ສຳລັບ ບົດເລື່ອງຄວາມຮັກ ມື້ນີ້ແອັດມິນຈະມາເວົ້າກ່ຽວກັບນິຍາມຂອງຄວາມຮັກ ລະຫວ່າງ “ຮັກທຳອິດ” ກັບ “ຮັກສຸດທ້າຍ” ເຊິ່ງຂະບວນການຂອງຄວາມຮັກແອັດມິນເຊື່ອວ່າ ທຸກຄົນໃນໂລກນີ້ຕ້ອງເຄີຍມີຮັກຄັ້ງທຳອິດມາກ່ອນ ຈິ່ງຈະມາພົບກັບຄວາມຮັກຄັ້ງສຸດທ້າຍຂອງຊີວິດ ແລະ ຄວາມຮັກທັງສອງໄລຍະນີ້ມີຄວາມໝາຍໃນຊີວິດຄືເທົ່າກັນ ແຕ່ລະດັບຄວາມສຳຄັນເກືອບເທົ່າທຽມກັນ ເປັນຫຍັງແອັດມິນຈິ່ງເວົ້າແນວນີ້ ຢາກໃຫ້ທຸກຄົນໄດ້ລອງອ່ານສິ່ງທີ່ຈະຂຽນລອງໄປນີ້ ແລ້ວຄິດພິຈາລະນາໄປພ້ອມກັນ.
‘ຮັກຄັ້ງທຳອິດ’ ສິ່ງທຳອິດທີ່ເຮົາໄດ້ມາມັກຈະມີຄຸນຄ່າສະເໝີ ໂດຍສະເພາະ “ຄວາມຮັກ” ເຮົາຈະຄິດວ່າມັນເປັນສິ່ງທີ່ມີຄຸນຄ່າ ແລະ ມີຄວາມໝາຍຫຼາຍໃນຊີວິດ ຄວາມຮັກຄັ້ງທຳອິດ ຂອງແຕ່ລະຄົນກໍ່ອາດມີຄວາມສົງໃຈໃນເລື່ອງນີ້ແຕກຕ່າງກັນອອກໄປ ບາງຄູ່ກໍ່ຈົບຄວາມສຳພັນກັນແບບສວຍງາມ ສ່ວນບາງຄູ່ກໍ່ຈົບຄວາມສຳພັນກັນແບບເຈັບຊ້ຳ ແຕ່ໄລຍະຂອງການມີຄວາມຮັກຄັ້ງທຳອິດ ພວກເຮົາໄດ້ຮຽນຮູ້ເຖິງຄວາມຮັກ ຮູ້ຈັກຄຳວ່າຮັກໃຜຈັກຄົນໜຶ່ງ, ມີຄວາມສຸກເມື່ອໄດ້ເຮັດກິດຈະກຳຮ່ວມກັບຄົນທີ່ເຮົາຮັກ, ຄວາມທຸກເມື່ອເກີດບັນຫາບໍ່ເຂົ້າໃຈກັນ ແລະ ຮູ້ຈັກຄວາມເຈັບປວດທໍລະມານເມື່ອເວລາສູນເສຍຂອງຮັກໄປ ແຕ່ສິ່ງເຫຼົ່ານັ້ນມັນຄືບົດຮຽນອັນຍິ່ງໃຫຍ່ທີ່ສອນໃຫ້ເຮົາຮູ້ຈັກຄວາມຮັກຫຼາຍຂຶ້ນ ຮູ້ຈັກຮັກຕົວເອງຫຼາຍຂຶ້ນ ຮູ້ຈັກຄວາມຈິງບາງເລື່ອງທີ່ມີຢູ່ໃນຄວາມຮັກ ເຊິ່ງມັນຊ່ວຍໃຫ້ຫົວໃຈເຮົາເຂັ້ມແຂງຂຶ້ນສາມາດຕໍ່ສູ້ກັບຄວາມສິ່ງຕ່າງໆທີ່ເກີດຂຶ້ນກັບເຮົາໃນລະຫວ່າງມີຄວາມຮັກຄັ້ງຕໍ່ໆໄປໄດ້ ແລະ ສິ່ງເຫຼົ່ານີ້ມັນໄດ້ເຮັດໃຫ້ຄວາມຮັກ ຄັ້ງທຳອິດ ເປັນຄວາມຮັກທີ່ມີຄວາມໝາຍຝັງໃຈຂອງເຮົາຕະຫຼອດເວລາ. ເຊິ່ງເຮົາຈະຄິດໄດ້ຢູ່ສະເໝີວ່າ ຊື່ແຟນເຮົາຄົນທຳອິດທີ່ເຮົາຮັກທີ່ສຸດ ຊື່ວ່າຫຍັງ?
