ເກີດເຫດເຮືອບິນໂດຍສານຕົກ ໃນປະເທດໂກລົມບີ ນັກເຕະສະໂມສອນດັງເບຣຊິນນັ່ງເຕັມລຳ ຍັງບໍ່ຮູ້ຊະຕາກຳ ແຕ່ມີລາຍງານຜູ້ລອດຊີວິດ.
ສຳນັກຂ່າວຕ່າງປະເທດລາຍງານວ່າ ເກີດເຫດເຮືອບິນຕົກໃນປະເທດໂກລົມບີ ໂດຍເທິງເຮືອບິນລຳດັ່ງກ່າວມີນັກກິລາເຕະບານສະມາຄົມຊາເປໂຄເອນເຊ່ຂອງເບຣຊິນ ເບື້ອງຕົ້ນມີລາຍງານຜູ້ເສຍຊີວິດແລະລອດຊີວິດຈາກເຫດດັ່ງກ່າວແລ້ວ ເຈົ້າໜ້າທີ່ກູ້ໄພທ້ອງຖິ່ນໄດ້ນຳສົ່ງໂຮງໝໍ.
ຕາມລາຍງານລະບຸວ່າ ເຮືອບິນລຳດັ່ງກ່າວມີຜູ້ໂດຍສານລວມ 81 ຄົນ ໃນນັ້ນມີຈຸບິນ 9 ຄົນ ໂດຍຜູ້ໂດຍສານສ່ວນຫຼາຍເປັນພະນັກງານແລະນັກເຕະບານຈາກສະມາຄົມບານເຕະຊາເປໂຄເອນເຊ່ຂອງເບຣຊິນ ເຮືອບິນຢູ່ໃນລະຫວ່າງການບິນໄປຍັງສະໜາມບິນນານາຊາດໂຈເຊ ມາເຣຍ ກໍໂດວາ ປະເທດໂກລົມບີ ມີໂປຣແກຣມການແຂ່ງຂັນທີ່ສະໜາມກິລາໃນເມືອງເມເດຍິນໃນວັນພຸດ ວັນທີ 30 ພະຈິກ 2016 (ມື້ອື່ນນີ້).
ແນວໃດກໍຕາມ ເບື້ອງຕົ້ນໄດ້ມີລາຍງານວ່າພົບຜູ້ໄດ້ຮັບບາດເຈັບຢ່າງໜ້ອຍ 10 ຄົນ ແລະຍັງບໍ່ມີການຢືນຢັນຕົວເລກຜູ້ເສຍຊີວິດ. ສ່ວນສາເຫດຂອງເຮືອບິນຕົກຄັ້ງນີ້ຍັງບໍ່ຊັດເຈນ ເຊິ່ງຍັງຢູ່ລະຫວ່າງການສືບສວນສອບສວນຢູ່.
