ອີງຕາມການລາຍງານຂອງສຳນັກຂ່າວຕ່າງປະເທດລາຍງານເມື່ອວັນທີ 26 ພະຈິກ 2016 ຜ່ານມາວ່າ ປະຊາຊົນເກົາຫຼີໃຕ້ ຍັງມາລວມໂຕກັນເດີນຂະບວນປະທ້ວງໃນກຸງໂຊນ ຕໍ່ເນື່ອງກັນເປັນອາທິດທີ 5 ເພື່ອກົດດັນໃຫ້ ປາກກຶນເຮ ປະທານາທິບໍດີ ໃຫ້ລາອອກຈາກຕຳແໜ່ງ ຈາກເລື່ອງທີ່ລາວປ່ອຍໃຫ້ ນາງຊອຍຊຸນຊິນ ໝູ່ສະໜິດ ເຂົ້າມາຮູ້ກ່ຽວກັບການບໍລິຫານປະເທດ
ແກນນຳຜູ້ຊຸມນຸມເວົ້າວ່າ ໃນກຸງໂຊນ ມີຜູ້ຮ່ວມຊຸມນຸມຫຼາຍເຖິງ 1,500,000 ຄົນ ແລະໃນພາກອື່ນໆອີກ 400,000 ຄົນໃນທົ່ວປະເທດ ແລະທາງການໄດ້ວາງກຳລັງ 25,000 ຄົນ ເຂົ້າມາຄວບຄຸມສະຖານະການ ຮັກສາການໃນກຸງໂຊນ ແລະຖະໜົນທຸກສາຍທີ່ເດີນທາງສູ່ບຣູເຮົາ ທຳນຽບສີຟ້າ ເຊິເປັນທີ່ພັກຂອງປະທານາທິບໍດີເກົາຫຼີໃຕ້ຖືກປິດກັ້ນ ເພື່ອບໍ່ໃຫ້ກຸ່ມປະທ້ວງເຂົ້າເຖິງ
ກ່ອນນີ້ ປະທານາທິບໍດີ ປາກ ກຶນເຮ ຍັງມີວາລະເຫຼືອອີກ 15 ເດືອນ ໄດ້ອອກມາຂໍໂທດປະຊາຊົນແລ້ວ 2 ເທື່ອ ແຕ່ຢືນຢັນຈະບໍ່ລາອອກຈາກຕຳແໜ່ງ, ລາວກໍຍອມຮັບວ່າທີ່ຜ່ານມາເຊື່ອໝັ້ນຄວາມສຳພັນສ່ວນຕົວຫຼາຍເກີນໄປ ແລະຮັບປາກວ່າ ຈະໃຫ້ຄວາມຮ່ວມມືກັບເຈົ້າໜ້າທີ່ ໃນການສອບສວນສາເຫດທັງໝົດ
ລ່າສຸດ ໄອຍະການໄດ້ແຈ້ງຄວາມຂໍ້ຫາ ແລະສອບສວນ ຊອຍຊຸນຊິນ ເຊິ່ງຖືກຈັບໃນຊ່ວງຕົ້ນເດືອນຜ່ານມາ ໃນຄວາມຜິດທຸຈະລິດຄໍລັບຊັນແລ້ວ, ນອກຈາກນີ້ ໄອຍະການຍັງແຈ້ງຂໍ້ຫາກັບຜູ້ຊ່ວຍປະທານາທິບໍດີ ປາກ ກຶນເຮ ອີກ 2 ຄົນ ແລະຍັງບອກອີກວ່າ ປະທານາທິບໍດີ ກໍາລັງຕົກເປັນຜູ້ຕ້ອງສົງໄສວ່າ ອາດສົມຮູ້ຮ່ວມຄິດໃນການເຮັດຜິດອາຍາກັບໝູ່ຂອງລາວ