ຂປລ. ຕອບສະໜອງຕາມຄໍາເຊີນ ຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນປະຕິວັດລາວ ປະທານປະເທດ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ, ສະຫາຍ ຫງວຽນ ຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ພ້ອມດ້ວຍຄະນະ ຜູ້ແທນຂັ້ນສູງ ພັກ-ລັດ ແຫ່ງ ສາທາລະນະລັດ ສັງຄົມນິຍົມຫວຽດນາມ ໄດ້ເດີນທາງເຖິງນະຄອນຫລວງວຽງຈັນ ເລີ່ມຕົ້ນການຢ້ຽມຢາມ ສັນຖະວະໄມຕີ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງເປັນທາງການ ແຕ່ວັນທີ 24-26 ພະຈິກ 2016 ນີ້.
ອອກຮັບສະຫາຍ ເລຂາທິການໃຫຍ່ ຫງວຽນ ຟູຈ້ອງ ພ້ອມຄະນະ ທີ່ສະໜາມບິນສາກົນວັດໄຕມີ ສະຫາຍ ພັນຄໍາ ວິພາວັນ ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ ສປປ ລາວ ພ້ອມດ້ວຍບັນດາສະຫາຍການນໍາຂັ້ນສູງພັກ-ລັດ ຈາກອົງການສໍານັກງານສູນກາງ ແລະ ນະຄອນຫລວງວຽງຈັນ, ພະນັກງານສະຖານທູດ, ຊາວໜຸ່ມ, ນັກສຶກສາ, ຊາວຫວຽດນາມ ແລະ ມວນຊົນຊາວນະຄອນຫລວງວຽງຈັນຈໍານວນຫລວງຫລາຍ ໂບກທຸງຊາດສອງປະເທດ ເພື່ອຂໍ່ານັບຊົມເຊີຍການເດີນທາງມາເຖິງ ນະຄອນຫລວງວຽງຈັນ ຂອງຄະນະຢ່າງຄຶກຄື້ນ.
ພິທີຕ້ອນຮັບສະຫາຍ ຫງວຽນ ຟູຈ້ອງ ເລຂາທິການໃຫຍ່ ຄະນະບໍລິຫານງານ ສູນກາງ ພັກກອມມູນິດຫວຽດນາມ ຢ່າງເປັນທາງການ ໄດ້ຈັດຂຶ້ນຢ່າງສົມກຽດທີ່ທໍານຽບປະທານປະເທດ ໂດຍ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງ ພັກ ປະຊາຊົນປະຕິວັດລາວ ແລະ ບັນດາສະຫາຍການນໍາຂັ້ນສູງຂອງລາວ ເຂົ້າຮ່ວມຢ່າງພ້ອມພຽງ.
ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນປະຕິວັດລາວ ປະທານປະເທດ ໄດ້ນໍາສະຫາຍ ເລຂາທິຫານໃຫຍ່ ຫງວຽນ ຟູຈ້ອງ ໄປຍັງແທ່ນກຽດຕິຍົດ ເພື່ອເຄົາລົບທຸງຊາດ ຫວຽດນາມ-ລາວ ຕາມລໍາດັບ ສະຫາຍ ບຸນຍັງ ວໍລະຈິດ ນໍາສະຫາຍ ຫງວຽນ ຟູຈ້ອງ ກວດແຖວທະຫານກອງກຽດຕິຍົດ ກອງທັບປະຊາຊົນລາວ ແລະ ແນະນໍາ ຄະນະຕ້ອນຮັບທາງການ ຝ່າຍລາວ ແລະ ຄະນະຜູ້ແທນຝ່າຍຫວຽດນາມ.
