ວາລະສານຟອບຂອງອາເມລິກາເປີດເຜີຍຜົນການສຳຫຼວດຕະກຸນທີ່ຮັ່ງມີທີ່ສຸດ 50 ອັນດັບທຳອິດຂອງອາຊີປະຈຳປີ 2016 ຕະກູນອີແຫ່ງຊຳຊຸງຄອງແຊ໋ມ ສ່ວນຕະກຸນເຈີຍຣະວະມົນ ຕິດອັນດັບມະຫາເສດຖີຮັ່ງມີເປັນອັນດັບ 2 ຂອງອາຊີ.
ຕາມຂ່າວຕ່າງປະເທດລາຍງານວ່າ: ມະຫາເສດຖີຕະກຸນອີຂອງ ສ ເກົາຫຼີ ຊຶ່ງເປັນຜູ້ກໍ່ຕັ້ງກິດຈະການເຄືອຊຳຊຸງຕິດອັນດັບ 1 ມະຫາເສດຖີອາຊີທີ່ມີຊັບສິນລວມຫຼາຍທີ່ສຸດໃນປີນີ້ຄິດເປັນມູນຄ່າຫຼາຍກວ່າ 29,6 ຕື້ໂດລາສະຫະລັດ ໂດຍລາຍໄດ້ຂອງຕະກຸນປະມານ 35% ມາຈາກບໍລິສັດຊຳຊຸງ ອິເລັກໂຕນິກ ແຕ່ກິດຈະການເຄືອຊຳຊຸງໄດ້ຮັບຜົນກະທົບຢ່າງໜັກໃນປີນີ້ ຈາກກໍລະນີທີ່ໂທລະສັບສະມາດໂຟນ ຮຸ່ນຊຳຊຸງ ກາແລກຊີ ໂນດ 7 ມີບັນຫາແບດເຕີຣີຮ້ອນ ແລະ ເກີດໄຟໄໝ້ ເຮັດໃຫ້ຕ້ອງເອີ້ນຄືນສິນຄ້າຫຼາຍລ້ານໜ່ວຍທົ່ວໂລກ ແລະ ຍຸຕິການຜະລິດສະມາດໂຟນຮຸ່ນດັ່ງກ່າວ.
ສ່ວນຕະກຸນເຈີຣະວະມົນ ເຈົ້າຂອງກິດຈະການເຄືອຈະເລີນໂພກພັນ(ຊີພີ)ຂອງໄທ ຕິດອັນດັບເສດຖີຮັ່ງມີເປັນອັນດັບ 2 ຂອງອາຊີ ມີຊັບສິນລວມໃນປີທີ່ຜ່ານມາຫຼາຍກວ່າ 27,7 ຕື້ໂດລາ, ອັນດັບ 3 ຄື ຕະກຸນອຳພານີ ເຈົ້າຂອງກິດຈະການພະລັງງານເຊື້ອເພີງຂອງອິນເດຍ ມີຊັບສິນລວມຫຼາຍກວ່າ 25,8 ຕື້ໂດລາ.
ຂາວຈາກໜັງສືພິມເສດຖະກິດ-ສັງຄົມ