ການແຂ່ງຂັນກິລາເທຄວັນໂດ ທົ່ວປະເທດ ຊີງຂັນທ່ານເອກອັດຄະລັດຖະທູດ ສ ເກົາຫຼີ ປະຈຳສປປ ລາວ ຄັ້ງທີ 3 ປະຈຳປີ 2016 ເພື່ອເປັນການສົ່ງເສີມທັບນັກກິລາລາວ ໄດ້ມີການເຄື່ອນໄຫວຢ່າງຕໍ່ເນື່ອງ ພ້ອມທັງສ້າງໂອກາດໃຫ້ນັກກິລາທັງຮຸ່ນໃໝ່ ແລະ ເກົ່າ ຕັ້ງແຕ່ອາຍຸ 15 ປີ ໄດ້ຮ່ວມແຂ່ງຂັນເພື່ອສະສົມຄະແນນ ຈຳນວນ 120 ຄະແນນ ທີ່ສະຫະພັນກິລາເທຄວັນໂດແຫ່ງຊາດ ກໍານົດໄດ້ຕາມເງື່ອນຈຶ່ງສາມາດເຂົ້າຮ່ວມງານມະຫາກຳກິລາແຫ່ງຊາດ ຄັ້ງທີ 11​ ທີ່ແຂວງຊຽງຂວາງ ຮັບກຽດເປັນເຈົ້າພາບໃນຕົ້ນປີ 2018.

ພິທີຖະແຫຼງຂ່າວ ການກະກຽມເປີດການແຂ່ງຂັນກິລາເທຄວັນໂດ ທົ່ວປະເທດ ຊີງຂັນທ່ານເອກອັດຄະລັດຖະທູດ ສ ເກົາຫຼີ ປະຈຳສປປ ລາວ ຄັ້ງທີ 3 ປະຈຳປີ 2016 ໄດ້ມີຂຶ້ນ ເມື່ອວັນທີ 18 ພະຈິກ ຜ່ານມາ ທີ່ຫ້ອງການປະສານງານ ຄະນະກຳມະການໂອແລມປິກແຫ່ງຊາດລາວ ເມືອງຈັນທະບູລີ ນະຄອນ ຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງ ທ່ານ ສິງຄຳ ນາລິນ ຮອງຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ, ທ່ານ ກະເສມ ອິນທະລາ ຮອງເລຂາທິການຄະນະກຳມະການໂອແລມປິກແຫ່ງຊາດ ແລະ ທ່ານ ຄິກເຊີນຣີ ຕາງໜ້າສະຖານເອກອັກຄະລະຖະທູດ ສ ເກົາຫຼີ ປະຈຳ ສປປ ລາວ ພ້ອມດ້ວຍບັນດາຄະນະບໍລິຫານງານ ສະຫະພັນເທຄວັນໂດແຫ່ງຊາດລາວ ແລະ ແຂກຖືກເຊີນ ຄະຫຼອດຮອດບັນດາສື່ມວນຊົນທຸກຂະແໜງການເຂົ້າຮ່ວມ.

