ຂປລ. ໃນວັນທີ 29 ພະຈິກນີ້ທີ່ສະຖານທູດ ກູບາ ປະຈໍານະຄອນຫລວງວຽງຈັນ. ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ ໄດ້ລົງນາມປື້ມໄຫວ້ອາໄລ ເຖິງດວງວິນຍາ ສະຫາຍ ຟີແດນ ກາສໂຕຣ ຣຸດສ ອະດີດເລຂາທິການທີໜຶ່ງ ຄະນະບໍລິຫານງານສູນກາງພັກກອມມູນິດກູບາ, ປະທານສະພາແຫ່ງລັດ ແລະ ສະພາລັດຖະມົນຕີ ແຫ່ງ ສາທາລະນະລັດ ກູບາ ທີ່ໄດ້ເຖິງແກ່ມໍລະນະກໍາໃນວັນທີ 25 ພະຈິກ 2016 ເຊິ່ງເນື້ອໃນມີຄືດັ່ງນີ້:

ໃນນາມພັກປະຊາຊົນ ປະຕິວັດລາວ, ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ສະພາແຫ່ງຊາດ ແຫ່ງ ສປປ ລາວ ແລະ ປະຊາຊົນລາວບັນດາເຜົ່າ ຂ້າພະເຈົ້າ ຂໍສະແດງຄວາມເສົ້າໂສກເສຍດາຍ ແລະ ເສົ້າສະຫລົດໃຈຢ່າງສຸດຊຶ້ງມາຍັງພັກກອມມູນິດກູບາ, ລັດຖະບານ ແລະ ປະຊາຊົນ ກູບາອ້າຍນ້ອງ ຕໍ່ການເຖິງແກ່ມໍລະນະກໍາຂອງ ສະຫາຍ ຟີແດນ ກາສໂຕຣ ຣຸດສ໌ ອະດີດເລຂາທິການທີໜຶ່ງ ຄະນະບໍລິຫານງານສູນກາງພັກກອມມູນິດກູບາ, ປະທານສະພາແຫ່ງລັດ ແລະ ສະພາລັດຖະມົນຕີ ແຫ່ງ ສາທາລະນະລັດ ກູບາ ທີ່ໄດ້ເຖິງແກ່ມໍລະນະກໍາໃນວັນທີ 25 ພະຈິກ 2016.

ການລ່ວງລັບຂອງສະຫາຍ ຟີແດນ ກາສໂຕຣ ຣຸດສ໌ ເປັນການສູນເສຍອັນຍິ່ງໃຫຍ່ຂອງພັກ, ລັດຖະບານ ແລະ ປະຊາຊົນກູບາອ້າຍນ້ອງ ເປັນການສູນເສຍນັກຕໍ່ສູ້, ຜູ້ນໍາການປະຕິວັດທີ່ຍິ່ງໃຫຍ່ກ້າແກ່ນ, ໃນການຕໍ່ສູ້ຕ້ານຈັກກະພັດຜູ້ຮຸກຮານເພື່ອເອກະລາດແຫ່ງຊາດ, ສູນເສຍຜູ້ນໍາທີ່ໂດດເດັ່ນ, ຜູ້ເຊິ່ງຕະຫລອດຊີວິດໄດ້ອຸທິດຕົນເພື່ອອຸດົມການສັງຄົມນິຍົມ, ເປັນຜູ້ກໍ່ຕັ້ງລັດສັງຄົມນິຍົມທໍາອິດຢູ່ພາກພື້ນອາເມລິກາລາຕິນ, ເປັນຜູ້ນໍາເອົາອິດສະຫລະພາບມາສູ່ປະຊາຊົນກູບາອ້າຍນ້ອງ, ຜົນງານ ແລະ ຊື່ສຽງຂອງສະຫາຍ ເປັນທີ່ຮັບຮູ້ຢ່າງກວ້າງຂວາງ ໃນຖານະເປັນໜຶ່ງໃນບັນດາຜູ້ນໍາທີ່ໂດດເດັ່ນຂອງໂລກ.

ການຈາກໄປຂອງສະຫາຍ ເປັນການສູນເສຍເພື່ອນມິດຜູ້ຍິ່ງໃຫຍ່ ຮ່ວມອຸດົມການຂອງພັກ, ລັດຖະບານ ແລະ ປະຊາຊົນລາວ ຜູ້ເຊິ່ງໄດ້ປະກອບສ່ວນຢ່າງສໍາຄັນເຂົ້າໃນການເພີ່ມພູນຄູນສ້າງສາຍພົວພັນທີ່ມີມູນເຊື້ອລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ

ພວກຂ້າພະເຈົ້າເຊື້ອໝັ້ນຢ່າງແນວແນ່ວ່າ, ພັກ-ລັດຖະບານ ແລະ ປະຊາຊົນກູບາອ້າຍນ້ອງຈະສາມາດຜ່ານຜ່າຄວາມທຸກໂສກນີ້ໄປໄດ້ ແລະ ຈະຫັນຄວາມທຸກໂສກນີ້ມາເປັນກໍາລັງແຮງ ເພື່ອສືບຕໍ່ສ້າງສາປະເທດສັງຄົມນິຍົມກູບາໃຫ້ນັບມື້ນັບເຂັ້ມແຂງຕາມຄວາມມຸ້ງມາດປາດຖະໜາຂອງ ສະຫາຍ ຟີແດນ ກາສໂຕຣ ຣຸດສ໌.