ສຳນັກຂ່າວຕ່າງປະເທດ ລາຍງານໃນວັນທີ 7 ພະຈິກຜ່ານມານີ້ວ່າ ອົງການສະຫະປະຊາຊາດ ກຳລັງດຳເນີນການສືບສວນ ກໍລະນີກອງທັບສະຫະລັດອາເມຣິກາ ທຳການໂຈມຕີທາງອາກາດ ສົ່ງຜົນເຮັດໃຫ້ມີພົນລະເຮືອນຊາວອັບການິສະຖານ ເສຍຊີວິດຢ່າງໜ້ອຍ 32 ຄົນ ໃນວັນພະຫັດທີ 3 ພະຈິກທີ່ຜ່ານມາ ຊຶ່ງສ້າງຄວາມຄຽດແຄ້ນໃຫ້ແກ່ປະຊາຊົນຢ່າງຮຸນແຮງ ໂດຍກອງກຳລັງຂອງສະຫະລັດອາເມຮິກາ ໄດ້ອອກມາຍອມຮັບວ່າ ການໂຈມຕີດັ່ງກ່າວ ມີທ່າອ່ຽງສູງ ທີ່ຈະເຮັດໃຫ້ພົນລະເຮືອນບາດເຈັບລົ້ມຕາຍ ແລະ ໃຫ້ຄຳໝັ້ນສັນຍາວ່າ ຈະສືບສວນເຫດການດັ່ງກ່າວນີ້ຢ່າງຈິງຈັງ.
ທ່ານ ທາດາມິຈິ ຢາມາໂມໂຕະ ທູດພິເສດອົງການສະຫະປະຊາຊາດ ປະຈຳອັບການິສະຖານ ໄດ້ກ່າວວ່າ ສິ່ງທີ່ພົບໃນເບື້ອງຕົ້ນ ບົ່ງຊີ້ວ່າ ປະຕິບັດການທາງອາກາດຄັ້ງນັ້ນ ເຮັດໃຫ້ພົນລະເຮືອນເສຍຊີວິດ ຢ່າງໜ້ອຍ 32 ຄົນ ແລະ ບາດເຈັບອີກ 19 ຄົນ ຊຶ່ງສ່ວນໃຫຍ່ເປັນຜູ້ຍິງ ແລະ ເດັກນ້ອຍ. ທ່ານຍັງໄດ້ກ່າວຕື່ມອີກວ່າ ການສູນເສຍຊີວິດຂອງພົນລະເຮືອນ ເປັນສິ່ງທີ່ບໍ່ອາດຍອມຮັບໄດ້ ແລະ ເປັນການບັ່ນທອນທຳລາຍຄວາມພະຍາຍາມ ທີ່ຈະສ້າງສັນຕິພາບ ແລະ ສະຖຽນລະພາບໃນອັບການິສະຖານ.
ຕິດຕາມເຮົາທາງFacebook ກົດຖືກໃຈເລີຍ!