ຄວາມເຊື່ອໃນການແຕ່ງຊຸດດຳໃນງານສົບ :
ການແຕ່ງຊຸດດຳໃນງານສົບ ເຊິ່ງຄາດວ່າແມ່ນມີຂຶ້ນໃນປີ ຄສ 1861 ເນື່ອງຈາກການແຕ່ງຊຸດດຳຂອງພຣະຣາຊີນີວິກຕໍເຣຍ ແຫ່ງອັງກິດ ທີ່ຊົງເລືອກຊຸດຂອງພຣະອົງດ້ວຍຊຸດສີດຳຕະຫລອດຊີວິດ ເພື່ອສະແດງເຖິງຄວາມເສຍພຣະໄທ ແລະຣະນຶກເຖິງພຣະສາມີທີ່ສະຫວັນນະຄົດໄປ ຈາກນັ້ນການໃສ່ເສື້ອຜ້າສີດຳຈຶ່ງຖືເປັນການສະແດງຄວາມເຄົາລົບແລະລະນຶກເຖິງຜູ້ເສຍຊີວິດຂອງຄົນຕາເວັນຕົກ.
ນັກບູຮານຄະດີຝຣັ່ງໃຫ້ ເຫດຜົນ ແລະແນວຄິດຂອງການໃສ່ຊຸດດຳຂອງຄົນຕາເວັນຕົກ ໂດຍສັນນິຖານວ່າ ເລື້ອງນີ້ເປັນເລື້ອງຂອງສີຜິວ ເພາະຄົນສະໄຫມກ່ອນກີ້ ຄົນຜິວຂາວຍຸກທຳອິດ ມັກຈະທາຕົວດ້ວຍສີດຳໃນງານສົບ ເພື່ອແຍກຄວາມແຕກຕ່າງ ລະຫວ່າງຄົນກັບວິນຍານ ແລະແນວຄິດນີ້ຍັງມີກັບຄົນອັບຟິລິກາບາງເຜົາ ທີ່ຈະທາສີຂາວໃຫ້ກົງກັນຂ້າມກັບສີຜິວຕົນເອງ ເພື່ອເປັນການບໍ່ໃຫ້ເຫັນແລະເຂົ້າສິງ ຈົນມາເຖິງສັດຕະວັດນີ້ກໍ່ຍັງມີໃຫ້ເຫັນກັນຢູ່ ສ່ວນຄົນຜິວຂາວໄດ້ປ່ຽນຈາກການທາສີຕາມຕົນຕົວ ມາໃສ່ເສື້ອຜ້າອາພອນທີ່ມີສີດຳແທນ … ເຊິ່ງການທາຕົວດ້ວຍສີດຳນັ້ນຍັງມີໃຫ້ເຫັນໃນປະມານປີ 40-50 ປີທີ່ຜ່ານມາ .
ຄວາມເຊື່ອໃນການແຕ່ງຊຸດຂາວໃນງານສົບ :
ຄວາມເຊື່ອໃນການແຕ່ງຊຸດຂາວໃນງານສົບ ນັ້ນສ່ວນຫລາຍຈະມີຢູ່ໃນບັນດາປະເທດໃນປະເທດຕາເວັນອອກໄກ ເຊິ່ງໄດ້ຮັບອິດທິພົນ ປະເພນີ ແລະຄວາມເຊື່ອ ອິນເດຍ ແລະຈີນ ເປັນຫລັກ ແລະໃນປະເທດລາວເຮົາ ກໍ່ໄດ້ຮັບອິດທິພົນຄວາມເຊື່ອມາຈາກແຫ່ງອະລິຍະທັມເຫລົ່ານັ້ນ ເພາະວ່າຜູ້ທີ່ຈະໄດ້ຈາກໂລກນີ້ໄປ ບັນດາຍາດຕິພີ່ນ້ອງກໍ່ມີຄວາມມຸ້ງຫວັງຂໍໃຫ້ໄປສູ່ແດນສຸຂາວະດີ ດິນແດນທີ່ບໍລິສຸດຂາວແຈ້ງ ດິນແດນທີ່ສະຫວ່າງສະໄຫວ ແນວຄິດນີ້ອາດຈະປຽບດັ່ງວ່າດິນແດນທີ່ເປັນຍາມກາງເວັນ ທີ່ເຫັນໄດ້ທຸກສິ່ງຢ່າງ ບໍ່ມິດເມົາ ດັ່ງນັ້ນ ບັນດາຍາດຕິພິ່ນ້ອງ ລູກຫລານ ເພື່ອນສະນິດ ມິດສະຫາຍ ຈຶ່ງນິຍົມພາກັນແຕ່ງຊຸດຂາວ ເພື່ອນ້ອມມຸທິຕາຈິດ ອັນບໍລິສຸດ ປຽບດັ່ງຄວາມຂາວບໍລິສຸດ ສົ່ງດວງວິຍານຂອງຜູ້ທີ່ຈາກໂລກນີ້ໄປສູ່ດິນແດນສຸຂາວະດີທີ່ຮຸ່ງເຮືອງພຸ້ນ .