ພາຍຫລັງສໍາເລັດພິທີຕ້ອນຮັບຢ່າງເປັນທາງການ ທີ່ທໍານຽບປະທານປະເທດ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນປະຕິວັດລາວ, ປະທານປະເທດ ພ້ອມດ້ວຍການນໍາຂັ້ນສູງ ພັກ-ລັດ ສປປ ລາວ ໄດ້ພົບປະເຈລະຈາກັບ ສະຫາຍ ຫງວຽນ ຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ພ້ອມຄະນະ ຜູ້ແທນຂັ້ນສູງພັກ-ລັດ ສສ ຫວຽດນາມ. ໃນການພົບປະເຈລະຈາ ສະຫາຍ ບຸນຍັງ ວໍລະຈິດ ກ່າວສະແດງ ຄວາມຍິນດີຕ້ອນຮັບ ສະຫາຍ ຫງວຽນ ຟູຈ້ອງ ພ້ອມດ້ວຍຄະນະ ທີ່ມາຢ້ຽມຢາມສັນຖະວະໄມຕີ ສປປ ລາວ ຢ່າງເປັນທາງການ ໄດ້ນໍາເອົາມິດຈິດມິດໃຈອັນດູດດື່ມ, ຄວາມສາມັກຄີພິເສດອັນສະໜິດສະໜົມ, ບໍລິສຸດຜຸດຜ່ອງຈາກ ພັກ-ລັດ ແລະ ປະຊາຊົນຫວຽດນາມ ອ້າຍນ້ອງມາສູ່ ພັກ-ລັດ ແລະ ປະຊາຊົນລາວ ສະຫາຍເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ໄດ້ຕີລາຄາສູງຕໍ່ການມາຢ້ຽມຢາມຂອງສະຫາຍເລຂາທິການໃຫຍ່ ຫງວຽນ ຟູຈ້ອງ ເຊິ່ງເປັນການປະກອບສ່ວນອັນສໍາຄັນ ເຂົ້າໃນການເພີ່ມທະວີສາຍພົວພັນມິດຕະພາບ ອັນເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ປະທານໂຮ່ຈີ່ມິງ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານສຸພານຸວົງ ທີ່ເຄົາລົບຮັກເປັນຜູ້ສ້າງ, ຖະນຸຖະຖອມ ແລະ ໄດ້ຮັບການເສີມຂະຫຍາຍ ໂດຍບັນດາການນໍາຮຸ່ນຕ່າງໆ, ບັນດານັກຮົບປະຕິວັດ ແລະ ປະຊາຊົນສອງປະເທດ ໃຫ້ນັບມື້ນັບແໜ້ນແຟ້ນ, ເລິກເຊີ່ງ ແລະ ເກີດດອກອອກຜົນຍິ່ງໆຂຶ້ນ.
ສະຫາຍ ຫງວຽນ ຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ກ່າວສະແດງຄວາມປິຕິຍິນດີ ເປັນຢ່າງຍິ່ງ ທີ່ໄດ້ນໍາພາຄະນະຜູ້ແທນຂັ້ນສູງ ພັກ-ລັດ ສສ ຫວຽດນາມ ເດີນ ທາງມາຢ້ຽມຢາມສັນຖະວະໄມຕີ ສປປ ລາວ ຢ່າງເປັນທາງການເປັນຄັ້ງທໍາອິດ ພາຍຫລັງທີ່ໄດ້ຮັບເລືອກຕັ້ງ ເປັນເລຂາທິການໃຫຍ່ອີກຄັ້ງໃໝ່ ໃນກອງປະຊຸມໃຫຍ່ ຄັ້ງທີ XII ຂອງພັກກອມມູນິດຫວຽດນາມ ເຊິ່ງເປັນການສະແດງເຖິງ ຄວາມມີຊີວິດຊີວາແຫ່ງສາຍພົວພັນມິດຕະພາບ ອັນເປັນມູນເຊື້ອ, ຄວາມສາມັກຄີພິເສດ ຫວຽດນາມ-ລາວ ສະແດງຄວາມຂອບອົກຂອບໃຈຢ່າງສູງ ຕໍ່ການຕ້ອນຮັບສົມກຽດ ແລະ ສະໜິດສະໜົມ ບົນນ້ຳໃຈມິດຕະພາບທີ່ຍິ່ງໃຫຍ່, ຄວາມສາມັກຄີພິເສດຖານສະຫາຍອ້າຍນ້ອງ ຈາກສະຫາຍການນໍາຂັ້ນສູງ ພັກ-ລັດ ແລະປະຊາຊົນລາວ ທີ່ມີຕໍ່ຄະນະ ສະຫາຍ ເລຂາທິການໃຫຍ່ ຫງວຽນ ຟູຈ້ອງ ເຊື່ອໝັ້ນວ່າພາຍໃຕ້ການນໍາພາຂອງ ພັກປະຊາຊົນປະຕິວັດລາວ ຈະສືບຕໍ່ຍາດໄດ້ຜົນງານອັນໃໝ່ໃຫຍ່ຫລວງກວ່າເກົ່າ, ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ໃຫ້ປະກົດຜົນເປັນຈິງ.