ໂອກາດນີ້, ທ່ານ ສີວັນນາກອນ ມະລີວັນ ຮອງປະທານສະຫະພັນ ເທຄວັນໂດແຫ່ງຊາດລາວ ກ່າວວ່າ: ລາຍການແຂ່ງຂັນຄັ້ງນີ້ ຈັດຂຶ້ນເປັນຄັ້ງທີ 3 ເປົ້າໝາຍສຳຄັນຫຼັກໆ ກໍ່ເພື່ອເປັນການສົ່ງເສີມທັບນັກກິລາເທຄວັນໂດລາວ ໄດ້ມີການເຄື່ອນໄຫວຢ່າງຕໍ່ເນື່ອງ ແລະ ສ້າງໂອກາດໃຫ້ນັກກິລາທັງຮຸ່ນໃໝ່ ແລະ ເກົ່າ ຕັ້ງແຕ່ອາຍຸ 15 ປີ ຂຶ້ນໄປ ໄດ້ຮ່ວມແຂ່ງຂັນເພື່ອສະສົມຄະແນນຂອງຕົນ ທີ່ສະຫະພັນກິລາເທຄວັນໂດແຫ່ງຊາດ ກໍານົດໄດ້ຕາມເງື່ອນ ຈຳນວນ 120 ຄະແນນ ຈຶ່ງສາມາດເຂົ້າຮ່ວມງານມະຫາກຳກິລາແຫ່ງຊາດ ຄັ້ງທີ 11​ ທີ່ແຂວງຊຽງຂວາງ ຮັບກຽດເປັນເຈົ້າພາບໃນຕົ້ນປີ 2018.​ ພ້ອມກັນນັ້ນ, ກໍ່ຍັງເປັນການກຽມຄວາມພ້ອມ ໃຫ້ທັບນັກກິລາເທຄວັນໂດທີມຊາດລາວ ເຂົ້າຮ່ວມງານມະຫາກຳກິລາຊີເກມ ຄັ້ງທີ 29 ທີ່ປະເທດມາເລເຊຍ ເປັນເຈົ້າພາບ ໃນກາງປີ 2017.​ ຄຽງຄູ່ກັນນັ້ນ, ກໍ່ຍັງເປັນການເປີດໂອກາດ ໃຫ້ນັກກິລາຮຸ່ນໃໝ່ໄດ້ກ້າສະແດງອອກດ້ານຄວາມສາມາດຂອງຕົນເອງ ເພື່ອພັດທະນາຕົນເອງ ສາມາດກະໂດດຂັ້ນກ້າວສູ່ທີມຊາດ ໂດຍການສະໜັບສະໜູນຂອງສະຖານທູດ ສ ເກົາຫຼີ ປະຈຳ ສປປ ລາວ ມູນຄ່າ 177 ລ້ານກີບ.

ຂະນະທີ່ ທ່ານ ຈັນທະວົງ ປັນຍາສິລິ ເລຂາທິການສະຫະພັນເທຄວັນໂດແຫ່ງຊາດ ກໍ່ໄດ້ລາຍງານໃຫ້ຮູ້ວ່າ: ລາຍການແຂ່ງຂັນດັ່ງກ່າວ ຈະດຳເນີນຕັ້ງແຕ່ເຊົ້າ ເວລາ 8:30 ໂມງ ລະຫວ່າງວັນທີ 26-27 ພະຈິກ 2016 ທີ່ສະຫໍກອງປະຊຸມແຫ່ງຊາດ (ຫຼັກ5) ນະຄອນຫຼວງວຽງຈັນ ເຊິ່ງມີການຊີງໄຊກັນທັງໝົດ 97 ລາຍການ ຈາກປະເພດຕໍ່ສູ້ປ້ອງກັນຕົວ 72 ລາຍການ ໃນນີ້ ມີຮຸ່ນເຍົາວະຊົນ ອາຍຸບໍ່ເກີນ 8 ປີ, 10 ປີ,​12 ປີ, 15 ປີ, 17 ປີ ແລະ ຮຸ່ນທົ່ວໄປ ທັງຍິງ ແລະ ຊາຍ ສ່ວນປະເພດປຸ້ມເຊ້ ມີ 25 ລາຍການ ຈາກ 5 ຮຸ່ນ ຄື: ຮຸ່ນ 10 ປີ,​12 ປີ, 15 ປີ, 17 ປີ ແລະ ຮຸ່ນທົ່ວໄປ ທັງຍິງ ແລະ ຊາຍ ມາຈາກ 23 ພາກສ່ວນ, ໃນນັ້ນ ປະກອບມີ 8 ແຂວງແລະ 15 ສະໂມສອນ ຄື: ຊຽງຂວາງ, ຫຼວງພະບາງ, ບໍ່ແກ້ວ, ອຸດົມໄຊ, ບໍລິຄໍາໄຊ, ຄໍາມ່ວນ, ສະຫວັນນະເຂດ, ຈຳປາສັກ ສ່ວນ 13 ສະໂມສອນ ປະກອບມີ ລ້ານຊ້າງ, ກອງທັບ, ວີິໄອເອັສ, ຕະວັນ, ເສືອນ້ອຍ, ຮ່ອງສຸພາບ, ກຸນະວົງ, ນັນດາ, ເອັສເຄ, ດຣັງ, ມສ ໄຊເຊດຖາ, ທີເອັມ, ໂຮງຮຽນພອນສະຫວັນກິລາ-ກາຍະກຳ, ໂຊກໄຊ ແລະ ມະຫາວິທະຍາໄລແຫ່ງຊາດ.

ຂ່າວຈາກ: