ທ່ອງທ່ຽວກັບລາວໂພສຕ໌ ວັນນີ້ເຮົາຈະຂຶ້ນເໜືອມາທ່ຽວທີ່ເມືອງ ມໍລະດົກໂລກ ເຊິ່ງເຮົາຈະໄປຫຼິ້ນນ້ຳທີ່ໜອງຂຽວ – ເມືອງງອຍ ຄູ່ແຂ່ງທີ່ໜ້າຢ້ານກົວທີ່ສຸດຂອງວັງວຽງກໍ ເພາະວ່າແຫຼ່ງທ່ອງທ່ຽວແຄມແມ່ນໍ້າທີ່ອ້ອມຮອບໄປດ້ວຍພູຜາອັນສູງຊັນ ແລະ ທໍາມະຊາດທີ່ບໍລິສຸດນັ້ນ ຄົງຈະເປັນມົນສະເໜ່ອັນໜຶ່ງທີ່ສາມາດດຶງດູດໃຈໃຫ້ນັກທ່ອງທ່ຽວໄດ້ໄປຢ້ຽມຢາມທ່ຽວຊົມ.
ໜອງຂຽວ – ເມືອງງອຍ ເປັນເມືອງນ້ອຍໆ 2 ເມືອງເຊື່ອມຕໍ່ກັນ ເຊິ່ງຂຶ້ນກັບແຂວງຫຼວງພະບາງ ແລະ ຕັ້ງຢູ່ກາງພູເຂົາທີ່ສວຍງາມແຄມຝັ່ງແມ່ນໍ້າອູອັນເປັນແມ່ນໍ້າໃຫຍ່ທາງພາກເໜືອຂອງລາວ ຫ່າງຈາກເມືອງຫຼວງພະບາງປະມານ 150 ກມ, ໃຊ້ເວລາເດີນທາງປະມານ 2 ຊົ່ວໂມງ. ຈຸດເດັ່ນຂອງໜອງຂຽວ – ເມືອງງອຍ ຢູ່ທີ່ນັກເດີນທາງສາມາດເລືອກເດີນທາງກັບໂດຍເຮືອລ່ອງຕາມນໍ້າອູເຊື່ອມຕໍ່ກັບແມ່ນໍ້າຂອງທີ່ບ້ານປາກອູ ອັນເປັນທີ່ຕັ້ງຂອງຖໍ້າຕິ່ງແລ້ວລ່ອງນໍ້າຂອງສູ່ຫຼວງພະບາງຕໍ່ ໃຊ້ເວລາປະມານ 5 ຊົ່ວໂມງ ເອີ້ນວ່າມາທາງບົກກໍໄດ້ ທາງເຮືອກໍສະດວກ.
ຄວາມຈິງແລ້ວ ໜອງຂຽວ ກັບ ເມືອງງອຍ ເປັນຄົນລະສະຖານທີ່ແຕ່ກໍມີຄວາມຜູກພັນກັນ, ເມືອງງອຍເປັນເມືອງເກົ່າແກ່ແຄມແມ່ນໍ້າອູຕອນກາງເຊິ່ງຂຶ້ນກັບເມືອງຫຼວງພະບາງ ຕໍ່ມາເມື່ອມີການຕັດຖະໜົນຈາກຫຼວງພະບາງ ທາງການກໍໄດ້ສ້າງຂົວຂ້າມແມ່ນໍ້າບໍລິເວນໜອງຂຽວ ເພື່ອຈະມຸ່ງໜ້າໄປທາງເມືອງຊໍາເໜືອ ແຂວງຫົວພັນ ບໍລິເວນທີ່ຕັ້ງຂອງຂົວດັ່ງກ່າວຈຶ່ງກາຍເປັນຊຸມຊົນໃໝ່ ເຊິ່ງມີຊາວບ້ານຈາກເມືອງງອຍຍ້າຍຖິ່ນຖານໄປຕັ້ງບ້ານເຮືອນຢູ່ບໍລິເວນໜອງຂຽວ ແລະ ເມື່ອມີການທ່ອງທ່ຽວມາເຖິງ ໜອງຂຽວຈຶ່ງກາຍເປັນບ້ານໃຫຍ່ທີ່ຄຶກຄັກ ແລະ ຫຼາກຫຼາຍສີສັນກວ່າເມືອງງອຍໃນທີ່ສຸດ ແຕ່ວ່າການເຊື່ອມໂຍງລະຫວ່າງເມືອງງອຍ ກັບ ໜອງຂຽວກໍຍັງມີຕໍ່ເນື່ອງສະໝໍ່າສະເໝີ, ມີເຮືອໂດຍສານປະຈໍາທາງ ແລະ ມີເຮືອໃຫ້ເໝົາດ້ວຍການເດີນທາງໄລຍະສັ້ນໆ ເພື່ອຊົມທິວທັດສອງຂ້າງທາງແບບເພີດເພີນໄປກັບທໍາມະຊາດບໍ່ເຖິງຊົ່ວໂມງກໍຮອດ ໃນລະຫວ່າງທາງອາດຈະພົບເຫັນນັກທ່ອງທ່ຽວທີ່ໃສ່ຊຸດບີກີນີ – ຊຸດລອຍນໍ້າ ຕາມຫາດຊາຍ ຫຼື ພາຍເຮືອແຄນູ. ນອກຈາກນີ້ ໜອງຂຽວກໍກໍາລັງພັດທະນາເປັນສູນຂອງການທ່ອງທ່ຽວແບບຜະຈົນໄພ, ປີນຜາ, ແຄນູ ( Cano ), ຄະຢັດ ( Kayaking ) ແລະ ອື່ນໆ, ໃນຕະຫຼາດກໍມີກິດຈະການທົວທີ່ເປີດໃຫ້ບໍລິການທ່ອງທ່ຽວກາງແຈ້ງລັກສະນະດັ່ງກ່າວມາແລ້ວ.
