spot_img
Homeຂ່າວການພັດທະນາຄ່າບໍລິການອິນເຕີເນັດແພງສັ່ນສະເທືອນຮອດສະພາ

ຄ່າບໍລິການອິນເຕີເນັດແພງສັ່ນສະເທືອນຮອດສະພາ

Published on

ຄ່າບໍລິການອິນເຕີເນັດແພງສັ່ນສະເທືອນຮອດສະພາ ຂະນະທີ່ຜູ້ປະກອບການອິນເຕີເນັດໃຫ້ເຫດຜົນວ່າບັນຫາທີ່ແພງ ແລະ ສັນຍານຊັກຊ້າຍ້ອນທຸກຢ່າງນໍາເຂົ້າໝົດກັບການລົງທຶນສູງ.

ສະມາຊິກສະພາທ້ອງຖິ່ນຊີ້ແຈງບັນຫາຄ່າບໍລິການອິນເຕີເນັດແພງເກີນໄປຈົນຮ້ອນຫູຜູ້ຊົມໃຊ້ ຂະນະຄ່າບໍລິການອິນເຕີເນັດຢູ່ບັນດາປະເທດເພື່ອນບ້ານ ແລະ ສະມາຊິກອາຊຽນຖືກວ່າຢູ່ລາວຫລາຍເທົ່າ.

ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ 8 ວັນທີ 7 ພະຈິກ ໄດ້ພິຈາລະນາຮ່າງກົດໝາຍວ່າດ້ວຍເຕັກໂນໂລຊີການສື່ສານ, ຂໍ້ມູນ ແລະ ຂ່າວສານ ເຊິ່ງສະເໜີ ໂດຍລັດຖະມົນຕີກະຊວງໄປສະນີໂທລະຄົມມະນາຄົມ ແລະ ການສື່ສານເພື່ອຄຸ້ມຄອງການເຄື່ອນໄຫວທຸລະກິດການພັດທະນາ ແລະ ການນໍາໃຊ້ເຕັກໂນໂລຊີການສື່ສານ, ຂໍ້ມູນ & ຂ່າວສານ ທັງພາກລັດ ແລະ ເອກະຊົນ. ພາຍຫຼັງທີ່ຮັບຟັງການລາຍງານແລ້ວບັນດາສະມາຊິກສະພາແຫ່ງຊາດກໍ່ໄດ້ປະກອບຄຳເຫັນ ແລະ ພ້ອມກັນຕັ້ງຄຳຖາມເຖິງລາຄາການບໍລິການອິນເຕີເນັດໃນປະເທດເຮົາຍັງແພງຖ້າທຽບໃສ່ພາກພື້ນ.

