ສຳນັກຂ່າວຕ່າງປະເທດ ລາຍງານໃນວັນທີ 24 ພະຈິກນີ້ວ່າ ສະມາຊິກລັດຖະສະພາເກົາຫລີໃຕ້ ນຳໂດຍກຸ່ມ ສ.ສ ຝ່າຍຄ້ານ ວູ ຊັງໂຮ ຜູ້ນຳພັກຝ່າຍຄ້ານ ຈາກພັກເດໂມຄຣາຕິກ ໄດ້ອອກມາລະບຸວ່າ ຈະມີການລົງຄະແນນໃນລັດຖະສະພາ ເພື່ອຖອດຖອນ ທ່ານ ນາງ ປາກ ກຶນເຮ ອອກຈາກຕຳແໜ່ງປະທານາທິບໍດີຂອງປະເທດ ໃນວັນທີ 2 ທັນວາ ຫລື ຢ່າງຊ້າສຸດພາຍໃນວັນທີ 9 ທັນວານີ້ ພາຍຫລັງທີ່ໄອຍະການນະຄອນຫລວງເຊອູນ ໄດ້ອອກມາຖະແຫລງ ໃນວັນທີ 20 ຜ່ານມານີ້ວ່າ ຈາກການສອບສວນພິເສດ ນາງ ຊອຍ ຊຸນຊິນ ຊຶ່ງຖືກຕັ້ງຂໍ້ຫາແຊກແຊງກິດຈະການຂອງລັດ ໃຊ້ອິດທິພົນກົດດັນໃຫ້ບໍລິສັດຕ່າງໆ ບໍລິຈາກເງິນສະໜັບສະໜູນໃຫ້ແກ່ມູນນິທິ ແລ້ວດຳເນີນການຍັກຍອກເງິນດັ່ງກ່າວ ໄປນຳໃຊ້ສ່ວນຕົວນັ້ນ ສະຫລຸບຈາກຫລັກຖານທັງໝົດວ່າ ປະທານາທິບໍດີ ປາກ ກຶນເຮ ຂອງເກົາຫລີໃຕ້ ສົມຮູ້ຮ່ວມຄິດໃນຄະດີດັ່ງກ່າວນີ້ ສົ່ງຜົນເຮັດໃຫ້ເກີດແຮງກະຕຸ້ນ ທີ່ຮຽກຮ້ອງໃຫ້ຜູ່້ນຳເກົາຫລີໃຕ້ຄົນປັດຈຸບັນ ລາອອກຈາກຕຳແໜ່ງ.
ພ້ອມກັນນັ້ນ ສ່ວນປະຊາຊົນຊາວເກົາຫລີໃຕ້ ຈຳນວນນັບແສນຄົນ ໄດ້ພ້ອມກັນອອກມາເດີນຂະບວນໂຮມຊຸມນຸມ ຢູ່ໃຈກາງນະຄອນຫລວງເຊອູນ ໃນມື້ວັນເສົາທີ 19 ພະຈິກທີ່ຜ່ານມານີ້ ຊຶ່ງເປັນການໂຮມຊຸມນຸມໃຫຍ່ທ້າຍອາທິດ 4 ຄັ້ງຕິດຕໍ່ກັນ ເພື່ອຮຽກຮ້ອງໃຫ້ ທ່ານ ນາງ ປາກ ກຶນເຮ ລາອອກຈາກຕຳແໜ່ງ, ນັບເປັນການເດີນຂະບວນປະທ້ວງ ທີ່ໃຫຍ່ທີ່ສຸດໃນປະຫວັດສາດເກົາຫລີໃຕ້ ນັບຕັ້ງແຕ່ຊຸມປີ 1980 ເປັນຕົ້ນມາ.
ຕິດຕາມເຮົາທາງFacebook ກົດຖືກໃຈເລີຍ!