ຖືວ່າເປັນຂ່າວດີສຳລັບປະຊາຊົນ ໃນການຊື້ຊີ້ນໝູ ເພື່ອບໍລິໂພກ, ທາງກະຊວງອຸດສາຫະກຳ ແລະການຄ້າ ຮ່ວມກັບພະແນກອຸດສາຫະກຳ ແລະການຄ້າ ນະຄອນຫຼວງ ວາງວິໄສທັດ ໄລຍະຍາວ ກ່ຽວກັບການຄຸ້ມຄອງລາຄາ

ໃນຕອນບ່າຍຂອງວັນທີ 21 ພະຈິກ ທາງພະແນກອຸດສາຫະກຳ ແລະການຄ້າ ນະຄອນຫຼວງວຽງຈັນ ໄດ້ເປີດກອງປະຊຸມ ຮ່ວມກັບຜູ້ປະກອບການ ແລະຜູ້ເລາະເກັບຊື້ໝູ (ນາຍຮ້ອຍ) ເພື່ອກຳນົດປັບ ລົງລາຄາຂາຍໝູຕາມທ້ອງຕະຫຼາດ.

ທ່ານ ເບີລິນ ເພັດຈັນທະລາດ ຫົວໜ້າພະແນກອຸດສາຫະກຳ ແລະການຄ້ານະຄອນຫຼວງ ໄດ້ເວົ້າວ່າ: ສຳລັບລາຄາໃໝ່ ກຳນົດຂາຍໜ້າຟາມໝູເປັນລາຄາ 19,000 ກີບຕໍ່ກິໂລ (ນໍ້າໜັກໝູ 100 ກິໂລ), ນາຍຮ້ອຍ ກຳນົດລາຄາ 23,000 ກີບຕໍ່ກິໂລ, ຂອດນາຍຮ້ອຍສົ່ງໃຫ້ ລູກຂຽງໃນທ້ອງຕະຫຼາດ ຊີ້ນລວມ 28,000 ກີບຕໍ່ກິໂລ, ຫຼັງຈາກນັ້ນລູກຂຽງ ຫຼືແມ່ຄ້າຂາຍຍ່ອຍ ໃນທ້ອງຕະຫຼາດຈະມາແຍກປະເພດຂາຍ ໂດຍກຳນົດໃຫ້ຂາຍຕໍ່ສົດ 33,000 ກີບ ແລະສູງສຸດ 35,000ກີບຕໍ່ກິໂລ ເຊິ່ງທີ່ປະຊຸມໄດ້ເປັນເອກະພາບຮັບຮອງເປັນທີ່ຮຽບຮ້ອຍ (ລາຄາດັ່ງກ່າວຈະມີການຫາລືຄືນຕາມກົນໄກຕະຫຼາດທຸກໆສາມເດືອນ) ຫຼັງຈາກນັ້ນ ໃນວັນທີ 22 ພະຈິກ 2016 ພະແນກອຸດສາຫະກຳ ແລະການຄ້າ ຈະອອກແຈ້ງການເພື່ອໃຫ້ທຸກພາກສ່ວນຈັດຕັ້ງປະຕິບັດ

ທ່ານເບີລິນ ເພັດຈັນທະລາດ ໄດ້ເວົ້າອີກວ່າ: ການແຈ້ງການປັບລາຄາໃນຄັ້ງນີ້ ເພື່ອເປັນການປົກປ້ອງສິດ, ຜົນປະໂຫຍດຜູ້ຊົມໃຊ້ໃຫ້ມີຄວາມຍຸດຕິທຳ ບົນພື້ນຖານກົນໄກຕະຫຼາດ, ຫຼີກລຽງ ການເອົາລັດເອົາປຽບກັນ ລະຫວ່າງຜູ້ຊື້ ແລະຜູ້ຂາຍ ທັງຮັບປະກັນໃຫ້ສັງຄົມ ມີຄວາມສະຫງົບ,

ຂ່າວ: ເສດຖະກິດ-ການຄ້າ