ລັດຖະບານລາວໄດ້ມອບຫລຽນໄຊແຮງງານໃຫ້ກັບນັກຮຽນທີ່ເຄີຍສ້າງຊື່ສຽງໃຫ້ກັບປະເທດລາວ ທີ່ຍາດໄດ້ຫລຽນຄຳ ໃນການແຂ່ງຂັນບົດຄົ້ນຄວ້າວິທະຍາສາດ ຢູ່ ສປ ຈີນ
ກົມພະລະ ແລະ ສິລະປະສຶກສາ, ກະຊວງສຶກສາທິການ ແລະກິລາ ໄດ້ຈັດພິທີປະດັບຫລຽນໄຊແຮງງານໃຫ້ກັບນັກຮຽນລາວ ທີ່ສາມາດຍາດໄດ້ 1 ຫລຽນຄຳ, 1 ຫລຽນເງິນ ແລະ 2 ຫລຽນທອງແດງ ໃນການແຂ່ງຂັນບົດຄົ້ນຄວ້າວິທະຍາສາດ ທີ່ ນະຄອນຊຽງໄຮ ສປ ຈີນ ໃນລະຫວ່າງວັນທີ 22-27 ກໍລະກົດ 2016 ທີ່ຜ່ານມາ (ນອກຈາກນີ້ຍັງໄດ້ປະດັບໃຫ້ກັບອາຈານນຳພາ ແລະ ຜູ້ອຳນວຍການໂຮງຮຽນ ທີ່ໄດ້ອົບຮົມນັກຮຽນໃຫ້ມີຄວາມຮູ້ຄວາມສາມາດ).
ເຊິ່ງພິທີປະດັບຫລຽນໄຊ ໄດ້ຈັດຂຶ້ນໃນຕອນເຊົ້າວັນສຸກທີ 11 ພະຈິກ 2016 ທີ່ຜ່ານມາການປະດັບຫລຽນຄັ້ງນີ້ແມ່ນ ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ ເປັນກຽດປະດັບຫລຽນໄຊ ຊັ້ນ I, ຊັ້ນ II ແລະ ຫລຽນກາແຮງງານ.
ຜົນງານທີ່ເຮັດໃຫ້ໄດ້ຮັບການປະດັບຫລຽນ
– ຫລຽນຄຳ 1 ຫລຽນ ແມ່ນໄດ້ຈາກບົດຄົ້ນຄວ້າ ຈູ່ຈີ່ໃນກອງຂີ້ຄວາຍ ຕົວແທນຈາກໂຮງຮຽນ ມສ ສົມປັນຍາ (ຮ່ວມກັບປະເທດສະຫະລັດອາເມລິກາ, ປະເທດຫວຽດນາມ ແລະ ປະເທດໄທ)
– ຫລຽນເງິນ 1 ຫລຽນ ແມ່ນບົດຄົ້ນຄວ້າ ການພະຈົນໄພຂອງມົດກັດໃບໄມ້ ຈາກໂຮງຮຽນ ມສ ໄຊຍະບູລີ (ຮ່ວມ)
– ຫລຽນທອງ 2 ຫລຽນ ແມ່ນບົດຄົ້ນຄວ້າ ເຜິ້ງກັບດອກໄມ້ ຈາກໂຮງຮຽນ ມສ ວຽງຈັນ ແລະ ບົດຄົ້ນຄວ້າ ຫຍ້າຝຣັ່ງ ຈາກໂຮງຮຽນ ມສ ໂນນສະຫວ່າງ (ຮ່ວມ) ເຊິ່ງນີ້ກໍ່ແມ່ນຜົນງານຂອງຮັກຮຽນລາວໃນການແຂ່ງຂັນບົດຄົ້ນຄວ້າວິທະຍາສາດ ພາຍໃຕ້ ວັນປະຫວັດສາດທຳມະຊາດໂລກ (Global Natural History Day) ໄດ້ຈັດຂຶ້ນໃນລະຫວ່າງວັນທີ 22-27 ກໍລະກົດ 2016 ມີທີມເຂົ້າຮ່ວມທັງຫມົດຈຳນວນ 97 ທີມ ຈາກ 10 ປະເທດ (USA, Hawaii, China, Hongkong, Vietnam, Thailand, Philippines, Laos, Myanmar and Cambodia)
ຂ່າວຈາກ: Lao Youth Radio FM 90.0 Mhz
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!