ການມີຂີ້ແມງວັນ, ປານ ເປັນຄວາມເຊື່ອມາຕັ້ງແຕ່ບູຮານວ່າ ຄົນທີ່ມີຂີ້ແມງວັນ, ປານ ຕາມຈຸດຕ່າງໆຂອງຮ່າງກາຍ ກໍຈະບົ່ງບອກເຖິງລັກສະນະທີ່ແຕກຕ່າງກັນໄປ ລວມເຖິງໂຊກ ວາດສະໜາຕາມຄວາມເຊື່ອ, ສ່ວນທາງວິທະຍາສາດ ຂີ້ແມງວັນ ແລະປານເປັນຄວາມຜິດປົກກະຕິຂອງຜິວໜັງ ເຖິງແມ່ນວ່າຄົນນັ້ນໆຈະມີເປັນຄົນທີ່ຜິວກ້ຽງ, ຜິວພັນຜ່ອງໃສພຽງໃດ ກໍຕ້ອງມີຂີ້ແມງວັນຢູ່ຈັກອັນສອງອັນ, ສ່ວນໃຜຈະມີໜ້ອຍ ຫຼືຫຼາຍພຽງໃດ ຫຼືຂີ້ແມງວັນຊະນິດໃດ ກໍແຕກຕ່າງກັນໄປ, ຂີ້ແມງວັນ ແລະປານເກີດຈາກຫຍັງ, ເປັນຫຍັງຄົນເຮົາເຖິງມີ ໄປຮູ້ນຳກັນເລີຍ
ຂີ້ແມງວັນເກີດຈາກ ເມລາໂນໄຊ (ເຊວສ້າງສີ) ລວມໂຕກັນສ້າງເມລານິນຫຼາຍຜິດປົກກະຕິ ຫຼືເປັນຕຸ່ມເນື້ອທີ່ມີຂະໜາດແຕກຕ່າງກັນ ທັງສີ ແລະຮູບຮ່າງ ສາມາດເກີດຂຶ້ນກັບຄົນໜຶ່ງ ຫຼາຍກວ່າໜຶ່ງອັນ, ຂີ້ແມງວັນອາດເກີດຂຶ້ນ ໄດ້ຕັ້ງແຕ່ເກີດມາ, ບາງຄົນກໍມີຂີ້ແມງວັນເມື່ອໃຫຍ່ແລ້ວ ແລະຈະເພີ່ມຂຶ້ນຫຼາຍທີ່ສຸດໃນຊ່ວງເປັນໄວລຸ້ນ ຫຼັງຈາກນັ້ນຈະບໍ່ເກີດເພີ່ມຂຶ້ນອີກ
ປານແມ່ນ ຮອຍສີທີ່ເກີດຈາກຄວາມຜິດປົກກະຕິຂຶ້ນຢູ່ຜິວໜັງ ຫາກເປັນແຕ່ຕອນກຳເນີດນັ້ນ ອາດຈະມີຂະໜາດນ້ອຍ ແລະໃຫຍ່ຂຶ້ນ ຫຼືສີເຂັ້ມຂຶ້ນ ເມື່ອອາຍຸຫຼາຍຂຶ້ນ
- ຊະນິດຂອງປານ ແລະຂີ້ແມງວັນ:
- ຂີ້ແມງວັນ ມັກເກີດຂຶ້ນຫຼາຍທີ່ສຸດແມ່ນໃນໃບໜ້າ ແລະຄໍ ມີລັກສະນະເປັນຕຸ່ມນູນຂອບລຽບ, ສີດຳ, ມີຂະໜາດເທົ່າກັບເມັດຖົ່ວຂຽວ, ຫາກເປັນຂີ້ແມງວັນທີ່ໃຫຍ່ ມັກຈະມີຂົນຂຶ້ນ ແລະໃຫຍ່ຫຼາຍອາດເປັນອັນຕະລາຍໄດ້
- ປານແດງ: ມີລັກສະນະສີແດງ ມັກເກີດຂຶ້ນນຳຜູ້ທີ່ອາຍຸສູງ ເພາະເປັນຊ່ວງທີ່ມີຫຼອດເລືອດຝອຍກ້ອງຜິວໜັງມີການປ່ຽນແປງ, ມັກເກີດໃນບໍລິເວນຄໍ, ຫົວ, ໃບໜ້າ
- ປານດຳ: ມີລັກສະນະເປັນຮອຍດຳ, ມັກເກີດໃນໃບໜ້າຫຼາຍກວ່າບ່ອນອື່ນໆ ຂອງຮ່າງກາຍ, ຄວາມເຂັ້ມຂອງປານນີ້ ຂຶ້ນຢູ່ກັບຈຳນວນສີຂອງເມລານິນ
- ປານຂາວ: ມີລັກສະນະເປັນສີຂາວ ແຕ່ບໍ່ຂາວຫຼາຍ, ສາເຫດຈາກບໍລິເວນເປັນປານຂາວບໍ່ມີສີເມລານິນ ຫຼືເຊວສ້າງສີ
- ລັກສະນະຂອງຂີ້ແມງວັນ ແລະປານທີ່ຕ້ອງລະວັງ:
- ຂີ້ແມງວັນທີ່ມີສີເຂັ້ມຜິດປົກກະຕິ, ມີອາການຄັນ ຫຼືເຈັບຕະຫຼອດ
- ຂີ້ແມງວັນໃຫຍ່ ຫຼືມີປະມານ 5 ມິລີແມັດ
- ມີສີປ່ຽນກະທັນຫັນ ຂອບບໍ່ລຽບ
- ມີຂະໜາດໃຫຍ່ໄວຜິດປົກກະຕິເວລາສັ້ນໆ
- ມີເລືອດອອກງ່າຍຜິດປົກກະຕິ
- ມີຂີ້ແມງວັນນ້ອຍອ້ອມຢູ່ນຳ ຂີ້ແມງວັນໃຫຍ່ນັ້ນ
ຕິດຕາມນານາສາລະ ກົດໄລຄ໌ເລີຍ!