ຈາກປະລິມານການບໍລິໂພກຜະລິດຕະພັນຂອງບໍລິສັດເບຍລາວ ຈຳກັດ ທີ່ນັບມື້ເພີ່ມຂຶ້ນທຸກປີ ໂດຍເລີ່ມແຕ່ກໍ່ຕັ້ງບໍລິສັດຈົນມາເຖິງປະຈຸບັນລວມໆແລ້ວ 40 ກວ່າປີ, ເບຍລາວເຕີບໂຕຢ່າງແຂງແຮງມາກວ່າ 40 ປີ ຍ້ອນຄວາມ ເຊື່ອໝັ້ນຂອງສັງຄົມ ສະເພາະທຸລະກິດ ໂດຍລວມຍັງເຕີບໂຕຢ່າງເຂັ້ມແຂງ ທັງໄດ້ກາຍເປັນບໍລິສັດຊັ້ນນຳໜ້າຂອງລາວ ທີ່ມີຕົວແທນຈຳໜ່າຍທັງໝົດ 18 ປະເທດໃນທົ່ວໂລກ.
ທ່ານ ສູນທອນ ພົມມະຈັກ ປະທານ ບໍລິສັດເບຍລາວຈຳກັດ ໃຫ້ຮູ້ວ່າ: ເບຍລາວ ແມ່ນຜະລິດຕະພັນເບຍຂອງບໍລິສັດເບຍລາວ ເພື່ອຈໍາໜ່າຍພາຍໃນ ແລະຈໍານວນໜຶ່ງແມ່ນສົ່ງອອກຂາຍຕ່າງປະເທດ ໂດຍບໍລິສັດເບຍລາວໄດ້ຮັບການສ້າງຕັ້ງຂື້ນໃນປີ 1973 ໂດຍການ ຮ່ວມທຶນລະຫວ່າງນັກທຸລະກິດຊາວຝຣັ່ງເສດ  ແລະລາວ, ໃນເວລາ ນັ້ນໄດ້ໃຊ້ຊື່ວ່າໂຮງງານເຫຼົ້າເບຍ ແລະນ້ຳກ້ອນລາວ, ປະສິດທິພາບໃນການຜະລິດເບຍແມ່ນ 3 ລ້ານລິດຕໍ່ປີ, ພາຍຫຼັງທີ່ປະເທດຊາດໄດ້ຮັບການປົດປ່ອຍຢ່າງສົມບູນໃນປີ 1975, ໂຮງງານດັ່ງກ່າວໄດ້ຖືກໂອນໄປເປັນກຳມະສິດຂອງລັດຖະບານ, ຕໍ່ມາໃນປີ 1993 ບໍລິສັດໄດ້ເລີ່ມຮ່ວມທຶນກັບບໍລິສັດຕ່າງໆ ຈາກຕ່າງປະເທດ ແລະສາມາດຜະລິດເບຍໄດ້ 20 ລ້ານລິດຕໍ່ປີ, ຕົກມາໃນປີ 1997 ບໍລິສັດໄດ້ເລີ່ມມີການສົ່ງອອກ, ຈົນມາເຖິງປີ 2002 ບໍລິສັດກໍໄດ້ເຊັນສັນຍາ ຮ່ວມທຶນກັບບໍລິສັດຄາລສະເບີກ ບຣີເວີລີ ຈາກປະເທດເດັນມາກ ຖືຮຸ້ນ 50% ແລະລັດຖະບານລາວຖືຮຸ້ນ 50% ໂດຍມີກຳລັງການຜະລິດເບຍ 120 ລ້ານລິດຕໍ່ປີ.

ການຜະລິດສິນຄ້າຂອງບໍລິສັດ ພາຍຫຼັງອອກສູ່ຕະຫຼາດແມ່ນໄດ້ສຽງຕອບຮັບທີ່ດີພໍສົມຄວນຈາກ ສັງຄົມດ້ວຍຄວາມເຊື່ອໝັ້ນ ແລະຊົມໃຊ້ຜະລິດຕະພັນຂອງຄົນລາວຫຼາຍຂຶ້ນ ຈຶ່ງເຮັດໃຫ້ການດຳເນີນທຸລະກິດຂອງບໍລິສັດຕ້ອງໄດ້ເພີ່ມ ກຳລັງການຜະລິດໃຫ້ພຽງພໍກັບການຊົມໃຊ້ຂອງສັງຄົມ, ດັ່ງນັ້ນ ຕົກມາໃນປີ 2008 ບໍລິສັດຈຶ່ງໄດ້ ສ້າງຕັ້ງໂຮງງານແຫ່ງທີ່ສອງທີ່ ແຂວງຈຳປາສັກ ແລະສາມາດຜະລິດເບຍໄດ້ 180 ລ້ານລິດຕໍ່ປີ, ພ້ອມດຽວກັນນັ້ນ ເພື່ອເພີ່ມທາງເລືອກໃຫ້ກັບລູກຄ້າຫຼາຍຂຶ້ນທາງ ບໍລິສັດກໍໄດ້ໂຮມຕົວກັບບໍລິສັດນ້ຳຫວານລາວ ຈຳກັດ ແລະດຳເນີນທຸລະກິດພາຍໃຕ້ ຊື່ຂອງບໍລິສັດເບຍລາວຈຳກັດໃນປີ 2011 ໂດຍທີ່ບໍລິສັດຄາລສະເບີກບຣີເວີລີ ຖືຮຸ້ນ 51% ແລະຝ່າຍລາວຖືຮຸ້ນ 49%, ດ້ວຍກຳລັງການຜະລິດເບຍ 220 ລ້ານລິດຕໍ່ປີ, ຄຽງຄູ່ກັບການຜະລິດນັ້ນ ຕະຫຼາດຄວາມຕ້ອງການກໍເພີ່ມຂຶ້ນ ເຊັ່ນກັນຕົກມາໃນປີ 2012 ບໍລິສັດ ຈຶ່ງໄດ້ເພີ່ມກຳລັງການຜະລິດເບຍໃຫ້ເປັນ 340 ລ້ານລິດຕໍ່ປີ, ນ້ຳອັດລົມ 70 ລ້ານລິດຕໍ່ປີ ແລະນ້ຳດື່ມ 180 ລ້ານລິດຕໍ່ປີ ເພື່ອໃຫ້ພຽງພໍກັບຄວາມຕ້ອງການໃນສັງຄົມ.