ແຕ່ໃນປະຈຸບັນນີ້ ໃນປະເທດລາວເຮົາ ແນວຄິດໃສ່ຊຸດຂາວ ສ່ວນຫລາຍແມ່ນມີແຕ່ຍາດພິນ້ອງສະເພາະໃນຕອນແຫ່ງສົບເທົ່ານັ້ນ ຫລືວ່າບໍ່ແມ່ນເຄືອງຍາດກໍ່ຈະເສື້ອຂາວ ສິ້ນຫລືໂສ້ງດຳ ໄປຮ່ວມ ນອກນັ້ນຄົນສ່ວນຫລາຍແມ່ນຈະໃສ່ຊຸດດຳ ກັນແລ້ວໃນທຸກມື້ນີ້.
ແນວໃດກໍ່ຕາມ ຫລັກການປະຕິບັດການໃສ່ຊຸດຂາວ ແລະຊຸດດຳນີ້ ກໍ່ບໍ່ໄດ້ເປັນຫລັກສາກົນ ເພາະຍັງມີຫລາຍບ່ອນ ຫລາຍແຫ່ງ ທີ່ໃຊ້ສີອື່ນ ນອກຈາກສີດຳ ເຊັ່ນ : ຄົນຈີນ ຄົນອິນເດຍ ທີ່ໃສ່ຊຸດສີຂາວ ( ຍົນເວັ້ນຊາວຈີນທີ່ອາຍຸເກີນ 100 ປີ ກໍ່ຈະໃຊ້ສີແດງແທນ ) ສ່ວນຄົນເປີເຊຍ(ອີຣານ) ຈະນິຍົມໃຊ້ສີນ້ຳຕານ ອັນເປັນສີທີ່ສະແດງເຖິງໃບໄມ້ທີ່ແຫ້ງຫລົ່ນຈາກກົກ, ແລະຊາວຊີເຣຍໂບຮານຈະໃຊ້ສີຟ້າ ເຊິ່ງເປັນສີທີ່ຫມາຍເຖິງສວງສະຫວັນ, ສ່ວນຊາວອິຢີບໂບຮານ ຈະໃຊ້ສີເຫລືອງ ຄ້າຍຄືແສງພະອາທິດ ທີ່ຮຸ່ງແຈ້ງ ເຫລົ່ານີ້ເປັນຕົ້ນ .
ເມື່ອເຮົາຮູ້ການໃຊ້ສີຊຸດແຕ່ງກາຍນີ້ແລ້ວ ເຮົາເປັນຄົນລາວ ຈະເລືອກໃຊ້ສີຫຍັງຈຶ່ງຈະຖຶກຕ້ອງການຫລັກຄວາມເຊື່ອ ປະເພນີ ໃນພິທີງານສົບໃນຄັ້ງຕໍ່ໄປ.
ຂໍ້ມູນຈາກ: Art and Culture of Laos
ຕິດຕາມນານາສາລະ ກົດໄລຄ໌ເລີຍ!