ຕໍ່ບັນຫາດັ່ງກ່າວ ທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີໂທລະຄົມມະນາຄົມ ແລະ ການສື່ສານ ກ່າວວ່າ: ສໍາລັບລາຄາອິນເຕີເນັດໃນປະເທດເຮົາແມ່ນແພງ ແລະ ຊ້າ ເນື່ອງຈາກວ່າລະບົບໂທລະຄົມມະນາຄົມບໍລິສັດໃດບໍລິສັດໜຶ່ງໃນປະເທດເຮົາແມ່ນເປັນການລົງທຶນຈຳນວນຫຼາຍຖ້າທຽບໃສ່ຈຳນວນຄົນ 5 ລ້ານກວ່າຄົນ ໃນຈຳນວນປະຊາກອນນີ້ບໍ່ໝາຍວ່າຈະນຳໃຊ້ອິນເຕີເນັດທັງໝົດການນຳໃຊ້ມີພຽງແຕ່ 25% ເທົ່ານັ້ນ. ໃນນັ້ນ, ( ນຳໃຊ້ເຂົ້າໃນວຽກລັດ, ພາກທຸລະກິດ 15% ແລະ 10% ແມ່ນກຸ່ມໄວລຸ້ນທີ່ນໍາໃຊ້ທາງ ເຟສບຸ໊ກ ແລະ ອື່ນໆທີ່ບໍ່ແມ່ນເສດຖະກິດ ) ນອກຈາກລົງທຶນແລ້ວໃນແຕ່ລະປີບັນດາບໍລິສັດທີ່ໃຫ້ບໍລິການຍັງໄດ້ລົງທຶນໃສ່ການອັບເກດລະບົບ, ປ່ຽນຖ່າຍລະບົບ, ບຳລຸງຮັກສາລວມເປັນທຶນຈຳນວນຫຼາຍ. ທ່ານ ທອງໃສ ຊານໄຊຍະ ຮອງລັດຖະມົນຕີກະຊວງໄປສະນີໂທລະຄົມມະນາຄົມ ແລະ ການສື່ສານ ໄດ້ກ່າວວ່າ: ຕົ້ນທຶນໃນການນຳເຂົ້າອິນເຕີເນັດໃນປະເທດເຮົາແມ່ນແພງ, ສ່ວນແນວທາງແກ້ໄຂຂອງພວກເຮົາຈະພະຍາຍາມກວດກາບໍລິສັດທີ່ໃຫ້ບໍລິການນີ້ຕ້ອງບໍ່ໃຫ້ໂຄສະນາຊວນເຊື່ອເກີນຂອບເຂດທີ່ໃຫ້ບໍລິການໄດ້. ຜ່ານມາເຈົ້າໜ້າທີ່ກ່ຽວຂ້ອງກໍ່ໄດ້ໃຫ້ຢຸດບໍລິການອິນເຕີເນັດດາຕ້າອັນລິມິດ ແລະ ອື່ນໆ, ໃນອະນາຄົດພວກເຮົາຕ້ອງມີລະບົບ ຫຼື ດາຕ້າເຊັນເຕີຢູ່ພາຍໃນປະເທດຂໍ້ມູນໃດທີ່ສຳຄັນເປັນຕົ້ນແມ່ນໃນເຟສບຸ໊ກ ແລະ ອື່ນໆ ພວກເຮົາຈະເກັບໄວ້ຢູ່ດາຕ້າເຊັນເຕີແລ້ວກະຈາຍໄປຫາຜູ້ບໍລິການ ເຊິ່ງຈະເຮັດໃຫ້ຕົ້ນທຶນຕໍ່າ ແລະ ເພີ່ມຄວາມໄວຂຶ້ນປັດຈຸບັນກໍາລັງຄົ້ນຄວ້າດາຕ້າເຊັນເຕີກັນຢູ່.

ທ່ານກ່າວຕື່ມອີກວ່າ: ພ້ອມດຽວກັນນັ້ນກໍ່ຈະອອກກົດໝາຍກ່ຽວກັບການອອກຄື້ນຄວາມຖີ່ເພື່ອຮິບໂຮມເອົາ ຄວາມຖີ່ທີ່ຊັບພະຍາກອນເຮົາມີເພື່ອມາແຈກຢາຍຜູ້ໃດນຳໃຊ້ມີປະສິດທິຜົນກໍ່ໃຫ້ຜູ້ນັ້ນຄືຫຼາຍປະເທດເຂົາເຈົ້າປະຕິບັດກັນ. ພ້ອມນັ້ນ, ການກວດກາພວກເຮົາກໍ່ແຕ່ງຕັ້ງຄະນະສະເພາະຢູ່ກະຊວງເພື່ອກວດກາບັນດາພາກສ່ວນບໍລິການ ເພື່ອບໍ່ໃຫ້ເອົາປຽບຜູ້ບໍລິໂພກເປັນຕົ້ນແມ່ນຕິດຕາມການໂຄສະນາໃຫ້ບໍລິການ, ການເກັບເງິນ ແລະ ອື່ນໆ ເຊິ່ງໃນປັດຈຸບັນພວກເຮົາສາມາດຢັ້ງຢືນໄດ້ແມ່ນເປັນໄປຕາມທີ່ໄດ້ກຳນົດໄວ້ໃນດຳລັດຕ່າງໆ.

