານທີ່ສັບສົນບວກໃສ່ອຸປະສັກທາງພາສາແລະການຂາດກົນໄກຮ່ວມມືສາກົນເຊິ່ງເປັນສິ່ງກີດຂວາງຕໍ່ການສືບສວນອາຊະຍາກຳຂ້າມຊາດທີ່ມີປະສິດທິຜົນ ນອກນີ້, ປະຊາຄົມອາຊຽນໄດ້ສົ່ງເສີມໃຫ້ເສດຖະກິດເຊື່ອມໂຍງເຂົ້າກັນໂດຍການຫຼຸດຂັ້ນຕອນຄວບຄຸມຂ້າມແດນໃຫ້ກະທັດຮັດຈິ່ງເປັນສ່ວນໜຶ່ງເຮັດໃຫ້ການເຄື່ອນຍ້າຍຂ້າມແດນຢ່າງຜິດກົດໝາຍເພີ່ມຫຼາຍຂຶ້ນແລະເພີ່ມທະວີເຄືອຂ່າຍອາຊະຍາກຳອີກດ້ວຍ.
ຂ່າວຈາກ: ສຳນັກຂ່າວເອບີຊີລາວ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!