ສຳນັກຂ່າວຕ່າງປະເທດ ລາຍງານໃນວັນທີ 9 ພະຈິກນີ້ວ່າ ທ່ານ ຣິຊາດ ອິ໋ວ ປະທານຜູ້ບໍລິຫານຫົວເວິ່ຍ (Huawei) ໄດ້ເປີດເຜີຍຕໍ່ສື່ມວນຊົນ ທີ່ນະຄອນມິວນິກ ປະເທດເຢຍລະມັນວ່າ ບໍລິສັດໄດ້ຕັ້ງເປົ້າໝາຍເປັນຜູ້ຜະລິດສະມາດໂຟນ ລາຍໃຫຍ່ທີ່ສຸດອັນດັບສອງຂອງໂລກ ພາຍໃນເວລາສອງປີຂ້າງໜ້ານີ້, ໂດຍຫົວເວິ່ຍ ໄດ້ເລີ່ມຕົ້ນໃຫ້ບໍລິການ ດ້ານເຄືອຂ່າຍໂທລະຄົມມະນາຄົມ ຈົນເປັນທີ່ຮູ້ຈັກຢ່າງກວ້າງຂວາງໃນທົ່ວໂລກ ແລະ ໃຊ້ເວລາບໍ່ພໍເທົ່າໃດປີ ກໍສາມາດບຸກເບີກຕະຫລາດ ອຸປະກອນການສື່ສານສ່ວນບຸກຄົນ ຈົນຂຶ້ນແທ່ນກາຍເປັນຜູ້ຜະລິດສະມາດໂຟນ ລາຍໃຫຍ່ທີ່ສຸດອັນດັບທີສາມໃນປັດຈຸບັນ ຮອງຈາກແອັບເປິ້ນ ແລະ ຊຳຊຸງ ເອເລັກໂຕຣນິກ.

ທັງນີ້ ອີງຕາມບົດລາຍງານການວິໄຈຂອງ Strategy Analytics ຂອງອາເມຮິກາ ໄດ້ລະບຸວ່າ ຫົວເວິ່ຍ ໄດ້ເປັນຜູ້ຜະລິດສະມາດໂຟນ ລາຍໃຫຍ່ທີ່ສຸດອັນດັບສາມ ໃນໄຕມາດທີສາມ ດ້ວຍຍອດການສົ່ງຂາຍກວ່າ 33.6 ລ້ານໜ່ວຍ ຄອງສ່ວນແບ່ງທາງການຕະຫລາດ 9%, ສ່ວນແອັບເປິ້ນ ໄດ້ຄອງອັນດັບສອງ ຈາກຈຳນວນ 45.5 ລ້ານໜ່ວຍ ກວມສ່ວນແບ່ງທາງຕະຫລາດ 12% ແລະ ຊຳຊຸງ ໄດ້ເປັນອັນດັບທີໜຶ່ງ ດ້ວຍຈຳນວນ 75.3​ ລ້ານໜ່ວຍ ຄອງສ່ວນແບ່ງທາງການຕະຫລາດ 20.1%.

ທ່ານ ຣິຊາດ ອິ໋ວ ໄດ້ກ່າວວ່າ ” ເຮົາກຳລັງແຊງໜ້າແອັບເປິ້ນໄປເທື່ອລະຂັ້ນ ດ້ວຍນະວັດຕະກຳໃໝ່ໆ ໂດຍຫົວເວີ່ຍຈະພັດທະນາຕົນເອງ ພ້ອມກັບການປ່ຽນແປງດ້ານເຕັກໂນໂລຊີ ”

ຕິດຕາມເຮົາທາງFacebook ກົດຖືກໃຈເລີຍ!