ໃກ້ຮອດຈຸດໝາຍປາຍທາງ ສໍາລັບໂຄງການກໍ່ສ້າງດ່ານສາກົນວັງເຕົ່າ ເມືອງໂພນທອງ ແຂວງຈໍາປາສັກ ມາຮອດເວລານີ້ການກໍ່ສ້າງມີຄວາມຄືບໜ້າຫຼາຍກວ່າ 70% ແລະຄາດວ່າທ້າຍປີນີ້ຈະສໍາເລັດໂດຍພື້ນຖານ ເພື່ອກຽມພ້ອມເປີດການນໍາໃຊ້ຢ່າງເປັນທາງການ ໃນຕົ້ນປີ 2017 ທ່ານຫົວໜ້າດ່ານໝັ້ນໃຈວ່າ: ພາຍຫຼັງທີ່ໄດ້ເປີດນໍາໃຊ້ແລ້ວຈະມີຫຼາຍຢ່າງທີ່ເກີດຜົນປະໂຫຍດຕາມມາ.
ທ່ານ ບຸນຍະເດດ ທອງສະຫວັນ ຫົວໜ້າດ່ານສາກົນວັງເຕົ່າ ເມືອງໂພນທອງ ແຂວງຈໍາປາສັກ ໃຫ້ຮູ້ກ່ຽວກັບຄວາມ ຄືບໜ້າໂຄງການພັດທະນາກໍ່ສ້າງດ່ານ ສາກົນວັັງເຕົ່າໃໝ່ເມື່ອບໍ່ດົນມານີ້ໃຫ້ຮູ້ວ່າ: ໂຄງການດັ່ງກ່າວເປັນຍຸດທະສາດ ທີ່ສໍາຄັນຂອງແຂວງຈໍາປາສັກ ທີ່ໄດ້ຈັດຕັ້ງປະຕິບັດຕາມແຜນນະໂຍບາຍຂອງ ລັດຖະບານ ໂດຍສະເພາະແມ່ນການຮອງຮັບໃຫ້ແກ່ການພັດທະນາທາງ ດ້ານເສດຖະກິດ-ສັງຄົມ, ຮອງຮັບໃຫ້ ແກ່ການເຂົ້າ-ອອກສິນຄ້າໃຫ້ມີຄວາມສະດວກສະບາຍ ລວມທັງການເຂົ້າ-ອອກປະເທດ ຊຶ່ງໂຄງການດັ່ງກ່າວໄດ້ ລົງມືກໍ່ສ້າງມາແຕ່ຕົ້ນປີ 2013, ໃນມູນຄ່າການກໍ່ສ້າງທັງໝົດ 98 ຕື້ກວ່າກີບ ຊຶ່ງແມ່ນບໍລິສັດເອກະຊົນພາຍໃນແຂວງເປັນຜູ້ລົງທຶນ ແລະຮັບເໝົາກໍ່ສ້າງ ໃນກໍານົດເວລາ 3 ປີໃຫ້ສໍາເລັດເຫັນວ່າ ບໍລິສັດດັ່ງກ່າວແມ່ນໄດ້ເລັ່ງມືເຂົ້າໃນການກໍ່ສ້າງດ້ວຍຄວາມເອົາໃຈໃສ່ມາຮອດຂະນະນີ້ສໍາເລັດການກໍ່ສ້າງແລ້ວ 70 ກວ່າສ່ວນຮ້ອຍຍັງເຫຼືອແຕ່ໜ້າວຽກງານການຕົບແຕ່ງພາຍໃນ ແລະພາຍນອກ ຊຶ່ງຄາດວ່າການກໍ່ສ້າງຈະສໍາເລັດ ໂດຍພື້ນຖານໃນທ້າຍປີນີ້ ຫຼັງຈາກນັ້ນ ໃນຕົ້ນປີໜ້າ 2017 ແມ່ນຈະໄດ້ເປີດການນໍາໃຊ້ຢ່າງເປັນທາງການ.
ໃນໂອກາດດຽວກັນນີ້ ທ່ານໄດ້ກ່າວຕື່ມວ່າ: ພາຍຫຼັງທີ່ດ່ານສາກົນວັງເຕົ່າທີ່ເປີດນໍາໃຊ້ຢ່າງເປັນປົກກະຕິແລ້ວຈະມີຫຼາຍຢ່າງທີ່ເກີດຜົນປະໂຫຍດຕາມມາ, ເປັນຕົ້ນແມ່ນຈະເຮັດໃຫ້ການນໍາເຂົ້າ-ສົ່ງອອກສິນຄ້າ ໄດ້ມີຄວາມສະດວກສະບາຍຫຼາຍຂຶ້ນ, ເຮັດໃຫ້ການເຂົ້າ-ອອກ ເມືອງມີຄວາມເປັນລະບຽບຮຽບຮ້ອຍ ທັງກະຕຸກຊຸກຍູ້ເຮັດໃຫ້ຜູ້ຄົນເຂົ້າມາທ່ອງທ່ຽວແຂວງຈໍາປາສັກຫຼາຍຂຶ້ນ, ຖືໄດ້ວ່າດ່ານຈະເຮັດໃຫ້ແຂວງມີໃບໜ້າໃບຕາໃໝ່ ພ້ອມດຽວກັນນີ້ລັດຖະບານໄດ້ອະນຸມັດເນື້ອທີ່ 253 ເຮັກຕາ ເພື່ອພັດທະນາເປັນເຂດເສດຖະກິດພິເສດໃນບໍລິເວນດ່ານສາກົນດັ່ງກ່າວເຊື່ອວ່າຈະເຮັດໃຫ້ການລົງທຶນຕ່າງໆໃນເຂດເສດຖະກິດພິເສດແຫ່ງນີ້ມີບັນຍາກາດພໍສົມຄວນ.
ຈາກໜັງສືພິມເສດຖະກິດ-ສັງຄົມ