ທ່ານ ນາງ ວາລີ ເວດສະພົງ ສະມາຊິກສະພາແຫ່ງຊາດເຂດ 1 ນະຄອນຫຼວງວຽງຈັນ ກ່າວວ່າ: ຄ່າທຳນຽມ ຫຼື ຄ່າບໍລິການອິນເຕີເນັດໃນປະເທດເຮົາເຫັນວ່າລາຄາຈະແພງກວ່າບັນດາປະເທດໃນພາກພື້ນ ເຊີ່ງຈະເປັນຂໍ້ຈໍາກັດໜຶ່ງທີ່ຈະແຂ່ງຂັນດ້ານເຕັກໂນໂລຊີ ຫຼື ແຂ່ງຂັນທາງດ້ານທຸລະກິດບາງຢ່າງທີ່ຕິດພັນກັບເຕັກໂນໂລຊີ.

ທ່ານກ່າວຕື່ມອີກວ່າ: ໃນມາດຕາທີ 42 ຂອງຮ່າງກົດໝາຍວ່າດ້ວຍເຕັກໂນໂລຊີການສື່ສານ, ຂໍ້ມູນ & ຂ່າວສານກໍ່ເຊັ່ນກັນໄດ້ລະບຸວ່າ: ໄດ້ໃຫ້ບໍລິການຢ່າງມີຄຸນນະພາບສະດວກວ່ອງໄວ ແລະ ເປັນທຳ, ໃນທີ່ນີ້ຄວາມໝາຍຄຳວ່າເປັນທຳເນື່ອງຈາກວ່າ: ຢາກຮູ້ວ່າ ຄວາມໄວອິນເຕີເນັດໃນປັດຈຸບັນພວກເຮົາພໍໃຈຈ່າຍ ຍົກຕົວຢ່າງ 1 ກິກ 2 ກິກ ຫຼື 3 ກິກ ຫຼື 500 ເມັກ ພວກເຮົາພໍໃຈຈ່າຍແຕ່ຈະກວດໄດ້ແນວໃດວ່າຄວາມໄວທີ່ປ່ອຍອອກນັ້ນແມ່ນຖືກຕ້ອງນີ້ຄື ຄວາມເປັນທຳ, ຜູ້ໃຊ້ບໍລິການຈະກວດໄດ້ແນວໃດ? ຫຼື ຈະມີກົດໝາຍ ຫຼື ມີນິຕິກຳລຸ່ມກົດໝາຍໃຫ້ມີລະບຸວ່າເປັນແນວໃດ? ສິ່ງທີ່ປະຊາຊົນທຸລະກິດ ຫຼື ພາກສ່ວນນໍາໃຊ້ອິນເຕີເນັດໃຫ້ຄວາມສົນໃຈວ່າຄວາມໄວທີ່ປ່ອຍອອກໄປໄດ້ຕາມການເກັບຄ່າບໍລິການ ຫຼື ບໍ່?.

ຈາກສໍານັກຂ່າວເອບີຊີລາວ

ບົດຄວາມຫຼ້າສຸດ

ການຈັດການຂີ້ເຫຍື້ອທີ່ດີ ຄືຄວາມປອດໄພຕໍ່ສະພາບແວດລ້ອມ ແລະ ສັງຄົມ

ການຈັດການຂີ້ເຫຍື້ອ ຍັງເປັນສິ່ງທີ່ທ້າທ້າຍໃນແຕ່ລະຂົງເຂດ ຕັ້ງແຕ່ເຮືອນຊານ, ຫ້າງຮ້ານ, ບໍລິສັດ ຈົນໄປເຖິງບັນດາໂຮງງານຜະລິດຕ່າງໆ. ເນື່ອງຈາກເປັນໄປບໍ່ໄດ້ທີ່ຈະຫຼີກລ່ຽງບໍ່ໃຫ້ມີການສ້າງຂີ້ເຫຍື້ອເລີຍ. ເຊິ່ງບາງຄັ້ງຍັງພົບເຫັນການທຳລາຍ ແລະ ຈັດການຂີ້ເຫຍື້ອຢ່າງບໍ່ຖືກວິທີ ທີ່ສົ່ງຜົນເສຍຕໍ່ສິ່ງແວດລ້ອມ ແລະ ສ້າງຄວາມເປີເປື້ອນໃຫ້ສັງຄົມ ເຊັ່ນ:...

