ເນື່ອງໃນໂອກາດຄົບຮອບ 10 ປີ ເລີ່ມອອກອາກາດ ຢ່າງເປັນທາງການ ຢູ່ນະຄອນຫລວງວຽງຈັນ ໃນວັນທີ 22 ພະຈິກນີ້. ທ່ານ Meng Long ຫົວໜ້າ CRI ປະຈໍາລາວ ໄດ້ຖະແຫລງຂ່າວຕໍ່ສື່ມວນຊົນໃຫ້ຮູ້ວ່າ: ຕະຫລອດໄລຍະ 10 ປີ ຜົນສໍາເລັດ ໃນການປະກອບສ່ວນ ວຽກງານສື່ມວນຊົນ ຂອງວິທະຍຸສາກົນ ແຫ່ງປະເທດຈີນ FM93 ຫລື CRI ນັບແຕ່ເລີ່ມອອກອາກາດ ຢ່າງເປັນທາງການ ຢູ່ນະຄອນຫລວງວຽງຈັນ ແຕ່ປີ 2006 ແລະ ໃນປີ 2011 ໄດ້ສ້າງຕັ້ງສໍານັກງານ CRI ປະຈໍາລາວ ເຊິ່ງໄດ້ມີການ ປະກອບສ່ວນອັນສໍາຄັນ ເຂົ້າໃນການການເຜີຍແຜ່ ຂໍ້ມູນຂ່າວສານ, ເນື້ອໃນ, ສາລະບັນເທິງຕ່າງໆ ເພື່ອຕອບສະໜອງໃຫ້ແກ່ສັງຄົມ ນັບມື້ນັບດີຂຶ້ນເປັນກ້າວໆ. ປັດຈຸບັນ ໄດ້ມີການອອກອາກາດ 19 ຊົ່ວໂມງ ນັບແຕ່ 5:00 ໂມງເຊົ້າ-24:00 ໂມງຄໍ່າ ຂອງທຸກມື້ ມີ 17 ລາຍການ ເຊັ່ນ: ແດນມັງກອນ, ວັດທະນະທໍາຈີນ, ຮຽນພາສາຈີນ, ຂ່າວພາຍໃນລາວ ແລະ ຕ່າງປະເທດ, ລາຍການພາເພີນ, ລາຍການສາລະໜ້າຮູ້ ແລະ ອື່ນໆ.
ປັດຈຸບັນນອກຈາກການລາຍງານຂ່າວ ແລະ ອອກອາກາດ ເປັນປະຈໍາແລ້ວ CRI ຍັງໄດ້ອອກແຮງພັດທະນາວຽກງານສື່ໃໝ່ ໂດຍໄດ້ສ້າງໜ້າເພສ CRI-FM93, ລາຍການສອງສ່ຽວ, ລາຍການກິນທີ່ນີ້ທ່ຽວທີ່ນີ້ ແລະ ລາຍການກະວີ ເພື່ອເຈົ້າຢູ່ໃນເຟດບຸກ (facebook) ເຊິ່ງໄດ້ຮັບຄວາມນິຍົມຊົມຊອບຫລາຍກວ່າ 4 ແສນຄົນ. ວີແຊດຂອງ CRI ຄື (cri_lao) ໄດ້ເປີດການນໍາໃຊ້ ຢ່າງເປັນທາງການ ໃນປີ 2014 ທີ່ໄດ້ເຜີຍແຜ່ເນື້ອໃນທັງພາສາລາວ ແລະ ພາສາຈີນ, ນອກນັ້ນ ກໍຍັງມີວາລະສານພາເພີນຂອງ CRI ໄດ້ພິມຈໍາໜ່າຍຢູ່ລາວ ໃນປີ 2013 ເຊິ່ງເປັນວາລະສານລາຍເດືອນ, ທັງໝົດມີ 84 ໜ້າ, ແຕ່ລະເດືອນ ພິມຈໍາໜ່າຍ 10 ພັນຫົວ, ເນື້ອໃນລວມແມ່ນກ່ຽວກັບ ວັດທະນະທໍາຈີນ, ການໄປມາຫາສູ່ກັນ ລະຫວ່າງ ລາວ-ຈີນ, ຂ່າວໂລກ ແລະ ອື່ນໆ.
