ດັດຊະນີການຈັດຊື້ຂະແໜງການຜະລິດ(ພີເອັມໄອ)ອາຊຽນຫຼຸດລົງສູ່ລະດັບຕໍ່າສຸດໃນຮອບ 11 ເດືອນໃນເດືອນຕຸລາທີ່ຜ່ານມາ.
ຕາມຂ່າວຕ່າງປະເທດລາຍງານວ່າ: ດັດຊະນີການຈັດຊື້ຂະແໜງການຜະລິດ(ພີເອັມໄອ)ອາຊຽນຫຼຸດລົງສູ່ລະດັບຕໍ່າສຸດໃນຮອບ 11 ເດືອນໃນເດືອນຕຸລາທີ່ຜ່ານມາ ສະແດງໃຫ້ເຫັນເຖິງສະຖານະການດ້ານການຜະລິດທົ່ວອາຊີຕາເວັນອອກສຽງໃຕ້(ອາຊຽນ)ຫຼຸດລົງ ໂດຍດັດຊະນີຢູ່ທີ່ 49,2 ຫຼຸດລົງຈາກລະດັບ 50,5 ໃນເດືອນກ່ອນໜ້ານີ້ ທັງນີ້ຕົວເລກດັດຊະນີທີ່ຫຼາຍກວ່າ 50 ບົ່ງຊີ້ໃຫ້ເຫັນເຖິງການຂະຫຍາຍຕົວຂະນະທີ່ຕໍ່າກວ່າ 50 ໝາຍເຖິງການຫົດຕົວ
ປະເທດທີ່ປະສົບບັນຫາຫຼາຍທີ່ສຸດຄື ອິນໂດເນເຊຍ ທີ່ມີເຂດເສດຖະກິດຂະໜາດໃຫຍ່ທີ່ສຸດໃນອາຊຽນ ດັດຊະນີຢູ່ທີ່ 48,7 ໃນເດືອນຕຸລາທີ່ຜ່ານມາ ນັບເປັນການຫົດຕົວລົງຫຼັງຈາກຂະຫຍາຍຕົວເພີ່ມຂຶ້ນມາ 2 ເດືອນຕິດຕໍ່ກັນ ຊຶ່ງການຫຼຸດລົງຂອງຄຳສັ່ງຊື້ໃໝ່ເປັນສາເຫດສຳຄັນ ໂດຍ 1 ໃນ 5 ຂອງຜູ້ຈັດການຝ່າຍຊື້ທີ່ໄດ້ຮັບການສຳຫຼວດເປີດເຜີຍວ່າ ມີການເລີ່ມຕົ້ນທຸລະກິດໃໝ່ນ້ອຍລົງເນື່ອງຈາກອຸປະສົງພາຍໃນປະເທດຫຼຸດລົງ.
ຈາກໜັງສືພິມເສດຖະກິດ-ສັງຄົມ