ສອງຝ່າຍຍັງໄດ້ແຈ້ງ ໃຫ້ກັນຊາບ ສະພາບການພົ້ນເດັ່ນ ຂອງແຕ່ລະພັກ, ແຕ່ລະປະເທດ, ຕີລາຄາການພົວພັນຮ່ວມມື ໃນໄລຍະຜ່ານມາ ແລະ ປຶກສາຫາລືທິດທາງ ຮ່ວມມືໃນຕໍ່ໜ້າ ເພື່ອນໍາເອົາການພົວພັນພິເສດ ລະຫວ່າງ ສອງປະເທດກ້າວສູ່ຈຸດສູງອັນໃໝ່, ພາຍຫລັງການພົບປະສອງຝ່າຍ ສະຫາຍ ເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ແລະ ສະຫາຍເລຂາທິການໃຫຍ່ ຫງວຽນ ຟູຈ້ອງ ໄດ້ເປັນສັກຂີພິຍານ ໃນການລົງນາມບັນດາເອກະສານຮ່ວມມື ລະຫວ່າງ ສອງພັກ-ລັດຖະບານ ຈໍານວນ 6 ສະບັບ ຄື: ບົດບັນທຶກຊ່ວຍຈໍາ ວ່າດ້ວຍການຊ່ວຍເຫລືອ ການກໍ່ສ້າງໂຮງຮຽນສາມັນຢູ່ແຂວງບໍລິຄໍາໄຊ, ບົດບັນທຶກຊ່ວຍຈໍາ ລະຫວ່າງ ກະຊວງໂຍທາທິການ ແລະ ຂົນສົ່ງ ສປປ ລາວ ແລະ ກະຊວງຄົມມະນາຄົມ ແລະ ຂົນສົ່ງ ສສ ຫວຽດນາມ ວ່າດ້ວຍການກໍ່ສ້າງເສັ້ນທາງດ່ວນ ວຽງຈັນ-ຮ່າໂນຍ, ຂໍ້ຕົກລົງ ລະຫວ່າງ ກະຊວງໂຍທາທິການ ແລະ ຂົນສົ່ງ ສປປ ລາວ ແລະ ກະຊວງຄົມມະນາຄົມ ແລະ ຂົນສົ່ງ ສສ ຫວຽດນາມ ວ່າດ້ວຍການຈັດຕັ້ງປະຕິບັດ ບົດບັນທຶກຍຸດທະສາດການຮ່ວມມືດ້ານຄົມມະນາຄົມຂົນສົ່ງ ໄລຍະ 2016-2020, ຂໍ້ຕົກລົງວ່າດ້ວຍການຮ່ວມມືຍຸດທະສາດ ລາວ-ຫວຽດນາມ ຢູ່ແຂວງຫົວພັນ ແລະ ແຂວງຊຽງຂວາງ ແລະ ຂໍ້ຕົກລົງວ່າດ້ວຍ ການຮ່ວມມືລະຫວ່າງ ສູນກາງແນວລາວສ້າງຊາດ ແລະ ຄະນະຂົນຂວາຍປະຊາຊົນສູນກາງຫວຽດນາມ.
