ອົງກອນ Human Right Watch ເຜີຍຂໍ້ມູນກ່ຽວກັບການໂຈມຕີທາງອາກາດຂອງລັດຖະບານອີຣັກ
ເຊິ່ງຫຼາຍຄັ້ງມີການໃຊ້ລະເບີດຖັງນ້ຳມັນ ເປັນຕົ້ນເຫດເຮັດໃຫ້ຊາວບ້ານເສຍຊີວິດຢ່າງໜ້ອຍ 75 ຄົນ
ນັບຕັ້ງແຕ່ເດືອນມິຖຸນາທີ່ຜ່ານມາ.
ອົງກອນດ້ານສິດທິມະນຸດ ທີ່ມີສຳນັກງານຕັ້ງຢູ່ນະຄອນນິວຢອກລະບຸວ່າ ມີຊາວບ້ານຫຼາຍຮ້ອຍຄົນ
ໄດ້ຮັບບາດເຈັບຈາກການໂຈມຕີທາງອາກາດ ນັບຕັ້ງແຕ່ວັນທີ 6 ມິຖຸນາເປັນຕົ້ນມາ, ໂດຍເອກະສານ
ຄຳຖະແຫຼງລະບຸວ່າ ມີຊາວບ້ານໃນສີ່ເມືອງ ເສຍຊີວິດລວມກັນ 75 ລາຍ ນັບຕັ້ງແຕ່ກອງທັບເລີ່ມທຳ
ການໂຈມຕີກວາດລ້າງກຳລັງຂອງກຸ່ມລັດອິດສະລາມ (IS: Islamic State) ທີ່ເປັນພວກນັກຮົບຍີ່ຮັດ
ແລະ ບັນດາພັນທະມິດທີ່ເປັນກຸ່ມຕິດອາວຸດອິດສະລາມນິກາຍສຸໜີ່ ໂດຍມີຊາວບ້ານຢ່າງໜ້ອຍ 17
ຄົນ ທີ່ເສຍຊີວິດເພາະລະເບີດຖັງນ້ຳມັນ.
ເນື່ອງຈາກລະເບີດຖັງນ້ຳມັນ ເຄີຍຖືກນຳໃຊ້ໂດຍລັດຖະບານຊີເລຍ ໃນການຕໍ່ສູ້ກັບກຸ່ມຕິດອາວຸດ
ໃນຕະຫຼອດຊ່ວງສອງປີຜ່ານມາ ດ້ວຍການເອົາຖັງນ້ຳມັນໃສ່ສານເຄມີ ເສດກະສຸນ ຫຼື ສ່ວນປະສົມ
ທີ່ໃຊ້ເຮັດລະເບີດ ເຊິ່ງລະເບີດຊະນິດນີ້ ຈະມີຕົ້ນທຶນການຜະລິດທີ່ຂ້ອນຂ້າງຖືກ ແຕ່ບໍ່ມີຄວາມແມ່ນ
ຢຳພໍປານໃດ.
ຮິວແມນ ໄຣຕ໌ ວັອດ ລະບຸວ່າ ເຖິງແມ່ນຈະມີການປະຕິເສດຫຼາຍຄັ້ງຈາກລັດຖະບານອີຣັກ ແຕ່ກອງ
ກຳລັງຂອງລັດຖະບານ ກໍຍັງຄົງມີການນຳລະເບີດຖັງນ້ຳມັນມາໃຊ້ ໃນເຂດທີ່ຢູ່ອາໄສໃນເມືອງຟັນລູຈາ
ອີຣັກ ໄດ້ຮັບກອງກຳລັງສະໜັບສະໜູນຫຼາກຫຼາຍຮູບແບບ ຈາກສະຫະລັດອາເມລິກາ ແລະ ອີຫຼ່ານ
ໃນການຕໍ່ສູ້ກັບກຸ່ມ ລັດອິດສະລາມ ທີ່ບຸກລຸກເຂົ້າພື້ນທີ່ທາງພາກເໜືອ ແລະ ກຳລັງເປັນໄພຄຸກຄາມ
ຕໍ່ນະຄອນຫຼວງແບັກແດັກ.