ຕາມຂ່າວຕ່າງປະເທດລາຍງານວ່າ: ສປ ຈີນໃຊ້ງົບປະມານ 528 ລ້ານຢວນ ເລີ່ມສ້າງທ້ອງຟ້າຈຳລອງໃຫຍ່ທີ່ສຸດໃນໂລກຢູ່ຊຽງໄຮ້ ແລະ ຈະເປີດໃຫ້ບໍລິການໃນປີ 2020.
ທ້ອງຟ້າຈຳລອງທີ່ໃຫຍ່ທີ່ສຸດໃນໂລກແຫ່ງນີ້ ຕັ້ງຢູ່ທີ່ Lingang area ຂອງປູຕົງ ຊຶ່ງປະກອບດ້ວຍອາຄານຫຼັກ, ອາຄານແສງອາທິດ, ບ່ອນສັງເກດການສຳລັບເຍົາວະຊົນ, ຫໍຊົມດາວສຳລັບເຜີຍແພ່ຄວາມຮູ້ດ້ານດາຣາສາດ ແລະ ຍັງອະນຸຍາດໃຫ້ຜູ້ເຂົ້າຊົມຮຽນຮູ້ດາຣາສາດດ້ວຍວິທີການອື່ນໆທີ່ໜ້າສົນໃຈ, ທັງນີ້ ທ້ອງຟ້າຈຳລອງດັ່ງກ່າວໃຊ້ງົບປະມານໃນການກໍ່ສ້າງ 528 ລ້ານຢວນ ແລະ ຈະເປີດໃຫ້ບໍລິການໃນປີ 2020, ນອກຈາກນີ້ ການອອກແບບຂອງອາຄານຍັງເຮັດໃຫ້ຕົວເອງຄືກັບເປັນເຄື່ອງມືທາງດາຣາສາດ ທີ່ສາມາດບອກເວລາ ແລະ ທິດທາງໄດ້ ໂດຍເຕັກໂນໂລຊີທີ່ໃຊ້ສຳລັບທ້ອງຟ້າຈຳລອງແຫ່ງນີ້ເປັນເຕັກໂນໂລຊີສີຂຽວ ແລະ ອັດສະລິຍະ ໂດຍໃຊ້ພະລັງງານແສງອາທິດ ມີລະບົບກັກເກັບນ້ຳຝົນ.
ການອອກແບບທັງໝົດກໍ່ເພື່ອຕ້ອງການໃຫ້ເໝືອນກັບເປັນການເຊື່ອມຕໍ່ມະນຸດກັບຈັກກະວານໄວ້ດ້ວຍກັນ, ທ່ານ ຫລິນ ສິງ ຫົວໜ້າຝ່າຍຈັດສະແດງຂອງທ້ອງຟ້າຈຳລອງກ່າວວ່າ ຜູ້ເຂົ້າຊົມຈະໄດ້ເພີດເພີນໄປກັບລະບົບສຸລິຍະ ແລະ ກາແລັກຊີ ໄດ້ຮຽນຮູ້ໂຄງສ້າງລັງສີຄອສມິກ ແລະ ທິດສະດີການຂະຫຍາຍຕົວຂອງຈັກກະວານ ຊຶ່ງເອີ້ນໄດ້ວ່າ ເປັນພື້ນທີ່ຈັດສະແດງທາງດາຣາສາດທີ່ພິເສດໃນຈີນ ນອກຈາກນີ້ບໍລິເວນດ້ານນອກຂອງອາຄານ ເຮົາຍັງມີສວນໃຫ້ເດັກນ້ອຍສາມາດເຂົ້າແຄມໃນໄລຍະລະດູຮ້ອນ ເພື່ອສັງເກດທ້ອງຟ້າ ແລະ ດວງດາວໃນຍາມຄໍ່າຄືນ.
ຈາກໜັງສືພິມເສດຖະກິດ-ສັງຄົມ