ທ່ານ ສູນທອນ ພົມມະຈັກ ໃຫ້ຮູ້ອີກວ່າ: ມາຮອດປະຈຸບັນບໍລິສັດ ຂອງພວກເຮົາຖືເປັນບໍລິສັດໜຶ່ງ ທີ່ເປັນມືອາຊີບຈາກໃນເມື່ອກ່ອນພຽງແຕ່ລາວເຮັດລາວໃຊ້ລາວ ໄດ້ລາວຈະເລີນ, ແຕ່ດຽວນີ້ເຮົາ ມີທີມງານມືອາຊີບ, ມີທີ່ປຶກສາ ຈາກຕ່າງປະເທດຫຼາຍກວ່າ 9 ສັນຊາດ, ນອກນັ້ນເບຍລາວຍັງໄດ້ກາຍເປັນທູດ ກໍຄືຜະລິດຕະພັນລາວທີ່ເປັນໝາກຫົວໃຈຂອງຄົນລາວໃນການສົ່ງອອກໄປຕ່າງປະເທດ ຊຶ່ງມີທັງໝົດ 18 ປະເທດຂອງໂລກຕົ້ນຕໍແມ່ນອັງກິດ, ການາດາ, ຈີນ ແລະປະເທດອື່ນໆ ພ້ອມນັ້ນເບຍລາວຍັງໄດ້ຮັບສາຍາວ່າເປັນເບຍ ທ້ອງຖິ່ນທີ່ມີຄົນນິຍົມຫຼາຍ ແລະຍັງໄດ້ອອກວາລະສານຫຼາຍສຳນັກ, ສ່ວນການຂະຫຍາຍຕົວ ຂອງທຸລະກິດໃນປີ 2015-2016 ຢູ່ໃນລະດັບ 4%, ສ່ວນນ້ຳດື່ມຂະຫຍາຍຕົວ 14%, ອັນນີ້ກໍແມ່ນອີກໝາກຜົນໜຶ່ງ ທີ່ເຮັດໃຫ້ບໍລິສັດປະສົບຜົນສຳເລັດທາງດ້ານທຸລະກິດໂດຍສະເພາະ 10 ເດືອນຂອງປີ 2016 ນີ້, ບໍລິສັດໄດ້ມອບພັນທະໃຫ້ລັດຖະບານແລ້ວ ຈຳນວນ 180 ລ້ານໂດລາ, ໃນນັ້ນ ຊ່ວຍເຫຼືອສັງຄົມແລ້ວປະມານ 8 ຕື້ກີບ.

ທ່ານປະທານບໍລິສັດເບຍລາວ ກ່າວວ່າ: ເບຍລາວນອກຈາກເອົາໃຈໃສ່ຜະລິດສິນຄ້າທີ່ມີຄຸນນະພາບ ແລະມອບພັນທະໃຫ້ລັດຖະບານຢ່າງເຕັມເມັດເຕັມໜ່ວຍແລ້ວ ຍັງໄດ້ໃຫ້ການຊ່ວຍເຫຼືອສັງຄົມໂດຍກຳນົດ ວົງເງິນສະເພາະໃນແຕ່ລະປີສຳຄັນ ກວ່າໝູ່ແມ່ນສຸມໃສ່ວຽກງານການສຶກສາ, ສາທາລະນະສຸກ ແລະວຽກຈະລາຈອນ ປູກຈິດສຳນຶກແກ່ການຂັບຂີ່ດ້ວຍການຮ່ວມມືກັບເຈົ້າໜ້າທີ່ຈະລາຈອນຢ່າງເປັນປົກກະຕິ.
ຂ່າວ: ເສດຖະກິດ-ສັງຄົມ