ໃນຕອນແລງ ສະຫາຍ ຫງວຽນ ຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ແລະ ຜູ້ແທນຂັ້ນສູງພັກ-ລັດ ສສ ຫວຽດນາມ ໄດ້ພົບປະຢ້ຽມຢາມ ສະຫາຍ ທອງລຸນ ສີສຸລິດ ກໍາມະການກົມການເມືອງສູນກາງພັກ, ນາຍົກລັດຖະມົນຕີແຫ່ງ ສປປ ລາວ ທີ່ສໍານັກງານນາຍົກລັດຖະມົນຕີ, ພົບປະຢ້ຽມຢາມ ສະຫາຍ ນາງ ປານີ ຢ່າທໍ່ຕູ້ ກໍາມະການກົມການເມືອງສູນກາງພັກ ປະທານສະພາແຫ່ງຊາດ ທີ່ຫໍສະພາແຫ່ງຊາດ, ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ແລະ ຕ້ອນຮັບການເຂົ້າຢ້ຽມຂໍ່ານັບ ຂອງສະຫາຍ ວິໄລວົງ ບຸດດາຄໍາ ກໍາມະການສູນກາງພັກ, ປະທານກໍາມາທິການແຜນການ, ການເງິນ ແລະ ກວດສອບ ສະພາແຫ່ງຊາດ ທັງເປັນປະທານ ສະມາຄົມມິດຕະພາບລາວ-ຫວຽດນາມ ຂັ້ນສູນກາງ.
ໃນຕອນຄໍ່າ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນປະຕິວັດລາວ, ປະທານປະເທດ ເປັນເຈົ້າພາບຈັດງານລ້ຽງ ຕ້ອນຮັບເປັນກຽດແກ່ ສະຫາຍ ຫງວຽນ ຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ພ້ອມດ້ວຍຄະນະຜູ້ແທນຂັ້ນສູງ ພັກ-ລັດ ສສ ຫວຽດນາມ ທີ່ທໍານຽບປະທານປະເທດ. ໃນບົດປາໄສກ່າວໃນງານລ້ຽງ ສະຫາຍ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດ ໄດ້ສະແດງຄວາມຂໍ່ານັບຮັບຕ້ອນ ແລະ ຕີລາຄາສູງ ຕໍ່ການມາຢ້ຽມຢາມຂອງ ສະຫາຍ ຫງວຽນ ຟູຈ້ອງ ເລຂາທິການໃຫຍ່ ແລະ ຜົນສໍາເລັດຂອງການພົບປະເຈລະຈາສອງຝ່າຍ ເຊິ່ງຈະເປັນການປະກອບສ່ວນ ນໍາເອົາການພົວພັນພິເສດ ກ້າວສູ່ຈຸດສຸມອັນໃໝ່ ສະຫາຍ ບຸນຍັງ ວໍລະຈິດ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ບັນດາຜົນສໍາເລັດທີ່ສໍາຄັນໃຫຍ່ຫລວງຮອບດ້ານ ຂອງປະຊາຊົນຫວຽດນາມອ້າຍນ້ອງ ພາຍໃຕ້ການນໍາພາອັນສະຫລາດສ່ອງໃສ ຂອງພັກກອມມູນິດຫວຽດນາມ ເຮັດໃຫ້ປະເທດຊາດຫວຽດນາມ ມີສະຖຽນລະພາບທາງດ້ານການເມືອງ, ເສດຖະກິດຂະຫຍາຍຕົວ ຢ່າງຕໍ່ເນື່ອງ ຖານະບົດບາດຂອງຫວຽດນາມ ໄດ້ຮັບການຍົກສູງ ໃນເວທີພາກພື້ນ ແລະ ສາກົນ. ພ້ອມທັງ ສະແດງຄວາມຂອບອົກຂອບໃຈຢ່າງຈິງໃຈ ແລະ ຄວາມຮູ້ບຸນຄຸນອັນເລິກເຊິ່ງຂອງພັກ, ລັດ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການສະໜັບສະໜູນຊ່ວຍເຫລືອອັນລໍ້າຄ່າ, ທັນການ ແລະ ມີປະສິດທິຜົນ ແກ່ພາລະກິດຕໍ່ສູ້ກູ້ຊາດເມື່ອກ່ອນ ກໍຄືໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຂອງປະຊາຊົນລາວ ໃນປັດຈຸບັນ ແລະ ຢືນຢັນວ່າ: ຈະສືບຕໍ່ຮ່ວມມືກັບ ສະຫາຍຫວຽດນາມອ້າຍນ້ອງ, ສືບຕໍ່ເພີ່ມທະວີ ແລະ ເສີມຂະຫຍາຍມູນເຊື້ອ ແຫ່ງຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ ທີ່ໄດ້ຜ່ານການທົດສອບ ດ້ວຍເລືອດເນື້ອ ແລະ ການເວລາເປັນເວລາຫລາຍທົດສະວັດນັ້ນ ໃຫ້ໝັ້ນຄົງທະນົງແກ່ນ ຕະຫລອດໄປ ແລະ ອວຍພອນໃຫ້ ປະຊາຊົນຫວຽດນາມອ້າຍນ້ອງ ຈົ່ງສືບຕໍ່ຍາດໄດ້ ຜົນສໍາເລັດໃໝ່ ໃຫຍ່ຫລວງກວ່າເກົ່າ ໃນພາລະກິດສ້າງສາ ພັດທະນາ ປະເທດຊາດ, ປະຕິບັດມະຕິກອງປະຊຸມໃຫຍ່ ຄັ້ງທີ XII ຂອງພັກ ໃຫ້ປະກົດຜົນເປັນຈິງ.
ສະຫາຍ ຫງວຽນ ຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ສະແດງຄວາມດີໃຈ ເປັນຢ່າງຍິ່ງ ທີ່ໄດ້ມາຢ້ຽມຢາມລາວ ເປັນປະເທດທໍາອິດ ພາຍຫລັງທີ່ຖືກເລືອກຕັ້ງເປັນເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ອີກສະໄໝໜຶ່ງ ໃນກອງປະຊຸມໃຫຍ່ ຄັ້ງທີ XII ຂອງພັກຜ່ານມາ, ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສະໜິດສະໜົມ ຖານສະຫາຍອ້າຍນ້ອງ, ຕີລາຄາການພົວພັນ ຮ່ວມມືສອງຝ່າຍ ທີ່ຍາດໄດ້ຜົນສໍາເລັດໃນຫລາຍດ້ານ ແລະ ຈະພ້ອມກັບສະຫາຍລາວ ສືບຕໍ່ເພີ່ມທະວີສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ, ສືບຕໍ່ນັບມື້ນັບໜັກແໜ້ນ ເລິກເຊິ່ງ ແລະ ເກີດດອກອອກຜົນຍິ່ງໆຂຶ້ນ, ສະຫາຍເລຂາທິການໃຫຍ່ ຫງວຽນ ຟູຈ້ອງ ໄດ້ຕີລາຄາ ແລະ ຊົມເຊີຍບັນດາຜົນສໍາເລັດທີ່ສໍາຄັນຫລາຍດ້ານ ຂອງປະຊາຊົນລາວອ້າຍນ້ອງທີ່ຍາດມາໄດ້ ໃນໄລຍະຜ່ານມາ ໂດຍພາຍໃຕ້ການນໍາພາອັນຖືກຕ້ອງຂອງພັກປະຊາຊົນປະຕິວັດລາວ ແລະ ອວຍພອນໃຫ້ປະຊາຊົນລາວ ຈົ່ງຍາດໄດ້ຜົນສໍາເລັດ ໃນການປະຕິບັດມະຕິກອງປະຊຸມໃຫຍ່ ຄັ້ງທີ X ຂອງ ພັກປະຊາຊົນປະຕິວັດລາວ ໃຫ້ປະກົດຜົນເປັນຈິງ, ສ້າງໃຫ້ປະເທດລາວຕາມທິດປະຊາຊົນຮັ່ງມີ, ປະເທດເຂັ້ມແຂງ, ສົງຄົມມີຄວາມປອງດອງ, ຍຸຕິທໍາ ແລະ ສີວິໄລ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!