ທ່ານ ກ່າວຕື່ມວ່າ: ນອກຈາກການປະກອບສ່ວນ ອັນສໍາຄັນຕ່າງໆແລ້ວ CRI ຍັງໄດ້ກາຍເປັນຂົວແຫ່ງຄວາມເຂົ້າໃຈ, ມິດຕະພາບ ແລະ ການຮ່ວມມື ລະຫວ່າງ ປະຊາຊົນ ລາວ-ຈີນ ແລະ ການແລກປ່ຽນຮ່ວມມືກັບ ວົງການຕ່າງໆຂອງລາວ ໂດຍຜ່ານກິດຈະກໍາຕ່າງໆ ໃນການລະນຶກ ການສ້າງສາຍພົວພັນ ທາງການທູດ ລະຫວ່າງ ຈີນ-ລາວ ຄົບຮອບ 55 ປີ. ພ້ອມນັ້ນ, ກໍໄດ້ຮ່ວມມືກັບ ພາກສ່ວນສື່ມວນຊົນລາວ, ໄດ້ແລກປ່ຽນຂໍ້ມູນຂ່າວສານ ກັບສຳນັກຂ່າວສານປະເທດລາວ, ໜັງສືພີມປະຊາຊົນ, ສະຖານີໂທລະພາບ ແຫ່ງຊາດລາວ, ວິທະຍຸກະຈາຍສຽງ ແຫ່ງຊາດລາວ ແລະ ໃນປີ 2015 CRI ແລະ ສຳນັກຂ່າວສານ ປະເທດລາວ ໄດ້ເຊັນສັນຍາການຮ່ວມມື ເຊິ່ງສອງຝ່າຍເຫັນດີ ເພີ່ມທະວີການແລກປ່ຽນ ດ້ານຂໍ້ມູນຂ່າວສານ ແລະ ບຸກຄະລາກອນ ຕື່ມອີກ.
ທ່ານ ຍັງໃຫ້ຮູ້ຕື່ມວ່າ: CRI ແມ່ນໄດ້ສ້າງຕັ້ງຂຶ້ນ ໃນປີ 1941, ຈັດລາຍການກະຈາຍສຽງ ດ້ວຍພາສາຕ່າງປະເທດ ກວ່າ 60 ພາສາ, ກະຈ່າຍສຽງ 2000 ກວ່າຊົ່ວໂມງ ຕໍ່ພາຍໃນ ແລະ ຕ່າງປະເທດ. ປັດຈຸບັນ ກໍາລັງພັດທະນາ ເປັນກຸ່ມສື່ສານສາກົນ ທັນສະໄໝ ທີ່ມີໜັງສືພິມ, ວາລະສານ, ວິທະຍຸ, ເວັບໄຊ, ໂທລະພາບ ແລະ ອື່ນໆ. ໃນຫລາຍປີມານີ້ CRI ໄດ້ເລັ່ງສ້າງສໍານັກງານ ຢູ່ຕ່າງປະເທດ ດ້ວຍຫລາຍຮູບການ ໂດຍໄດ້ສ້າງປະຈໍາຢູ່ຕົວເມືອງໃຫຍ່ ຂອງຕ່າງປະເທດ ຈໍານວນ 90 ແຫ່ງ, ສໍານັກຂ່າວໃຫຍ່ 7 ແຫ່ງປະຈໍາຢູ່ 7 ພາກພື້ນໃນໂລກ, ສໍານັກຂ່າວ ປະຈໍາຕ່າງປະເທດ 30 ກວ່າແຫ່ງ, ຄື້ນວິທະຍຸ 100 ກວ່າແຫ່ງ, ຫ້ອງຮຽນຂົງຈື້ທາງວິທະຍຸ 10 ກວ່າແຫ່ງ ແລະ ໄດ້ຕັ້ງສໍານັກຂ່າວ ຢູ່ບັນດາແຂວງ, ກໍາແພງນະຄອນ, ເຂດປົກຄອງຕົນເອງ, ພ້ອມທັງຮົງກົງ ແລະ ມາກາວຂອງຈີນ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!