ຖ້າຫາກຢ້ອນເວລາໄປປະມານ 5 ປີກ່ອນນີ້ ເມືອງງອຍຍັງບໍ່ທັນມີໂຮງແຮມ, ເຮືອນພັກ ແລະ ໜອງຂຽວກໍຍັງເປັນຊຸມຊົນນ້ອຍໆ ມີເຮືອນພັກພຽງ 2 – 3 ຫຼັງເທົ່ານັ້ນ ຊ່ວງເວລາບໍ່ພໍເທົ່າໃດປີຜ່ານໄປ ໜອງຂຽວມີເສັ້ນທາງຢາງ ບໍ່ເປັນທາງດິນແດງຄືດັ່ງເມື່ອກ່ອນ, ມີເຮືອນພັກໃໝ່ໆໄດ້ຖືກສ້າງຂຶ້ນຫຼາຍແຫ່ງ, ມີບໍລິການພື້ນຖານທຸກຢ່າງ ບໍ່ວ່າຈະເປັນຕູ້ເອທີເອັມ, ໄປສະນີ, ລົດ, ເຮືອໂດຍສານປະຈໍາທາງ ບໍ່ສະເພາະແຕ່ໄປຫຼວງພະບາງ ຫຼື ວຽງຈັນເທົ່ານັ້ນ ຕົວແທນຈໍາໜ່າຍຂອງບໍລິສັດທ່ອງທ່ຽວທີ່ນີ້ຍັງສາມາດໃຫ້ບໍລິການຄວບຄຸມການເດີນທາງຕໍ່ ທັງໄປປະເທດໄທ, ໄປພາກເໜືອ ( ແຂວງອຸດົມໄຊ, ບໍ່ແກ້ວ, ຫົວພັນ ) ກໍໄດ້, ການພັດທະນາຢ່າງໄວວາຂອງແຫຼ່ງທ່ອງທ່ຽວແຫ່ງໃໝ່ທີ່ບໍ່ແພ້ວັງວຽງແບບປາກຕໍ່ປາກ ເຮັດໃຫ້ເຮົາສາມາດພົບເຫັນນັກທ່ອງທ່ຽວຈາກເອີຣົບ, ອາເມລິກາ, ຝຣັ່ງ ພາກັນຫຼັ່ງໄຫຼມາຢ້ຽມຢາມທ່ຽວຊົມສະຖານທີ່ແຫ່ງນີ້ຫຼາຍກວ່ານັກທ່ອງທ່ຽວໃນບ້ານເຮົາຊໍ້າອີກ.
ທໍາມະຊາດອັນແສນງົດງາມດັ່ງກ່າວ ບໍ່ອາດຈະພັນລະນາໃຫ້ທ່ານຜູ້ອ່ານຮູ້ໄດ້ຈົນໝົດ ເພາະສະຖານທີ່ແຫ່ງນີ້ຍັງຄອງຄອຍຖ້າໃຫ້ບັນດາທ່ານໄດ້ໄປສໍາຜັດດ້ວຍຕົວຂອງທ່ານເອງ ແລ້ວທ່ານກໍຈະໄດ້ເຫັນຄວາມສວຍງາມຂອງທໍາມະຊາດແຫ່ງນີ້ຫຼາຍກວ່າທີ່ຜູ້ຂຽນເວົ້າໃຫ້ຟັງອີກ.
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!