ສຳນັກຂ່າວເອເອບພີ ລາຍງານໃນວັນທີ 23 ພະຈິກນີ້ວ່າ ກຳປັ່ນສູ້ຮົບ USS Zumwalt ຊຶ່ງເປັນກຳປັ່ນສູ້ຮົບທີ່ໃຫຍ່ ແລະ ທັນສະໄໝທີ່ສຸດຂອງ ສະຫະລັດອາເມຣິກາ ປະສົບບັນຫາຂັດຂ້ອງຢູ່ຄອງປານາມາ ທັງທີ່ຫາກໍຖືກນຳເຂົ້າປະຈຳການໄດ້ບໍ່ພໍເທົ່າໃດອາທິດ ເມື່ອວັນທີ 15 ຕຸລາທີ່ຜ່ານມານີ້ເທົ່ານັ້ນ, ຕາມການລາຍງານຂອງກອງທັບສະຫະລັດອາເມຣິກາ ກຳປັ່ນສູ້ຮົບດັ່ງກ່າວນີ້ ເກີດບັນຫາລະຫວ່າງການເດີນທາງ ຈາກເມືອງບັນຕິມໍ ໄປຍັງຊານດິເອໂກ ແຕ່ເກີດປະສົບເຫດຂັດຂ້ອງທາງເຕັກນິກ ຈຳເປັນຕ້ອງໄດ້ຖືກເຮືອລາກຈູງ ເຂົ້າໄປຮັບການສ້ອມແປງດ່ວນ ຢູ່ສະຖານີທະຫານເຮືອກອງທັບສະຫະລັດຯ ທີ່ຢູ່ພາຍໃນບໍລິເວນໃກ້ຄຽງ.

USS Zumwalt ມີມູນຄ່າ 4.3 ຕື້ໂດລາ, ມີຄວາມຍາວປະມານ 180 ແມັດ ແລະ ມີນ້ຳໜັກປະມານ 15,000​ ໂຕນ ຊຶ່ງຖືເປັນກຳປັ່ນສູ້ຮົບທີ່ມີຂະໜາດໃຫຍ່ທີ່ສຸດ ໃນກອງທັບເຮືອສະຫະລັດອາເມຣິກາ ໃນປັດຈຸບັນ, ພ້ອມກັນນີ້ ກຳປັ່ນສູ້ຮົບລຳດັ່ງກ່າວ ຍັງມີຄວາມສາມາດອຳພາງຕົວ ຈາກການກວດຈັບຂອງເຣດາຂອງເຮືອລຳອື່ນໆໄດ້ ໂດຍຈະຖືກຈັບສັນຍານ ປະກົດເປັນເຮືອຂະໜາດນ້ອຍ ບໍ່ຕ່າງຈາກເຮືອຫາປາທົ່ວໆໄປ, ນອກນັ້ນ ຍັງຕິດຕັ້ງອາວຸດຍຸດໂທປະກອນທີ່ທັນສະໄໝ ແລະ ມີປະສິດທິພາບສູງກວ່າເກົ່າ ນັບເປັນກຳປັ່ນສູ້ຮົບທີ່ມີຄວາມທັນສະໄໝທີ່ສຸດ ຂອງກອງທັບເຮືອສະຫະລັດອາເມຣິກາ.

 
ຕິດຕາມເຮົາທາງFacebook ກົດຖືກໃຈເລີຍ!