ສະຫາຍ ດຣ. ບຸນຖອງ ດີວິໄຊ ເລີ່ມປະຕິບັດໜ້າທີ່ເຈົ້າແຂວງໆຈຳປາສັກ ພາຍຫຼັງທີ່ສະຫາຍ ດຣ. ສອນໄຊ
ສີພັນດອນ ເລຂາພັກແຂວງ ເຈົ້າແຂວງໆຈຳປາສັກຜູ້ເກົ່າ ໄປປະຕິບັດໜ້າທີ່ໃໝ່ຢູ່ສູນກາງ.
ພິທີມອບຮັບໜ້າທີ່ ມີຂຶ້ນໃນວັນທີ 23 ກໍລະກົດຜ່ານມາ ຢູ່ສຳນັກງານປົກຄອງແຂວງຈຳປາສັກ ໂດຍການ
ເຂົ້າຮ່ວມຂອງສະຫາຍ ອາຊາງ ລາວລີ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ພ້ອມ
ນີ້ ຍັງມີສະຫາຍ ວັນໄຊ ພອງສະຫວັນ ຮອງຄະນະຈັດຕັ້ງສູນກາງພັກ, ການນຳຈາກຫ້ອງວ່າການລັດຖະບານ,
ກົມຈັດຕັ້ງພັກພະນັກງານ ບັນດາສະຫາຍໃນຄະນະປະຈຳພັກແຂວງ, ກຳມະການພັກແຂວງ, ຫົວໜ້າພະແນກ
ການກົມກອງອ້ອມຂ້າງແຂວງ, ເລຂາພັກເມືອງເຈົ້າເມືອງ 10 ຕົວເມືອງ ຕະຫຼອດຮອດນັກທຸລະກິດ ແລະ ພະ
ນັກງານວິຊາການທີ່ກ່ຽວຂ້ອງຈຳນວນໜຶ່ງເຂົ້າຮ່ວມ.
ໃນພິທີສະຫາຍ ດຣ. ສອນໄຊ ສີພັນດອນ ໄດ້ຂຶ້ນຜ່ານບົດສະຫຼຸບຫຍໍ້ໃນການຊີ້ນຳນຳພາ ໃນໄລຍະຜ່ານມາ ພ້ອມ
ທັງກ່າວມອບໜ້າທີ່ໃຫ້ແກ່ເລຂາຄະນະບໍລິຫານງານພັກແຂວງ ເຈົ້າແຂວງຈຳປາສັກຜູ້ໃໝ່, ຈາກນັ້ນກໍມີການ
ເຊັນບົດບັນທຶກມອບຮັບໜ້າທີ່ດັ່ງກ່າວ.
ການມອບຮັບໜ້າທີ່ຄັ້ງນີ້ແມ່ນປະຕິບັດຕາມເນື້ອໃນຈິດໃຈ ຄຳສັ່ງຂອງກົມການເມືອງສູນກາງພັກ ສະບັບເລກ
ທີ 07/ກມສພ, ລົງວັນທີ 3 ກໍລະກົດ 2014 ແລະ ລັດຖະດຳລັດຂອງປະທານປະເທດສະບັບເລກທີ 146/ປທ, ລົງວັນ
ທີ 16 ກໍລະກົດ 2014 ວ່າດ້ວຍການຍົກຍ້າຍພະນັກງານການນຳລະດັບສູງໄປຮັບໜ້າທີໃໝ່.
ແຫຼ່ງຂ່າວ: http://www.sedthakid.la/khao/19781.spc