ຂປລ. ວັນທີ 15 ພະຈິກ 2016ນີ້ ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລວງຂ່າວ ວັດທະນະທຳ ແລະ ທ່ອງທ່ຽວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຄະນະ ມິດແກຣນ ອິນເຕີເນເຊັນນໍ 2016 (Miss Grand International) ເຊິ່ງນຳໂດຍ ທ່ານ ນະວັດ ອິສໄກລສິນ ປະທານກອງປະກວດ Miss Grand Thailand ໃນໂອກາດເດີນທາງ ມາຮ່ວມງານ ບຸນນະມັດສະການພະທາດຫລວງ ທີ່ ນະຄອນຫລວງວຽງຈັນ ໃນລະຫວ່າງວັນທີ 13-16 ພະຈິກນີ້.
ໃນໂອກາດດັ່ງກ່າວ ທ່ານ ບົວເງິນ ຊາພູວົງ ກໍໄດ້ສະແດງຄວາມຍິນດີຕ້ອນຮັບ ຊົມເຊີຍຕໍ່ ທ່ານ ນະວັດ ອິສໄກລສິນ ທີ່ນຳພາຄະນະມາເຮັດກິດຈະກຳໃນຄັ້ງນີ້ ເຊິ່ງເປັນການປະກອບສ່ວນອັນສຳຄັນ ເຂົ້າໃນ ການຮັດແໜ້ນ ແລະ ເສີມຂະຫຍາຍ ສາຍພົວພັນ ມິດຕະພາບ ແລະ ການຮ່ວມມືລະຫວ່າງ ສອງກອງປະກວດ ມິດລາວ – ມີດແກຮນ ອິນເຕີເນເຊັນນໍ ນອກຈາກນັ້ນ ທ່ານ ຍັງໄດ້ເຊື້ອເຊີນເອົາ ນາງສາວລາວເຂົ້າຮ່ວມກອງປະກວດ ໃນເວທີ ພາກພຶ້ນ ແລະ ສາກົນ ເພື່ອແລກປ່ຽນ ວັດທະນະທຳອັນ ດີງາມ ຂອງ ສປປ ລາວ ໃຫ້ຊາວໂລກໄດ້ຮັບຮູ້..
ພ້ອມນີ້ ທ່ານ ນະວັດ ອິສໄກລສິນ ໄດ້ສະແດງຄວາມຂອບໃຈ ຕໍ່ທ່ານ ບົວເງິນ ຊາພູວົງ ທີ່ໄດ້ສະຫລະເວລາ ໃຫ້ການຕ້ອນຮັບອັນອົບອຸ່ນ ໃນຄັ້ງນີ້ ພ້ອມທັງ ແຈ້ງຈຸດປະສົງໃນການມາຢ້ຽມຢາມ ແລະ ເຮັດວຽກໃນຄັ້ງນີ້ ໃຫ້ທ່ານ ຮອງລັດຖະມົນຕີ ໄດ້ຮັບຊາບຕື່ມອີກ.
ຂ່າວຈາກ: ສຳນັກຂ່າວສານປະເທດລາວ
ຕິດຕາມເລື່ອງດີດີ ບັນເທີງລາວ Lao Entertenment ກົດໄລຄ໌ເລີຍ!