ລາວຈະຕິດຕັ້ງເຄື່ອງກວດສານກໍາມັນຕະພາບລັງສີຢູ່ສະໜາມ ບິນສາກົນວັດໄຕ, ນະຄອນ ຫລວງວຽງຈັນໃນໄວໆນີ້, ຫລັງຈາກໄດ້ຮັບການຊ່ວຍເຫລືອເຄື່ອງດັ່ງກ່າວຈາກອົງການພະລັງ ງານນິວເຄລຍສາກົນ, ພາຍໃຕ້ໂຄງການຮ່ວມມືລະຫວ່າງສະຖາບັນນິເວດວິທະຍາ ແລະ ເຕັກໂນໂລຊີຊີວະພາບກະຊວງວິທະຍາສາດ ແລະ ເຕັກໂນໂລຊີ ແລະ ສູນປະສານງານຮ່ວມມືຄົ້ນຄວ້າກໍາມັນຕະພາບລັງສີຂອງສະຫະ ພາບເອີຣົບ.
ເຄື່ອງກວດດັ່ງກ່າວປະກອບມີ: HDS101 GN ຈໍານວນ 2 ເຄື່ອງທີ່ສາມາດກວດລັງສີອານຟາ, ເບຕາ, ກາມາ, ນິວເຄລຍ ແລະ ສາມາດຈໍາແນກທາດທີ່ປ່ອຍລັງສີ ແລະ ອ່ານຄ່າການປ່ອຍລັງສີ ແລະ PM1730 ຈໍານວນ 10 ເຄື່ອງປະເພດພົກພາສາມາດກວດລັງສີອານຟາ, ເບຕາ, ກາມາ ແລະ ນິວເຄລຍ ແຕ່ບໍ່ສາມາດອ່ານຄ່າການປ່ອຍລັງສີ, ຊຶ່ງລວມມີມູນຄ່າຫລາຍກວ່າ 238 ພັນໂດລາສະ ຫະລັດ, ໂດຍຈະມອບໃຫ້ກົມການບິນພົນລະເຮືອນກະຊວງໂຍທາທິການ ແລະ ຂົນສົ່ງນໍາໃຊ້ໃນການກວດຫາວັດສະດຸກໍາມັນຕະພາບລັງສີຢູ່ສະໜາມບິນວັດໄຕຢ່າງມີຄຸນນະພາບ.
ພະນັກງານຂັ້ນສູງຈາກສະຖາບັນນິເວດວິທະຍາ ແລະ ເຕັກໂນໂລຊີຊີວະພາບ ໃຫ້ຮູ້ວ່າ: ສານກໍາມັນຕະພາບລັງສີ, ເປັນສານເຄມີທີ່ອັນຕະລາຍຕໍ່ສຸຂະພາບ, ບາງປະເພດແມ່ນເຖິງຂັ້ນເຮັດໃຫ້ຄົນທີ່ໄດ້ຮັບທາດດັ່ງກ່າວເສຍຊີວິດໃນບໍ່ເທົ່າໃດວິນາທີ. ສະນັ້ນການຕິດຕັ້ງເຄື່ອງກວດທາດດັ່ງກ່າວຈຶ່ງເປັນມາດຕະການປ້ອງກັນຄວາມປອດໄພຂັ້ນສູງ, ເພື່ອສະກັດກັ້ນການລັກລອບນໍາເຂົ້າສານເຄມີອັນຕະລາຍຜ່ານສະໜາມບິນສາກົນ, ຊຶ່ງຜ່ານມາເຄື່ອງກວດສານກໍາມັນຕະພາບລັງສີແມ່ນນໍາໃຊ້ສະເພາະໃນວຽກງານຄວາມໝັ້ນຄົງຂອງຊາດເທົ່ານັ້ນ.
ພິທີມອບ-ຮັບເຄື່ອງກວດດັ່ງກ່າວໄດ້ຈັດຂຶ້ນໃນວັນທີ 22 ພະຈິກນີ້, ທີ່ໂຮງແຮມລາວພລາຊາ, ນະຄອນຫລວງວຽງຈັນ, ໂດຍມີທ່ານເອກອັກຄະລັດຖະທູດສະຫະພາບເອີຣົບປະຈໍາລາວ ລີໂອ ຟາແບກ, ທ່ານ ລັດສະໝີ ພັນທະວົງ ຮັກສາການຫົວໜ້າສະຖາບັນນິເວດວິທະຍາ ແລະ ເຕັກໂນໂລຊີຊີວະພາບ, ທ່ານ ບົວຂາວ ຂຸນພຣະຍາ ຮອງຫົວໜ້າກົມການບິນພົນລະເຮືອນ ແລະ ຜູ້ຕາງໜ້າຈາກພາກ ສ່ວນກ່ຽວຂ້ອງຕ່າງໆເຂົ້າຮ່ວມ. ພ້ອມນີ້ກໍໄດ້ຈັດຊຸດຝຶກອົບຮົມການນໍາໃຊ້ເຄື່ອງກວດດັ່ງກ່າວນັບທັງພາກທິດສະດີ ແລະ ການປະຕິບັດຕົວຈິງຈາກຊ່ຽວຊານອົງການພະລັງງານນິວເຄລຍສາກົນເປັນເວລາ 3 ວັນ ເພື່ອຮັບປະກັນໃຫ້ເຈົ້າໜ້າທີ່ກ່ຽວຂ້ອງໄດ້ນໍາໃຊ້ເຄື່ອງດັ່ງກ່າວມີປະສິດທິພາບສູງ.
ຂ່າວຈາກ: ໜັງສືພິມລາວພັດທະນາ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!