ຮູ້ຫຼືບໍ່? ທີ່ໄປທີ່ມາຂອງຊື່ພາຍຸແຕ່ລະລູກ ໃຜເປັນຄົນຕັ້ງ ແລະ ໃຜເປັນຄົນຄິດຊື່

ພາຍຸແຕ່ລະລູກ ໃຜເປັນຄົນຕັ້ງ ແລະ ໃຜເປັນຄົນຄິດຊື່ ມາຮູ້ຄຳຕອບມື້ນີ້ ພາຍຸວິພາ, ພາຍຸຄາຈິກິ ໄດ້ມາຈາກໃສ ໃນໄລຍະນີ້ເຫັນວ່າມີພາຍຸກໍ່ໂຕຂຶ້ນມາຕະຫຼອດ ແລະມີຫຼາຍຄົນອາດຈະສົງໃສວ່າ ໃນການຕັ້ງຊື່ພາຍຸແຕ່ລະລູກ ແມ່ນໃຜເປັນຄົນຕັ້ງ ແລະຄໍາຕອບກໍຄື ຊື່ຂອງພາຍຸແມ່ນໄດ້ຖືກຕັ້ງຂຶ້ນຈາກປະເທດຕ່າງໆໃນທົ່ວໂລກ. ສຳລັບພາຍຸທີ່ສາມາດຕັ້ງຊື່ໄດ້ນັ້ນ ຕ້ອງແມ່ນພາຍຸລະດັບໂຊນຮ້ອນຂຶ້ນໄປ...

ແຈ້ງເຕືອນພາຍຸລູກໃໝ່ ທີ່ອາດຈະສົ່ງຜົນກະທົບຕໍ່ປະເທດລາວ ໃນວັນທີ 30/08/2025 – 02/09/2025

ກຽມຮັບມືພາຍຸລູກໃໝ່ ຫວຽດນາມອອກແຈ້ງເຕືອນພາຍຸລູກໃໝ່ ອາດສົ່ງຜົນກະທົບຕໍ່ປະເທດລາວ, ປະເທດໄທ ແລະ ປະເທດຫວຽດນາມ ຫວຽດນາມອອກແຈ້ງເຕືອນພາຍຸລູກໃໝ່ ທີ່ຄາດວ່າຈະໃຊ້ຊື່ວ່າພາຍຸໜອງຟ້າ ຫຼື ຟ້າໃສ ທີ່ຕັ້ງຊື່ໂດຍປະເທດລາວ ຄາດອິດທິພົນຂອງພາຍຸລູກນີ້ຈະສົ່ງຜົນກະທົບຕໍ່ປະເທດລາວ, ປະເທດໄທ ແລະ ປະເທດຫວຽດນາມ...

ຜົນສໍາເລັດ ກອງປະຊຸມໃຫຍ່ ຜູ້ແທນສະມາຊິກພັກ ຄັ້ງທີ III ຂອງ ອົງຄະນະພັກ ກະຊວງເຕັກໂນໂລຊີ ແລະ ການສື່ສານ

ເອກະສັນຮັບເລືອກ ສະຫາຍ ປອ. ສັນຕິສຸກ ສິມມາລາວົງ ເປັນເລຂາຄະນະພັກ ກະຊວງເຕັກໂນໂລຊີ ແລະ ການສື່ສານ (ຊຸດໃໝ່) ກະຊວງເຕັກໂນໂລຊີ ແລະ ການສື່ສານລາຍງານຜົນ ກອງປະຊຸມໃຫຍ່ ຜູ້ແທນສະມາຊິກພັກ...