“ຮັກຄັ້ງສຸດທ້າຍ” ມີຄວາມໝາຍຫຼາຍກວ່າ ຍ້ອນວ່າທີ່ຜ່ານມາເຮົາເຄີຍຜ່ານຜ່າຄວາມເຈັບຊ້ຳຈາກການທີ່ຜິດຫວັງໃນເລື່ອງຄວາມຮັກ, ຜ່ານຄວາມຮູ້ສຶກອ້າງວ້າງ, ຄວາມເຫງົາໃນເວລາຂາດຄູ່ ແລະ ຜ່ານຊ່ວງເວລາຂອງການລໍຄອຍໃຜຈັກຄົນໜຶ່ງທີ່ເຂົ້າມາໃນຊີວິດແລ້ວພ້ອມໃຊ້ຊີວິດຄູ່ຢູ່ຄຽງຂ້າງກັບເຮົາຕະຫຼອດໄປ ແລະ ອື່ນຄວາມຮູ້ສຶກອື່ນໆ ດັ່ງນັ້ນໃນເວລາທີ່ເຮົາໄດ້ພົບກັບຄົນທີ່ເຮົາໄຝ່ຝັນລໍຄອຍມາດົນນານແລ້ວ ເຮົາພ້ອມທີ່ຈະຢຸດຫົວໃຈໄວ້ກັບຄົນໆນັ້ນ, ເຮົາພ້ອມທີ່ຈະຮັບຂໍ້ດີຂໍ້ເສຍຂອງຄົນນັ້ນແບບບໍ່ມີເງື່ອນໄຂ, ເຮົາພ້ອມທີ່ຈະເສຍສະຫຼະທຸກສິ່ງທຸກຢ່າງເພື່ອໃຫ້ໄດ້ໃຊ້ຊີວິດຄູ່ກັບຄົນທີ່ຕົນເອງຮັກ, ຍອມຢຸດພຶດຕິກຳທີ່ບໍ່ດີໃນອະດີດທີ່ເຄີຍເຮັດຜ່ານມາ ແລ້ວປັບປຸງຕົວໃໝ່ ແລະ ຕັ້ງໃຈສ້າງຊີວິດໃຫ້ມີຄວາມໝັ້ນຄົງ ມີຈຸດໝາຍຂອງຊີວິດທີ່ຊັດເຈນກວ່າທີ່ຜ່ານ ເພື່ອຈະເຮັດໃຫ້ຄູ່ຊີວິດເຮົານັ້ນມີຄວາມສຸກທີ່ສຸດ
ສະຫຼຸບກໍ່ຄື: “ຮັກທຳອິດ” ເປັນຮັກຝັງໃຈທີ່ຢາກຈະລົບເລືອນ ແຕ່… “ຮັກສຸດທ້າຍ” ເປັນຮັກທີ່ມີຄວາມໝາຍສຳຄັນທີ່ສຸດສະເໝີ.
ຕິດຕາມເລື່ອງດີດີເພຈຊີວິດແລະຄວາມຮັກ ກົດໄລຄ໌ເລີຍ!