ສຳນັກຂ່າວຕ່າງປະເທດ ລາຍງານໃນວັນທີ 29 ພະຈິກຜ່ານມານີ້ວ່າ ປະຊາຊົນຊາວກູບາຈຳນວນຫລວງຫລາຍ ໄດ້ພາກັນຫລັ່ງໄຫລເດີນທາງມາສະໜາມແຫ່ງການປະຕິວັດ ນະຄອນຫລວງລາຮາວານ ເພື່ອຕໍ່ແຖວລໍຖ້າເຂົ້າສະແດງຄວາມໄວ້ອາໄລ ຕໍ່ໜ້າຮູບຂອງ ທ່ານ ຟີແດນ ກາສໂຕຣ ຜູ້ນຳແຫ່ງການປະຕິວັດກູບາ ທີ່ເຖິງແກ່ມໍລະນະກຳ ໃນວັນທີ 25 ພະຈິກທີ່ຜ່ານມາ ລວມອາຍຸໄດ້ 90 ປີ ຊຶ່ງການຈັດພິທີໄວ້ອາໄລດັ່ງກ່າວນີ້ ມີຂຶ້ນເປັນເວລາ 9 ວັນ ຕາມການປະກາດຂອງລັດຖະບານກູບາ ໂດຍຈະສິ້ນສຸດລົງ ໃນວັນທີ 4 ທັນວານີ້.
ທ່ານ ຟີແດນ ກາສໂຕຣ ເປັນໜຶ່ງໃນລັດຖະບູລຸດ ທີ່ປຽບເໝືອນດັ່ງຈິດວິນຍານຂອງຊາວກູບາ ຊຶ່ງໃນຕະຫລອດໄລຍະຊີວິດຂອງທ່ານ ໄດ້ອຸທິດເຫື່ອແຮງ ແລະ ສະຕິປັນຍາ ໃນການພັດທະນາປະເທດກູບາ ຈົນຖືກຂະໜານນາມວ່າ ນັກປະຕິວັດແຫ່ງກູບາ ທີ່ມີບົດບາດສຳຄັນ ຕໍ່ການກໍ່ສ້າງສັງຄົມນິຍົມຢູ່ກູບາ ໂດຍປະຊາຊົນຊາວກູບາ ຈະຍັງຄົງຢູ່ໃນພາວະແຫ່ງຄວາມເສົ້າໂສກເສຍໃຈ ຕໍ່ກັບການຈາກໄປຂອງຜູ້ນຳອັນແສນເຄົາລົບຮັກຂອງຕົນ.
ຕິດຕາມເຮົາທາງFacebook ກົດຖືກໃຈເລີຍ!