ນັກຮົບກຸ່ມແບ່ງແຍກດິນແດນໃນພາກຕາເວັນອອກຂອງອູແກຣນ ໃຊ້ຈະຫຼວດຍິງເຮືອບິນສູ້ຮົບ 2 ລຳ
ຂອງກອງທັບອາກາດລັດຖະບານອູແກຣນຕົກ ຫ່າງຈາກຈຸດທີ່ເຮືອບິນໂດຍສານຖ້ຽວບິນ MH17 ຂອງ
ມາເລເຊຍແອຣ໌ລາຍຕົກ ພຽງ 45 ກິໂລແມັດ.
ສຳນັກຂ່າວຕ່າງປະເທດລາຍງານວ່າ ເມື່ອວັນພຸດ 23 ກໍລະກົດ ຜ່ານມານີ້ ໂຄສົກກອງທັບລັດຖະບານ
ໃນນະຄອນຫຼວງຄຽບເປີດເຜີຍວ່າ ເຮືອບິນອາຍພົ່ນ ຊູ 25 (SU 25) 2 ລຳ ຖືກຍິງຕົກໃນບໍລິເວນເນີນ
ພູຊື່ວ່າ ຊາວູ ໂມກິລາ ທາງຕອນໃຕ້ຂອງເມືອງສະນິດເນ ທີ່ຢູ່ພາຍໃຕ້ການຄວບຄຸມຂອງຝ່າຍກຸ່ມແບ່ງ
ແຍກດິນແດນ ແລະ ເປັນເມືອງທີ່ລັດຖະບານອູແກຣນ ແລະ ສະຫະລັດ ກ່າວຫາວ່າເປັນສະຖານທີ່ທີ່
ກຸ່ມດັ່ງກ່າວຍິງຈະຫຼວດໃສ່ເຮືອບິນຂອງມາເລເຊຍແອຣ໌ລາຍຕົກ ໃນວັນທີ 17 ກໍລະກົດຜ່ານມາ.
ໃນຂະນະທີ່ສູນຂ່າວສານ ຂອງໜ່ວຍປະຕິບັດການຕໍ່ຕ້ານການກໍ່ການຮ້າຍອູແກຣນ ລະບຸວ່າ ເຮືອບິນ
ສູ້ຮົບທັງສອງລຳ ຖືກຍິງດ້ວຍຈະຫຼວດຈາກລະບົບຕໍ່ຕ້ານອາກາດສະຍານ ແຕ່ຍັງບໍ່ສາມາດຮູ້ເຖິງຊະ
ນິດຂອງຈະຫຼວດດັ່ງກ່າວ ໂດຍທີ່ນັກບິນຂອງເຮືອບິນ ຊູ 25 ທັງສອງລຳ ສາມາດດີດໂຕອອກຈາກເຮືອ
ບິນດ້ວຍຄວາມປອດໄພ.
ຕາມການເປີດເຜີຍຂອງສະພາປ້ອງກັນປະເທດອູແກຣນ ເຮືອບິນ ຊູ 25 ດັ່ງກ່າວ ບິນໃຫ້ການສະໜັບ
ສະໜູນປະຕິບັດການຕໍ່ຕ້ານການກໍ່ການຮ້າຍ ໃນພາກຕາເວັນອອກຂອງອູແກຣນ ທີ່ຄວາມສູງ 5200
ແມັດ ໃນຂະນະທີ່ຝ່າຍກຸ່ມແບ່ງແຍກດິນແດນເນັ້ນຢ້ຳມາຕະຫຼອດວ່າ ພວກເຂົາບໍ່ມີອາວຸດທີ່ສາມາດ
ຍິງເປົ້າໝາຍທີ່ຢູ່ສູງກ່ວາ 2500 ແມັດ ແລະ ໃຊ້ເປັນຂໍ້ແກ້ໂຕຫຼັງຈາກຖືກລັດຖະບານອູແກຣນກ່າວຫາ
ວ່າ ກຸ່ມດັ່ງກ່າວຍິງຖ້ຽວບິນ MH17 ທີ່ບິນໃນຄວາມສູງ 10,000 ແມັດຕົກ.