ສຳນັກຂ່າວຕ່າງປະເທດ ລາຍງານໃນວັນທີ 22 ພະຈິກຜ່ານມານີ້ວ່າ ທາງການຈີນ ໄດ້ຈັດສ້າງສູນລີ້ໄພຊົ່ວຄາວ ໃຫ້ແກ່ຊາວມຽນມາ ຈຳນວນຫລາຍກວ່າ 3,000 ຄົນ ຢູ່ບໍລິເວນຊາຍແດນ ຈີນ-ມຽນມາ ຊຶ່ງພາກັນຫລົບໜີຈາກການສູ້ຮົບ ລະຫວ່າງກອງທັບມຽນມາ ແລະ ກຸ່ມຕິດອາວຸດຊົນເຜົ່າສ່ວນນ້ອຍ ທາງພາກເໜືອຂອງປະເທດ, ນອກຈາກນັ້ນ ການສູ້ຮົບດັ່ງກ່າວ ຍັງມີລູກປືນຫລົງໄປຕົກຢູ່ໃນດິນແດນຈີນອີກດ້ວຍ ຊຶ່ງສ້າງຄວາມເສຍຫາຍເລັກໜ້ອຍ, ແນວໃດກໍຕາມ ບໍ່ມີຜູ້ເສຍຊີວິດຈາກລູກຫລົງດັ່ງກ່າວ.
ປັດຈຸບັນ ຈີນໄດ້ເພີ່ມທະວີສະພາວະຕິດຕາມເຫດການສູ້ຮົບດັ່ງກ່າວ ຢູ່ບໍລິເວນຊາຍແດນຢ່າງໃກ້ຊິດ ໂດຍໄດ້ສັ່ງໃຫ້ກອງທັບຢູ່ໃນທ່າກຽມພ້ອມຂັ້ນສູງ ແລະ ຍັງໄດ້ຮຽກຮ້ອງໃຫ້ທຸກຝ່າຍຂອງມຽນມາ ລະງັບການຕໍ່ສູ້ ແລະ ຄວາມຮຸນແຮງດັ່ງກ່າວ, ທັງນີ້ ກຸ່ມຕິດອາວຸດຊົນເຜົ່າສ່ວນນ້ອຍ ຈຳນວນ 4 ກຸ່ມ ໄດ້ດຳເນີນການໂຈມຕີ ກອງກຳລັງທະຫານກອງທັບມຽນມາ ຢູ່ບໍວິເວນພາກເໜືອຂອງປະເທດ ຊຶ່ງເປັນການທຳລາຍແຜນການຂໍ້ຕົກລົງສັນຕິພາບ ທີ່ລັດຖະບານມຽນມາຊຸດປັດຈຸບັນ ໄດ້ຕັ້ງເປົ້າໝາຍເອົາໄວ້.
ຕິດຕາມເຮົາທາງFacebook ກົດຖືກໃຈເລີຍ!