ສຳນັກຂ່າວຕ່າງປະເທດ ລາຍງານໃນວັນທີ 9 ພະຈິກນີ້ວ່າ ຄະນະນາຍທະຫານອາກາດມຽນມາ ທີ່ເດີນທາງໄປຮ່ວມງານ ແອຣຸ ໂຊວ໌ ໄຊນ່າ 2016 ທີ່ເມືອງຈູໄຫ ແຂວງກວາງຕຸ້ງ ສປ ຈີນ ໄດ້ມີການຢືນຢັນວ່າ ຈະມີການເຊັນສັນຍາຊື້ເຮືອບິນສູ້ຮົບ JF-17 (Joint Fighter-17) ຢ່າງໜ້ອຍ 16 ລຳ ຊຶ່ງເປັນຜົນງານການອອກແບບ ແລະ ພັດທະນາໂດຍ ກຸ່ມບໍລິສັດອາກາດສະຍານເສິງຕູ ຫລື CAC (Chengdu Aircraft Corporation) ແລະ ກຸ່ມບໍລິສັດຈີນດັ່ງກ່າວ ໄດ້ຮ່ວມກັນຜະລິດກັບ ບໍລິສັດ Pakistan Aeronautical Complex ຫລື PAC ຂອງປາກີສະຖານ ໂດຍການຈັດຊື້ດັ່ງກ່າວນີ້ ເປັນສ່ວນໜຶ່ງຂອງສັນຍາຂໍ້ຕົກລົງ ທີ່ເຊັນກັນລະຫວ່າງ ມຽນມາ, ປາກີສະຖານ ແລະ ສປ ຈີນ.

ເຮືອບິນສູ້ຮົບ JF-17 ຖືກອອກແບບໃຫ້ຕິດຕັ້ງອາວຸດ ຈຳນວນ 7 ແຫ່ງ ທີ່ກ້ອງປີກສອງຂ້າງ 4 ແຫ່ງ, ກ້ອງລຳຕົວເຮືອບິນ 1 ແຫ່ງ ແລະ ທີ່ປາຍປີກສອງຂ້າງອີກ 2 ແຫ່ງ ສາມາດບັນທຸກຍຸດໂທປະກອນໄດ້ສູງສຸດ 3.7 ໂຕນ, ເປັນເຮືອບິນທີ່ອອກແບບ ສຳລັບພາລະກິດໂຈມຕີ ແລະ ຖິ້ມລະເບີດ.

 
ຕິດຕາມເຮົາທາງFacebook ກົດຖືກໃຈເລີຍ!