ຫລາຍປີຜ່ານມາ, ລັດຖະບານສູນເສຍລາຍຮັບເປັນຈຳນວນຫລວງຫລາຍ ຈາກການຍົກເວັ້ນພາສີ-ອາກອນ ນຳເຂົ້າພາຫະນະ, ກົນຈັກ ແລະ ນ້ຳມັນເຊື້ອໄຟ. ຕາມການເປີດເຜີຍຂອງ ອົງການກວດສອບແຫ່ງລັດ ກ່ຽວກັບການກວດກາການຍົກເວັ້ນພາສີ-ອາກອນ ສະເພາະຢູ່ດ່ານສາກົນຂົວມິດຕະພາບ I ນະຄອນຫລວງວຽງຈັນພົບວ່າ: ສົກປີ 2013-2014 ມີການນຳເຂົ້າພາຫະນະ ແລະ ກົນຈັກຈຳນວນ 1.969 ຄັນ ມີມູນຄ່າຍົກເວັ້ນພາສີ-ອາກອນຫລາຍກວ່າ 212 ຕື້ກີບ, ນຳເຂົ້ານ້ຳມັນເຊື້ອໄຟຫລາຍກວ່າ 63 ລ້ານລິດ ມີມູນຄ່າຍົກເວັ້ນພາສີ-ອາກອນ ຫລາຍກວ່າ 85 ຕື້ກີບ ເຊິ່ງພາຫະນະ, ກົນຈັກທີ່ຍົກເວັ້ນພາສີ-ອາກອນສ່ວນຫລາຍແມ່ນນຳໃຊ້ບໍ່ຖືກເປົ້າໝາຍຂອງກິດຈະການ, ສ່ວນຫລາຍນຳເຂົ້າເພື່ອຈຳໜ່າຍ, ໂດຍສະເພາະລົດຈຳນວນ 210 ຄັນຂອງ 10 ບໍລິສັດ ທີ່ມີມູນຄ່າຍົກເວັ້ນພາສີ-ອາກອນຫລາຍກວ່າ 11 ຕື້ກີບ. ນອກຈາກນີ້ ຍັງມີໂຄງການກໍ່ສ້າງເສັ້ນທາງກາສີ-ເມືອງນານ ໄລຍະທາງຍາວ 68 ກິໂລແມັດ ມູນຄ່າໂຄງການ 28,63 ລ້ານໂດລາສະຫະລັດ ຕາມແຈ້ງການຂອງຄະນະເລຂາທິການລັດຖະບານໄດ້ກຳນົດວ່າ: ການຂໍຍົກເວັ້ນພາສີ-ອາກອນນຳເຂົ້າວັດສະດຸກໍ່ສ້າງ ແລະ ນ້ຳມັນເຊື້ອໄຟ ແມ່ນໃຫ້ກວດກາການຄິດໄລ່ມູນຄ່າຂອງໂຄງການ ວ່າໄດ້ບວກເຂົ້າແລ້ວ ຫລື ບໍ່, ຖ້າບໍ່ໄດ້ບວກໃສ່ກໍເຫັນດີໃຫ້ຍົກເວັ້ນ. ແຕ່ຜ່ານການກວດກາເຫັນວ່າ ໃນມູນຄ່າໂຄງການນີ້ແມ່ນໄດ້ບວກຄ່າພາສີ-ອາກອນເຂົ້າແລ້ວ, ແຕ່ຍັງຂໍຍົກເວັ້ນຕື່ມອີກ ຈຶ່ງເຮັດໃຫ້ບໍລິສັດ ໄດ້ຮັບຍົກເວັ້ນສອງຄັ້ງ ໂດຍລວມມີມູນຄ່າການນຳເຂົ້ານ້ຳມັນທັງໝົດ 38,25 ລ້ານໂດລາສະຫະລັດ, ໃນນັ້ນມີມູນຄ່າຍົກເວັ້ນພາສີ-ອາກອນ ຫລາຍກວ່າ 11,9 ລ້ານໂດລາສະຫະລັດ ແລະ ຕາມການຄິດໄລ່ຂອງ ກະຊວງໂຍທາທິການ ແລະ ຂົນສົ່ງ ໂຄງການດັ່ງກ່າວ ຈະນຳໃຊ້ນ້ຳມັນປະມານ 13 ລ້ານລິດ, ແຕ່ຜິດດ່ຽງຫລາຍກວ່າ 60 ລ້ານລິດ. ອີກກໍລະນີໜຶ່ງ ແມ່ນໂຄງການກໍ່ສ້າງທາງເວັ້ນຕົວເມືອງຫລວງພະບາງ ມີຄວາມຍາວ 24,04 ກິໂລແມັດ ລວມມີມູນຄ່າກໍ່ສ້າງ 26,24 ລ້ານໂດລາສະຫະລັດ, ກົນຈັກເສຍພາສີອັດຕາ 1% ຈຳນວນ 92 ຄັນ ແລະ ວັດສະດຸອຸປະກອນຕ່າງໆເຊັ່ນ: ເຫລັກເສັ້ນ 4 ພັນໂຕນ, ຊີມັງ 5 ພັນໂຕນ, ນ້ຳມັນກາຊວນ 18 ລ້ານລິດ ຕົກເປັນມູນຄ່າ 11,16 ລ້ານໂດລາສະຫະລັດ ແລະ ນ້ຳມັນແອັດຊັງ 14 ລ້ານລິດ ຕົກເປັນມູນຄ່າ 9 ລ້ານກວ່າໂດລາສະຫະລັດ ແລະ ຕາມການປະເມີນຂອງກະຊວງໂຍທາທິການ ແລະ ຂົນສົ່ງ ໂຄງການດັ່ງກ່າວ ຈະນຳໃຊ້ນ້ຳມັນເຊື້ອໄຟປະມານ 4,66 ລ້ານລິດ ແລະ ຜິດດ່ຽງເຖິງ 27,34 ລ້ານລິດ ມີມູນຄ່າຍົກເວັ້ນພາສີອາກອນ ປະມານ 36 ຕື້ກີບ, ນີ້ແມ່ນບາງຕົວຢ່າງທີ່ໄດ້ກວດພົບ ແລະ ຍັງມີອີກຫລາຍໆໂຄງການທີ່ນຳເຂົ້າ ແລະ ຍົກເວັ້ນພາສີ-ອາກອນຄືດັ່ງກ່າວ ເປັນຈຳນວນຫລາຍ ຢູ່ແຕ່ລະດ່ານໃນຂອບເຂດທົ່ວປະເທດ ເຊິ່ງອົງການກວດສອບແຫ່ງລັດ ແລະ ອົງການກວດກາລັດຖະບານ ຈະໄດ້ຮ່ວມກັນສືບຕໍ່ກວດກາ ເພື່ອລາຍງານລັດຖະບານມີມາດຕະການແກ້ໄຂ ຕາມລະບຽບກົດໝາຍໃຫ້ເຂັ້ມງວດ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!