ສຳນັກຂ່າວຕ່າງປະເທດ ລາຍງານໃນວັນທີ 25 ພະຈິກນນີ້ວ່າ ລັດຖະບານຈີນ ໄດ້ປະກາດກຽມເປີດໃຫ້ບໍລິການ ເສັ້ນທາງລົດໄຟຄວາມໄວສູງ ນະຄອນຊຽງໄຮ-ຄຸນໝິງ ແຂວງຢູນນານ ໃນເດືອນໜ້ານີ້ ໂດຍເສັ້ນທາງລົດໄຟດັ່ງກ່າວ ມີຄວາມຍາວ 2,300 ກິໂລແມັດ ຕັດຜ່ານບັນດາເມືອງໃຫຍ່ທີ່ສຳຄັນເຊັ່ນ ເມືອງຫາງໂຈວ ແລະ ອີ້ອູ ແຂວງເຈີ້ຈຽງ, ເມືອງໜານຊາງ ແຂວງຈຽງຊີ ແລະ ເມືອງສາງຊາ ໃນແຂວງຫູໜານ ຊຶ່ງຈະຫລຸດຜ່ອນໄລຍະເວລາເດີນທາງໄປ-ກັບ ລະຫວ່າງຊຽງໄຮ້ ແລະ ຄຸນໝິງ ຈາກເມື່ອກ່ອນທີ່ໃຊ້ເວລາປະມານ 35-40 ຊົ່ວໂມງ ເຫລືອພຽງແຕ່ 9 ຊົ່ວໂມງເທົ່ານັ້ນ.
ສຳນັກງານການທ່ອງທ່ຽວຄຸນໝິງ ໄດ້ຄາດໝາຍວ່າ ຕົວເລກນັກທ່ອງທ່ຽວຈະເພີ່ມຂຶ້ນປະມານ 10.25-20% ຫລັງຈາກເສັ້ນທາງລົດໄຟດັ່ງກ່າວນີ້ ເປີດໃຫ້ບໍລິການ, ນອກຈາກນີ້ ຍັງຄາດວ່າ ຈະມີນັກທ່ອງທ່ຽວເດີນທາງມາຢ້ຽມຢາມຄຸນໝິງ ປະມານ 150 ລ້ານຄົນ ພາຍໃນປີ 2020 ໂດຍໃນຈຳນວນດັ່ງກ່າວ ປະມານ 30 ລ້ານຄົນ ຈະເດີນທາງດ້ວຍລົດໄຟຄວາມໄວສູງ.
ຕິດຕາມເຮົາທາງFacebook ກົດຖືກໃຈເລີຍ!