ໃນປະຈຸບັນອຸປະຕິເຫດຕາມທ້ອງຖະໜົນປາກົດວ່າເກີດຂຶ້ນຫຼາຍ ໂດຍສະເພາະແມ່ນມັກເກີດກັບກຸ່ມຄົນທີ່ດື່ມສິ່ງມຶນເມົາແລ້ວຂັບຂີ່ລົດ, ເຫັນໄດ້ໃນໄລຍະເວລາ 10 ເດືອນຜ່ານມາ ຢູ່ນະຄອນຫຼວງວຽງຈັນມີອຸບັດເຫດເກີດຂຶ້ນທັງໝົດແລ້ວ 1.275 ຄັ້ງ ໃນນີ້ມີຜູ້ເສຍຊີວິດສູງເຖິງ 215 ຄົນ.
ທ່ານພັນຕີ ສັງຄົມ ພົມມະລາດ ຮອງຫົວໜ້າ ພະແນກຕຳຫຼວດຈະລາຈອນ ນະຄອນຫຼວງວຽງຈັນ ໄດ້ລາຍງານກ່ຽວ ກັບສະຖິຕິອຸປະຕິເຫດໄລຍະ 10 ເດືອນ ຂອງປີ 2016 ຕໍ່ທີມຂ່າວໃນວັນທີ 7 ພະຈິກຜ່ານມານີ້ຮູ້ວ່າ: ປະຈຸບັນສະພາບການພັດທະນາເສດຖະກິດກຳລັງຂະຫຍາຍຢ່າງຕໍ່ເນື່ອງ ເຮັດໃຫ້ພາຫະນະເພີ່ມຂຶ້ນຫຼາຍເທົ່າ ທຽບໃສ່ເມື່ອກ່ອນເປັນສາເຫດໜຶ່ງທີ່ພາໃຫ້ເກີດອຸປະຕິເຫດເພີ່ມຂຶ້ນ ແຕ່ລະໄລຍະເຫັນໄດ້ພຽງເດືອນມັງກອນ ຫາເດືອນພະຈິກ 2016 ມີອຸບັດເຫດເກີດຂຶ້ນທັງໝົດ 1.275 ລາຍ, ມີພາຫະນະເປ່ເພທັງໝົດ 2.543 ຄັນ, ເລັກນ້ອຍ 870 ຄັນ, ສົມຄວນ1.623 ຄັນ, ໃຊ້ການບໍ່ໄດ້ 214 ຄັນ ແລະມີຄົນບາດຈັບທັງໝົດ 1.663 ຄົນ, ເລັກນ້ອຍ 541 ຄົນ, ສົມຄວນ 793 ຄົນ, ສາຫັດ 295 ຄົນ ແລະເສຍຊີວິດ 215 ຄົນ. ເກີດຂຶ້ນຫຼາຍກວ່າໝູ່ແມ່ນເມືອງໄຊທານີ ຮອງລົງມາເມືອງຈັນທະບູລີ, ອຸປະຕິເຫດດັ່ງກ່າວສາເຫດສ່ວນໃຫຍ່ແມ່ນເມົາແລ້ວຂັບ, ແຊງບໍ່ຫວິດ ແລະອື່ນໆ.
ທ່ານຮອງຫົວໜ້າ ພະແນກຕຳຫຼວດຈະລາຈອນນະຄອນຫຼວງ ຍັງຝາກເຖິງພໍ່ແມ່ປະຊາຊົນໃນຂອບເຂດທົ່ວປະເທດ ໃນການໃຊ້ລົດໃຊ້ຖະໜົນວ່າ: ເພື່ອເປັນການປ້ອງກັນ ແລະຫຼຸດຜ່ອນອຸປະຕິເຫດ ແມ່ນໃຫ້ທຸກຄົນມີສະຕິທຸກຄັ້ງກ່ອນອອກຈາກບ້ານເຊັ່ນ: ກວດເບິ່ງສະພາບລົດ, ເວລາໄປກິນດື່ມຊຸມແຊວບໍ່ຢາກໃຫ້ກິນເກີນຂອບເຂດ, ຍາມຂັບຂີ່ກໍ່ຄວນມີສະຕິລະວັງຕົວຢູ່ສະເໝີ ທັງນີ້ກໍເພື່ອເປັນການຫຼຸດພົ້ນອອກຈາກອຸບັດເຫດ ເພື່ອບໍ່ເປັນການເສຍເວລາໃນການທຳມາຫາກິນ ແລະອື່ນໆ.
ຂ່າວ: ເສດຖະກິດ-ສັງຄົມ